មហាសាមគ្គីជនជាតិ គំរូក្នុងសហគមន៍

13/01/2025 - 16:02

កសិករខ្មែរជាមួយនឹងឆន្ទៈចាកភាពក្រីក្រ

ដោយឆន្ទៈនិងការខិតខំប្រឹងប្រែងជម្នះការលំបាក បងយឿងឡាញ់ នៅភូមិតាមសុកC២ ឃុំមីទ្វឹង ស្រុកមីទូ ខេត្តសុកត្រាំង បានជ្រើសរើសទម្រង់សមស្របនឹងលក្ខណៈសេដ្ឋកិច្ច ជាជំហានៗចាកផុតពីភាពក្រីក្រ អភិវឌ្ឍសេដ្ឋកិច្ចដោយចីរភាព។

បងយឿងឡាញ់ ជាមួយនឹងស្រូវកំពុងចេញផ្លែ។

បងយឿងឡាញ់ កំពុងថែទាំដំណាំស្ពៃក្ដោប។

មុននេះ បងយឿងឡាញ់ រស់នៅដោយប្រកបការងារស៊ីឈ្នួល។ ធ្លាប់ធ្វើការនៅឃុំដាយតឹម ឃើញមាមីងខ្មែរនៅទីនេះមានជីវភាពលំនឹងដោយការដាំដំណាំរួមផ្សំ បងឡាញ់ក៏រៀនពីបច្ចេកទេសដាំដុះដែរ។ អស់រយៈពេល ៣ ឆ្នាំ ធ្វើការឈ្នួល បងឡាញ់សន្សំបានទុនមួយចំនួន គាត់ក៏សម្រេចចិត្តជួលដី ២ កុងនៅក្បែរមាត់ប្រឡាយសម្រាប់ដាំដំណាំរួមផ្សំនិងសង់ខ្ទមស្លឹកតូចមួយសម្រាប់រស់នៅ។ បងឡាញ់ ឱ្យដឹង៖ “អាស្រ័យបានរៀនពីបច្ចេកទេស ទើបខ្ញុំមិនអល់អែកក្នុងការដាំម្ទេស ស្ពៃផ្កា និងឪឡឹក។ល។ រកបានប្រាក់ចំណូលខួបឆ្នាំ។ ពិសេស ដាំម្ទេសក្នុងរដូវវស្សាលក់បានថ្លៃចំណេញច្រើន ប៉ុន្តែបើមិនដឹងពីបច្ចេកទេសដាំម្ទេសនឹងងាយកើតជំងឺរលួយផ្លែ។ បច្ចុប្បន្ន ខ្ញុំដាំម្ទេស ១ កុងរំលង ៣ ថ្ងៃប្រមូលផលម្តងបានផ្លែជាង ៤០ គីឡូក្រាម លក់ក្នុងតម្លៃ ៤០.០០០ ដុង/គីឡូក្រាម។ ដាំម្ទេសក្នុងរដូវវស្សា ខ្ញុំឧស្សាហ៍បាញ់ថ្នាំបំប៉ន បង្ការជំងឺរទុះនិងបាចជី NPK សមល្មម បានជាផ្លែម្ទេសនិងដើមម្ទេសមិនសូវកើតជំងឺ កាត់បន្ថយប្រើប្រាស់ជី URE”។ តាមសម្ដីបងឡាញ់ ដាំដំណាំរួមផ្សំ ហត់នឿយក៏ពិតមែន ដ្បិតអីចំណាយកម្លាំងថែទាំច្រើន ប៉ុន្តែប្ដូរមកវិញរកបានប្រាក់ចំណេញច្រើនបង្គួរ។ បច្ចុប្បន្ន ខ្ញុំដាំស្ពៃក្ដោបនិងស្ពៃផ្កា ១ កុង ដំណាំលូតលាស់បានជាង ១ ខែមកហើយ នឹងប្រមូលផលក្នុងឱកាសបុណ្យចូលឆ្នាំថ្មីវៀតណាម។ បងឡាញ់ ឱ្យដឹងបន្ថែម៖ “ឆ្នាំនេះ ស្ពៃក្ដោបសម្រេចទិន្នផលនិងលក់បានតម្លៃល្អ ម្ល៉ោះហើយរកបានប្រាក់ចំណេញបង្គួរ។ ស្ពៃក្ដោប ងាយស្រួលដាំ ស្រោចទឹកត្រឹម ២ ដងក្នុងមួយថ្ងៃ ដាំចន្លោះពីគ្នាប្រហែល ៦០ សង់ទីម៉ែត្រ បាចជី បាញ់ថ្នាំកម្ចាត់ដង្កូវត្រូវតាមបរិមាណ ត្រូវពេលវេលា ទើបលូតលាស់ល្អ។ មួយថ្ងៃៗខ្ញុំនៅចម្ការថែទាំស្ពៃក្ដោប ដកស្មៅ ចាប់ដង្កូវ ស្រោចទឹក។ល។ តាមដានជាប្រចាំ ម្ល៉ោះហើយស្ពៃក្ដោប តែងផ្ដល់ទិន្នផល លក់បានថ្លៃ ចំណេញច្រើន។ ឆ្នាំ ២០២៣ ខ្ញុំប្រមូលផលស្ពៃក្ដោប ១ កុងចំណេញជាង ២០ លានដុង គិតមធ្យមភាគស្ពៃក្ដោបមួយទម្ងន់ពី ២-៣ គីឡូក្រាមលក់ក្នុងតម្លៃជាង ៥.០០០ ដុង/គីឡូក្រាម អាស្រ័យដូច្នោះ ទើបជីវភាពខ្ញុំបានធូរធារ”។

ការដាំដំណាំរួមផ្សំទទួលបានចំណេញ បងឡាញ់ បានជួលដី ៥ កុងផលិតពូជស្រូវ ST និងអនុវត្តវិទ្យាសាស្រ្តបច្ចេកទេសក្នុងផលិតកម្ម ម្ល៉ោះហើយសម្រេចទិន្នផល គុណភាពនិងចំណេញខ្ពស់បង្គួរ។ ក្រោយពីរយៈពេល ១៥ ឆ្នាំដាំដំណាំ ផលិតស្រូវ បងឡាញ់ សន្សែសន្សំបានទុនមួយចំនួនសង់បានផ្ទះតម្លៃជាង ៥០០ លានដុង។ បងឡាញ់ ឱ្យដឹង៖ “ខ្ញុំមិនដែលគិតថា ខ្ញុំអាចសង់បានផ្ទះសមរម្យបែបនេះនោះទេ។ មានផ្ទះ ប្ដីប្រពន្ធខ្ញុំកាន់តែមានកម្លាំងចិត្តដាំដំណាំ និងប្រឹងប្រែងសន្សែសន្សំទិញដីស្រែផលិតកម្ម ដើម្បីធ្វើឱ្យជីវភាពកាន់តែល្អប្រសើរ”៕

លីធាន - ថាច់ធី

ចែករំលែកអត្ថបទ

ពាក្យគន្លឹះ