ព្រឹត្តិការណ៍ - នយោបាយ ព្រឹត្តិការណ៍

22/08/2025 - 09:35

ចាត់តាំងយ៉ាងឱឡារិកពិធីអបអរសាទរខួប ៨០ ឆ្នាំនៃការបង្កើតរដ្ឋាភិបាលសាធារណរដ្ឋសង្គមនិយមវៀតណាម

ក្នុងបរិយាកាសទូទាំងប្រទេសអបអរសាទរខួបអនុស្សាវរីយ៍ ៨០ ឆ្នាំនៃបដិវត្តន៍ខែសីហា និងខួប ៨០ ឆ្នាំនៃទិវាបុណ្យជាតិ (១៩៤៥-២០២៥) ព្រឹកថ្ងៃទី ២០ ខែសីហា រដ្ឋាភិបាលបានចាត់តាំងយ៉ាងឱឡារិកនូវពិធីអបអរសាទរខួប ៨០ ឆ្នាំនៃការបង្កើតរដ្ឋាភិបាលសាធារណរដ្ឋសង្គមនិយមវៀតណាម (២៨/៨/១៩៤៥-២៨/៨/២០២៥)។ នេះជាលើកដំបូងដែលរដ្ឋាភិបាលចាត់តាំងពិធីអបអរសាទរទិវាបង្កើតរដ្ឋាភិបាល; ព្រឹត្តិការណ៍នេះបានប្រព្រឹត្តឡើងនៅមជ្ឈមណ្ឌលសន្និបាតជាតិ (ហាណូយ) បានផ្សាយបន្តផ្ទាល់តាមទូរទស្សន៍ VTV1 របស់ស្ថានីយទូរទស្សន៍វៀតណាម ដើម្បីបណ្តាសមមិត្តនិងប្រជាជនទូទាំងប្រទេសបានទស្សនា។

លោកអគ្គលេខាបក្ស តូឡឹម និងបណ្តាសមមិត្តថ្នាក់ដឹកនាំ អតីតថ្នាក់ដឹកនាំបក្ស រដ្ឋ
រួមទាំងប្រតិភូបានចូលរួមក្នុងពិធីអបអរសាទរខួប ៨០ ឆ្នាំនៃការបង្កើតរដ្ឋាភិបាល។
រូបថត៖ ថុងញឹក - TTXVN

ថ្លែងសុន្ទរកថាអបអរសាទរ ក្នុងនាមរដ្ឋាភិបាល លោកនាយករដ្ឋមន្ត្រី ផាមមិញជិញ បានថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំបក្ស រដ្ឋគ្រប់ដំណាក់កាលដែលតែងតែដឹកនាំ ចង្អុលការដិតដល់ យកចិត្តទុកដាក់គ្រប់ជ្រុងជ្រោយ ចែករំលែកដោយស្មោះត្រង់ និងយោគយល់យ៉ាងជ្រាលជ្រៅចំពោះរដ្ឋាភិបាលក្នុងគ្រាលំបាក សាកល្បង។ លោកនាយករដ្ឋមន្ត្រីបានផ្ញើការដឹងគុណយ៉ាងជ្រាលជ្រៅបំផុតជូនដល់សមាជិករដ្ឋាភិបាល ថ្នាក់ដឹកនាំគណៈ ក្រសួង ផ្នែក ភូមិភាគគ្រប់ដំណាក់កាលដែលបានសាមគ្គី រួមកម្លាំង ស្រុះចិត្តគំនិតកសាងរដ្ឋាភិបាលដើម្បីបក្ស ដើម្បីប្រទេសជាតិ ដើម្បីប្រជាជន។

រមិលមកប្រវត្តិសាស្ត្រ ៨០ ឆ្នាំរបស់រដ្ឋាភិបាលឆ្លងកាត់គ្រប់ដំណាក់កាលដែលពោរពេញដោយការលំបាក សាកល្បង ប៉ុន្តែក៏មានកិត្តិយស មោទនភាព និងភាពត្រចះត្រចង់នៃបដិវត្តន៍វៀតណាម ក្រោមការដឹកនាំរបស់គណៈប្រតិបត្តិការមជ្ឈិមបក្ស លោកប្រធានហូជីមិញ ជាទីគោរពស្រឡាញ់ជាប្រចាំនិងដោយផ្ទាល់គឺការិយាល័យនយោបាយ គណៈលេខាមជ្ឈិមបក្ស អគ្គលេខាបក្សគ្រប់ដំណាក់កាល ពីសម័យរដ្ឋាភិបាលបណ្តោះអាសន្ននៃសាធារណរដ្ឋប្រជាធិបតេយ្យវៀតណាមឆ្នាំ ១៩៤៥ រហូតដល់រដ្ឋាភិបាលនៃសាធារណរដ្ឋសង្គមនិយមវៀតណាមសព្វថ្ងៃនេះ សុទ្ធសឹងមានការសាមគ្គី ឯកភាព “ថ្នាក់លើថ្នាក់ក្រោមចិត្តមួយថ្លើមមួយ គ្រប់ផ្នែកជ្រួតជ្រាប” តែងតែខិតខំប្រឹងប្រែងអស់ពីកម្លាំងកាយចិត្ត តស៊ូដោយមិនឈប់ឈរទាំងអស់ដើម្បីទិសដៅ “ឯករាជ្យជនជាតិផ្សារភ្ជាប់ជាមួយនឹងសង្គមនិយម” និងជីវភាពរស់នៅប្រកបដោយភាពកក់ក្តៅ និងសុភមង្គលរបស់ប្រជាជន រួមចំណែកសម្រេចបាននូវជ័យជម្នះដ៏ធំធេង បង្កើតបានជាចំណុចរបត់ដែលមានលក្ខណៈ “បង្វែរស្ថានការណ៍ ផ្លាស់ប្តូរស្ថានភាព”…។

លោកអគ្គលេខាបក្ស តូឡឹម ថ្លែងសុន្ទរកថាក្នុងពិធីអបអរសាទរខួប ៨០ ឆ្នាំនៃការបង្កើតរដ្ឋាភិបាល។ រូបថត៖ ថុងញឹក - TTXVN

ថ្លែងសុន្ទរកថាក្នុងពិធីអបអរសាទរ លោកអគ្គលេខាបក្ស តូឡឹម បានសម្តែងការរំភើបចិត្ត និងមោទនភាព ដែលបានរួមជាមួយថ្នាក់ដឹកនាំដែលបំពេញការងារនៅរដ្ឋាភិបាលគ្រប់ដំណាក់កាល រមិលមកដំណើរដ៏រុងរឿងរបស់ប្រទេសជាតិ ដឹងគុណយ៉ាងជ្រាលជ្រៅចំពោះការរួមចំណែកដ៏ធំធេង និងសំខាន់របស់បណ្តាសមមិត្តជំនាន់មុន រួមគ្នាអះអាងនូវឆន្ទៈតស៊ូដើម្បីវៀតណាមរឹងមាំ រុងរឿង និងសុភមង្គល។

ជំនួសមុខបក្ស រដ្ឋ និងប្រជាជន លោកអគ្គលេខាបក្ស តូឡឹម បានសម្តែងការដឹងគុណគ្មានដែនកំណត់ចំពោះថ្នាក់ដឹកនាំរដ្ឋាភិបាល និងបណ្តាស្ថាប័នភ្នាក់ងារក្រោមរដ្ឋាភិបាលគ្រប់ដំណាក់កាលដែលបានរួមចំណែកញើសឈាម យុវវ័យ និងអាយុជីវិតរបស់ខ្លួនដើម្បីកសាងខឿនរដ្ឋបាល និងការគ្រប់គ្រងប្រទេសជាតិ; គោរពនឹកដល់សមមិត្តដែលបានលាចាកលោក វីរជន យុទ្ធជនពលី ឥស្សរជនជំនាន់មុន ដែលបានលះបង់អស់មួយជីវិតដើម្បីមាតុភូមិ។

លោកអគ្គលេខាបក្សមានបំណង ទោះបីឋិតក្នុងកាលៈទេសៈណាក៏ដោយ ក៏បណ្តាសមមិត្តបដិវត្តន៍ជើងចាស់ អតីតថ្នាក់ដឹកនាំរដ្ឋាភិបាល ក្រសួង ទីភ្នាក់ងារស្មើក្រសួង និងទីភ្នាក់ងារក្រោមរដ្ឋាភិបាលគ្រប់ដំណាក់កាលបន្តរួមដំណើរជាមួយរដ្ឋាភិបាលបច្ចុប្បន្ន៖ ផ្តល់យោបល់ដោយស្មោះត្រង់ កសាងបណ្តុះស្មារតី ជួយដល់ជំនាន់ក្រោយ សាយភាយនូវតម្លៃដ៏ល្អផូរផង់; បន្តសរសេរ បន្តប្តូរយោបល់ បន្តស្តាប់ និងបន្តបន្សល់ទុកនូវ “សិល្បៈនៃការគ្រប់គ្រងប្រទេសជាតិ” ដែលបានបណ្តុះបណ្តាលពេញមួយជីវិតបូជាជូនមាតុភូមិ; សូមបន្តជា “អណ្ដាតភ្លើងដ៏កក់ក្តៅ” ដើម្បីឱ្យកម្មាភិបាលគ្រប់រូបក្នុងគ្រាលំបាកបំផុត នៅតែចងចាំផ្លូវ បោះជំហានដោយរឹងមាំ៕

PV (TTXVN) - បកប្រែ÷ សុផន

ចែករំលែកអត្ថបទ

ពាក្យគន្លឹះ