ព្រឹត្តិការណ៍ - នយោបាយ ព្រឹត្តិការណ៍

29/08/2025 - 16:42

ជូនប្រាក់ដល់ប្រជាជនគ្រប់រូបម្នាក់១០០.០០០ដុង អបអរថ្ងៃបុណ្យឯករាជ្យ

នាយករដ្ឋមន្ត្រីនៃរដ្ឋាភិបាល ទើបតែចេញសារទូរលេខ ១៤៩/CĐ-TTg ថ្ងៃទី២៨ ខែសីហា ឆ្នាំ២០២៥ ស្តីពីការផ្តល់ជូនអំណោយដល់ប្រជាជន ស្របក្នុងឱកាសខួបអនុស្សាវរីយ៍ ៨០ឆ្នាំ បដិវត្តិន៍ខែសីហា និងបុណ្យជាតិ ២ កញ្ញា។

ផ្តល់ជូន ១០០.០០០ដុង/ម្នាក់ ដល់ប្រជាជនទូទាំងប្រទេសក្នុងឱកាសបុណ្យឯករាជ្យជាតិ។

សារទូរលេខ បានបញ្ជាក់៖ ក្នុងបរិយាកាសទូទាំងប្រទេសរីករាយ អបអរសាទរខួបអនុស្សាវរីយ៍ ៨០ឆ្នាំ បដិវត្តន៍ខែសីហា និងបុណ្យជាតិ ២ កញ្ញា ដើម្បីបន្តបង្ហាញពីការយកចិត្តទុកដាក់យ៉ាងជ្រាលជ្រៅរបស់បក្សនិងរដ្ឋចំពោះប្រជាជន អនុវត្តតាមកិច្ចចង្អុលការរបស់សមមិត្តអគ្គលេខាបក្ស តូឡឹម គណៈកម្មាធិការបក្សនៃរដ្ឋាភិបាល បានដាក់សំណើទៅការិយាល័យនយោបាយ ស្តីពីការជូនអំណោយដល់ប្រជាជនក្នុងឱកាសខួបអនុស្សាវរីយ៍៨០ឆ្នាំ បដិវត្តិន៍ខែសីហា និងបុណ្យជាតិ ២ កញ្ញា។

នៅក្នុងសារទូរលេខ ១៧១២៩-CV/VPTW ថ្ងៃទី២៨ ខែសីហា ឆ្នាំ២០២៥ របស់ការិយាល័យមជ្ឈិមបក្ស ការិយាល័យនយោបាយ បានឯកភាពលើគោលការណ៍នៃការជូនអំណោយដល់ប្រជាជន ក្នុងឱកាសខួបអនុស្សាវរីយ៍៨០ឆ្នាំ បដិវត្តិន៍ខែសីហា ដោយផ្តល់ប្រាក់ដល់ប្រជាជនទាំងអស់ម្នាក់ ១០០.០០០ ដុង សម្រាប់អបអរថ្ងៃបុណ្យឯករាជ្យ។

ដើម្បីអនុវត្តបានទាន់ពេលតាមកិច្ចចង្អុលការរបស់ការិយាល័យនយោបាយ នាយករដ្ឋមន្ត្រីនៃរដ្ឋាភិបាល សំណូមពរ៖

១. ក្រសួងហិរញ្ញវត្ថុ ធនាគារជាតិវៀតណាម ក្រសួងនគរបាល និងគណៈកម្មាធិការប្រជាជនខេត្ត ក្រុងចំណុះមជ្ឈិម តាមតួនាទីនិងភារកិច្ចដែលបានកំណត់ដោយផ្អែកតាមកិច្ចចង្អុលការរបស់ការិយាល័យនយោបាយ ត្រង់លិខិតលេខ ១៧១២៩-CV/VPTW សហការយ៉ាងជិតស្និទ្ធ ផ្សព្វផ្សាយអនុវត្តបន្ទាន់អំពីការត្រួតពិនិត្យចំពោះមុខសញ្ញាដែលទទួលអំណោយ ហើយបញ្ជូនអំណោយឲ្យដល់ប្រជាជនទៅតាមមធ្យោបាយសមស្រប (ផ្ទេរតាមប្រព័ន្ធ ឬផ្ទាល់ខ្លួន) ហើយត្រូវបញ្ចប់មុនថ្ងៃបុណ្យជាតិ ២ កញ្ញា ឆ្នាំ២០២៥។

២. ក្រសួងហិរញ្ញវត្ថុ ដឹកនាំសហការជាមួយស្ថាប័នពាក់ព័ន្ធ ប្រញឹករបាយការណ៍ជូនស្ថាប័នមានសមត្ថកិច្ច ឱ្យបានមុនថ្ងៃទី២៩ ខែសីហា ឆ្នាំ២០២៥ អំពីការរៀបចំប្រភពថវិកាសមស្របដើម្បីអនុវត្តការងារនិងធានាតុល្យភាពថវិកាជាតិ។

៣. ធនាគារជាតិវៀតណាម ណែនាំដល់អង្គភាពដែលពាក់ព័ន្ធនិងធនាគារពាណិជ្ជកម្មទាំងឡាយ ពិសេសគឺធនាគារពាណិជ្ជកម្មទីដែលធនាគារជាតិបើកគណនី ធានាថាប្រព័ន្ធទូទាត់និងប្រាក់មុខ ដើម្បីឆ្លើយតបតម្រូវការជូនដល់ប្រជាជនបានទាន់ពេល មានភាពរលូន ដោយមិនចោលរំលងអ្នកណាម្នាក់ ហើយក៏មិនឲ្យមានការទទួលច្រំដែល។

៤. គណៈកម្មាធិការប្រជាជនខេត្ត ក្រុងចំណុះមជ្ឈិម ចង្អុលការដល់ស្ថាប័ន អង្គភាពនានាដែលពាក់ព័ន្ធលើភូមិសាស្ត្រ សហការជិតស្និទ្ធជាមួយក្រសួងនគរបាល ក្រសួងហិរញ្ញវត្ថុ និងធនាគារជាតិវៀតណាម ដើម្បីរៀបចំផ្ញើអំណោយដល់ប្រជាជនបានទាន់ពេល មានសុវត្ថិភាព និងធានាតាមល្បឿនដំណើរការដែលបានកំណត់។

៥. ក្រសួងវប្បធម៌ កីឡានិងទេសចរណ៍ ស្ថានីយទូរទស្សន៍វៀតណាម ស្ថានីយវិទ្យុវៀតណាម ទីភ្នាក់ងារសារព័ត៌មានវៀតណាម តាមតួនាទីនិងភារកិច្ចដែលបានផ្ដល់អនុវត្តការងារផ្សព្វផ្សាយព័ត៌មានអំពីគោលនយោបាយដែលបានលើកឡើងខាងលើរបស់បក្សនិងរដ្ឋ ដើម្បីបង្កើតបរិយាកាសសប្បាយរីករាយ សាមគ្គីភាពក្នុងប្រជាជន ស្របក្នុងឱកាសខួបអនុស្សាវរីយ៍ ៨០ឆ្នាំ បដិវត្តន៍ខែសីហា និងបុណ្យជាតិ ២ កញ្ញា។

៦. ការិយាល័យរដ្ឋាភិបាល តាមតួនាទីនិងភារកិច្ចដែលបានផ្ដល់ គប្បីតាមដានក្រើនរំលឹកនូវការអនុវត្តសារទូរលេខនេះ; ហើយរាយការណ៍ជូនស្ថាប័នមានសមត្ថកិច្ច ចំពោះបញ្ហាណាដែលលើសសិទ្ធិអំណាចរបស់ខ្លួន៕

ប្រភព៖ Chinhphu.vn - ប្រែសម្រួល៖ ពេជ្រសឿន

ចែករំលែកអត្ថបទ

ពាក្យគន្លឹះ