ព្រឹត្តិការណ៍ - នយោបាយ ព្រឹត្តិការណ៍

29/08/2025 - 14:09

ខួប ៨០ ឆ្នាំនៃទិវាបុណ្យជាតិ៖ កម្លាំងសាមគ្គីភាព និងការផ្លាស់ថ្មីជំរុញឱ្យវៀតណាមឈានចូលយុគសម័យថ្មី

ភាពជោគជ័យនៃបដិវត្តន៍ខែសីហា ការប្រយុទ្ធតស៊ូនិងការកសាងប្រទេសវៀតណាមមានកត្តាជាច្រើន ប៉ុន្តែកត្តាសំខាន់បំផុតគឺការប្តេជ្ញាចិត្តរួមគ្នា សាមគ្គីឯកភាព ស្មារតីផ្សារភ្ជាប់ និងអត្តសញ្ញាណរួមរបស់ប្រជាជាតិវៀតណាម។ នេះជាការកត់សម្គាល់របស់លោកស្រីបណ្ឌិត Sandra Scagliotti កុងស៊ុលកិត្តិយសវៀតណាមនៅទីក្រុងទូរីន និងទីក្រុងហ្សេណូវ ប្រវត្តិវិទូវៀតណាម ក្នុងបទសម្ភាសន៍ជាមួយអ្នកយកព័ត៌មាននៃទីភ្នាក់ងារសារព័ត៌មានវៀតណាមនៅទីក្រុងរ៉ូម ក្នុងឱកាសខួប ៨០ ឆ្នាំនៃបដិវត្តន៍ខែសីហា និងទិវាបុណ្យជាតិវៀតណាម។

លោកស្រី Sandra ក្នុងព្រឹត្តិការណ៍ដែលរៀបចំដោយស្ថានទូតវៀតណាមប្រចាំនៅប្រទេសអ៊ីតាលី។

តាមលោកស្រី Scagliotti ព័ត៌មានអំពីការបង្កើតសាធារណរដ្ឋប្រជាធិបតេយ្យវៀតណាម (បច្ចុប្បន្នជាសាធារណរដ្ឋសង្គមនិយមវៀតណាម) នៅថ្ងៃទី ២ ខែកញ្ញា ឆ្នាំ ១៩៤៥ បានរីករាលដាលយ៉ាងឆាប់រហ័សទូទាំងពិភពលោក។ សេចក្តីប្រកាសឯករាជ្យដែលត្រូវបានអានដោយលោកប្រធានហូជីមិញវិសាលដ្ឋានបាឌិញ បានបើកយុគសម័យថ្មីសម្រាប់ប្រទេសសេរីភាពនិងឯករាជ្យ។ ការឯកភាពដ៏ជ្រាលជ្រៅរបស់វៀតណាម ទោះបីជាមានភាពចម្រុះពណ៌ខាងវប្បធម៌នៃជនជាតិទាំង ៥៤ ឬភូមិសាស្ត្រ អាកាសធាតុខុសគ្នាក៏ដោយ គឺជាកម្លាំងជំរុញដ៏សំខាន់ដែលនាំមកនូវជោគជ័យនេះ។

បំណងប្រាថ្នាឯករាជ្យ ម្ចាស់ការនិងពឹងផ្អែកលើខ្លួនឯងរបស់ប្រជាជាតិវៀតណាម រួមជាមួយទេពកោសល្យដឹកនាំរបស់បក្ស បានបង្កើតជាកម្លាំងនាំមកជ័យជម្នះនៃបដិវត្តន៍ខែសីហា ព្រមទាំងជាមូលដ្ឋានគ្រឹះសម្រាប់ការកសាងប្រទេសនាពេលអនាគត។ វៀតណាមមានការរីកចម្រើនឥតឈប់ឈរចាប់តាំងពីមហាសន្និបាតបក្សលើកទី ៦ ឆ្នាំ ១៩៨៦ ជាមួយនឹងគោលនយោបាយផ្លាស់ថ្មី ដែលជំរុញប្រទេសពីស្ថានភាពមិនទាន់អភិវឌ្ឍន៍ឱ្យទៅជាប្រទេសមានចំណូលមធ្យម។ ក្នុងរយៈពេលជិត ៤០ ឆ្នាំកន្លង វៀតណាមសម្រេចបាននូវវឌ្ឍនភាពដ៏អស្ចារ្យជាច្រើនលើវិស័យសេដ្ឋកិច្ច -សង្គម និងសមាហរណកម្មអន្តរជាតិ លើកកម្ពស់ជីវភាពរបស់ប្រជាជនឥតឈប់ឈរ។

ការអនុវត្តកិច្ចព្រមព្រៀងពាណិជ្ជកម្មសេរីសហភាពអឺរ៉ុប-វៀតណាម (EVFTA) ក៏បានបញ្ជាក់ពីសមត្ថភាពរបស់វៀតណាមក្នុងការបំពេញតាមលក្ខណៈវិនិច្ឆ័យដ៏ស្មុគស្មាញផងដែរ។ វៀតណាមបានក្លាយជាគំរូក្នុងការអនុវត្តគោលដៅអភិវឌ្ឍន៍សហស្សវត្សរ៍ និងគោលដៅអភិវឌ្ឍន៍ប្រកបដោយនិរន្តរភាពរបស់អង្គការសហប្រជាជាតិ (UN) ដែលបង្ហាញពីការខិតខំប្រឹងប្រែងដើម្បីជំនះរាល់បញ្ហាប្រឈម ជំរុញការអភិវឌ្ឍប្រកបដោយសមធម៌គ្រប់ជ្រុងជ្រោយ និងនិរន្តរភាព។

លោកស្រី Scagliotti បានសង្កត់ធ្ងន់ថា វៀតណាមបន្តការអភិវឌ្ឍ “យកមនុស្សជាចំណុចស្នូល” យកចិត្តទុកដាក់ដល់ជីវភាពសម្ភារៈ និងស្មារតីរបស់ប្រជាជន ជាពិសេសតាមរយៈការលុបបំបាត់ភាពអត់ឃ្លាន និងកាត់បន្ថយភាពក្រីក្រ ការទទួលបានការអប់រំ និងសុខាភិបាល។ នៅក្នុងសម័យពិភាក្សាទូទៅកម្រិតកំពូលនៃមហាសន្និបាត UN លើកទី ៧៩ ឆ្នាំ ២០២៤ លោកអគ្គលេខាបក្ស តូឡឹម បានអះអាងថា “យកមនុស្សជាចំណុចស្នូល ដើម្បីសម្រេចចក្ខុវិស័យ។ យកប្រជាជនជាចំណុចស្នូល គឺជាទិសដៅនិងជាកម្លាំងជំរុញនៃរាល់គោលនយោបាយនិងសកម្មភាពនៃគ្រប់លំដាប់ថ្នាក់"។

លោកស្រីបណ្ឌិត Scagliotti បានកត់សម្គាល់ថា ការកែទម្រង់និងការផ្លាស់ថ្មីដែលផ្តោតលើ “ចតុស្តម្ភ” - ជំរុញវិទ្យាសាស្ត្រ បច្ចេកវិទ្យា និងនវានុវត្តន៍; ម្ចាស់ការសមាហរណកម្មអន្តរជាតិយ៉ាងស៊ីជម្រៅ; អភិវឌ្ឍខ្លាំងវិស័យសេដ្ឋកិច្ចឯកជន; ផ្លាស់ថ្មីការកសាងនិងការអនុវត្តច្បាប់ - គឺជាទម្រង់ជំរុញឱ្យវៀតណាមឈានឡើង។ លោកអគ្គលេខាបក្ស តូឡឹម បានអំពាវនាវដល់ទូទាំងប្រព័ន្ធនយោបាយ ប្រជាជន និងកងទ័ពឱ្យសាមគ្គីគ្នា កម្លាយបំណងប្រាថ្នាឱ្យទៅជាសកម្មភាព សក្កានុភាពឱ្យទៅជាកម្លាំងពិតប្រាកដ នាំប្រទេសជាតិឈានចូល “យុគសម័យថ្មី” រុងរឿងនិងរឹងមាំ។

វៀតណាមបាននិងកំពុងរក្សាគោលការណ៍ឯករាជ្យ សេរីភាព និងសុភមង្គល។ ក្នុងពេលខាងមុខ ប្រទេសជាតិត្រូវស្វែងរកផ្លូវថ្មី ទទួលយកបញ្ហាប្រឈម និងប្រកាន់ខ្ជាប់នូវគោលការណ៍ផ្លាស់ថ្មី។ “ចតុស្តម្ភ” នឹងជួយកសាងស្ថាប័នច្បាប់តម្លាភាព ធានាសិទ្ធិមនុស្ស ជំរុញវិទ្យាសាស្ត្របច្ចេកវិទ្យា នវានុវត្តន៍ និងយកវិស័យឯកជនជាកម្លាំងជំរុញស្នូលនៃសេដ្ឋកិច្ច។

ដំណាក់កាល ២០២៥-២០៣០ វៀតណាមត្រូវមានការផ្លាស់ប្តូរយ៉ាងខ្លាំងក្លាតាមរយៈកម្មវិធីនវានុវត្តន៍ជាតិ ការផ្លាស់ប្តូរឌីជីថល ពង្រីកដល់សហគ្រាស និងរដ្ឋអំណាចមូលដ្ឋាន កសាងប្រព័ន្ធអេកូឡូស៊ីនវានុវត្តន៍ គាំទ្រការស្រាវជ្រាវ ការអភិវឌ្ឍ និងពាណិជ្ជកម្មបច្ចេកវិទ្យា ព្រមទាំងអភិវឌ្ឍហេដ្ឋារចនាសម្ព័ន្ធទិន្នន័យ និងវេទិកាឌីជីថលសម្រាប់រដ្ឋាភិបាល សេដ្ឋកិច្ច និងសង្គមឌីជីថល។

លោកស្រីបណ្ឌិត Scagliotti បានសម្តែងការជឿជាក់ថា ការលើកកម្ពស់ប្រពៃណីវីរភាព ភាពឆ្លាតវៃ ភាពក្លាហាន និងបំណងប្រាថ្នាដ៏ខ្ជាប់ខ្ជួនរបស់ប្រជាជាតិទាំងមូល វៀតណាមនឹងបន្តដំណើរយ៉ាងរឹងមាំនៅលើផ្លូវអភិវឌ្ឍន៍លឿន និងនិរន្តរភាព បំភ្លឺអណ្ដាតភ្លើងនវានុវត្តន៍ ព្រមទាំងជាអណ្ដាតភ្លើងនៃបំណងប្រាថ្នា និងសកម្មភាព ឆ្ពោះទៅរកប្រទេសដ៏សម្បូរសប្បាយ រុងរឿង ប្រកៀកស្មាជាមួយបណ្តាមហាអំណាចនានានៅឆ្នាំ ២០៤៥៕

យឿងហ្វា - បកប្រែ ÷ សុផន

ចែករំលែកអត្ថបទ

ពាក្យគន្លឹះ