សុខភាព - អប់រំ អប់រំ

09/06/2025 - 15:14

ចិញ្ចឹមក្ដីស្រមៃជូនសិស្សក្រីក្រទៅកាន់សាលារៀន

គម្រោង “រួមដំណើរជាមួយប្អូនទៅសាលារៀន” របស់នគរបាលខេត្តបាកលីវ បានរីកសាយភាយយ៉ាងទូលំទូលាយ រួមចំណែកក្នុងការថែទាំ ឧបត្ថម្ភសិស្សក្រីក្រសង្វាតរៀនសូត្រ បានទៅកាន់សាលារៀន។

សាខាសម្ព័ន្ធយុវជនផ្នែកសន្ដិសុខសើុបអង្កេតនៃនគរបាលខេត្តបាកលីវ រួមជាមួយនឹង
សប្បុរសជនទៅប្រគល់ប្រាក់ឧបត្ថម្ភដល់ប្អូនហ្វិញថាញខា។

កន្លងរយៈពេល ៧ ឆ្នាំអនុវត្តគម្រោង “រួមដំណើរជាមួយប្អូនទៅសាលារៀន” គណៈកម្មការយុវជននគរបាលខេត្តបាកលីវ រួមជាមួយនឹងសម្ព័ន្ធយុវជននៅតាមមូលដ្ឋាន បានទទួលគាំពារកុមារជាង ២០ នាក់ សរុបទឹកប្រាក់ឧបត្ថម្ភ រៀងរាល់ខែជាង ១១ លានដុង។ ចលនាសាងសង់ផ្ទះបាន ២ ខ្នង សួនលេងកម្សាន្តសម្រាប់កុមារ២កន្លែង; ជូនអាហារូបករណ៍ជាង ២០០ ចំណែក អំណោយ១.០០០ ចំណែក សៀវភៅសរសេរ ១០.០០០ ក្បាល កង់ ២០ គ្រឿង ។ល។ ដល់សិស្សដែលមានស្ថានភាពលំបាក សរុបថវិកាជាង ៦០០ លានដុង។ ឆ្លងតាមរយៈនោះ បានជួយទាន់ពេលដល់ប្អូនៗជម្នះការលំបាកបន្ដិចម្ដងៗ ខិតខំឈានឡើងក្នុងជីវភាពនិងសម្រេចបានស្នាដៃខ្ពស់ក្នុងការរៀនសូត្រ។ អនុសេនីយ៍ឯកបម្រុង ត្រឿងធីហាញង៉ូង ប្រធានគណៈកម្មការយុវជននៃនគរបាលខេត្តបាកលីវ ឱ្យដឹង៖ “គម្រោង “រួមដំណើរជាមួយប្អូនទៅសាលារៀន” បានលើកទឹកចិត្ត ឧបត្ថម្ភសិស្សក្រីក្រសង្វាតរៀនសូត្រ បានទៅកាន់សាលារៀន។ បច្ចុប្បន្ន គណៈកម្មការយុវជននគរបាលខេត្តនឹងបន្តពិនិត្យ ដើម្បីក្ដាប់បន្ថែមសិស្សណាដែលមានស្ថានភាពលំបាក។ ទន្ទឹមនឹងនោះ អំពាវនាវនិងចលនាសប្បុរសជនព្រួតដៃជំនួយឧបត្ថម្ភប្អូនៗបន្តការសិក្សានិងមានអនាគតភ្លឺស្វាង”។

សាខាសម្ព័ន្ធយុវជនផ្នែកសន្ដិសុខសេដ្ឋកិច្ច សហការជាមួយនឹងសប្បុរសជនជូនអាហារូបករណ៍
ដល់សិស្សដែលមានស្ថានភាពលំបាក។

ចាប់ពីដើមឆ្នាំ ២០២៥ មកទល់បច្ចុប្បន្ន គណៈកម្មការយុវជននគរបាលខេត្តបាកលីវ បានប្រគល់ជូនផ្ទះមេត្តាធម៌ ១ ខ្នង សួនលេងកម្សាន្តសម្រាប់កុមារ ១ កន្លែង អាហារូបករណ៍ដល់សិស្សដែលមានស្ថានភាពលំបាកជាង ៧០ ចំណែក សរុបថវិកាជាង ១៥០ លានដុង។ ឆ្លងតាមរយៈនោះ បានពង្រីកការទទួលខុសត្រូវជាមួយសង្គម តួនាទីឈានមុខ ស្ម័គ្រចិត្តរបស់សមាជិកសម្ព័ន្ធយុវជននគរបាលខេត្ត ក្នុងការជួយកុមារនិងក្មេងជំទង់ដែលមានស្ថានភាពលំបាកកែលម្អជីវភាព បានទៅកាន់សាលារៀនសូត្រ លេងកម្សាន្តមានប្រយោជន៍ និងកាត់បន្ថយហានិភ័យកុមារបោះបង់ការរៀនសូត្រនិងល្មើសច្បាប់។ ប្អូនហ្វិញថាញខា សិស្សរៀនថ្នាក់ទី ៨ សាលាអនុវិទ្យាល័យហ្វាប៊ិញ កំព្រាម្ដាយ រៀងរាល់ថ្ងៃបន្ទាប់ពីរៀន ប្អូនខាទៅលក់ឆ្នោតដើម្បីរកប្រាក់សម្រាប់ចំណាយលើការរស់នៅនិងការសិក្សា។ ឃើញដូច្នោះ សាខាសម្ព័ន្ធយុវជនផ្នែកសន្ដិសុខសើុបអង្កេតនគរបាលខេត្តបាកលីវ បានទទួលគាំពារនិងជំនួយប្អូនហ្វិញថាញខា ចំនួនទឹកប្រាក់ ៥០០.០០០ ដុង/ខែ។ ប្អូនហ្វិញថាញខា ឱ្យដឹង៖ “បានការឧបត្ថម្ភពីពូមីងនគរបាល ក្មួយត្រេកអរខ្លាំងណាស់ ពីព្រោះក្មួយមានឱកាសទៅរៀនបន្ត ដើម្បីអនាគតក្លាយជាមនុស្សមានប្រយោជន៍ដល់សង្គម។ ក្រៅពីការឧបត្ថម្ភរៀងរាល់ខែ ពូមីងនគរបាលថែមទាំងជូនសម្លៀកបំពាក់ សៀវភៅពុម្ព សៀវភៅសរសេរជាដើម ជួយគ្រួសារក្មួយសម្រាលពីការលំបាកក្នុងការរស់នៅនិងជួយឱ្យក្មួយកាន់តែមានទំនុកចិត្តនិងមានជំហានរឹងប៉ឹងទៅកាន់សាលារៀន”។

គម្រោង “រួមដំណើរជាមួយប្អូនទៅសាលារៀន” បង្ហាញនូវស្មារតីទទួលខុសត្រូវ រួមជាមួយសហគមន៍ រួមកម្លាំងកាយចិត្តចិញ្ចឹមក្ដីស្រមៃជូនសិស្សដែលមានស្ថានភាពលំបាកបានទៅកាន់សាលារៀន ស្របទៅនឹងគោលលំនាំ “មិនទុកឱ្យកុមារណាម្នាក់នៅខាងក្រោយ” របស់នគរបាលខេត្តបាកលីវ៕

យ្វីអាញ - ត្រុងធឹក - ប្រែសម្រួល៖ ថាច់ធី

ចែករំលែកអត្ថបទ

ពាក្យគន្លឹះ