គោលនយោបាយ -ការរស់នៅ គោលនយោបាយ

04/11/2024 - 15:07

បង្កលក្ខណសម្បត្តិដើម្បីជនរួមជាតិខ្មែរអភិវឌ្ឍសេដ្ឋកិច្ច

ស្រុកចូវថាញ់ ខេត្តសុកត្រាំង បានផ្សព្វផ្សាយអនុវត្តល្អនូវកម្មវិធីទិសដៅជាតិអភិវឌ្ឍសេដ្ឋកិច្ច- សង្គម នៅតំបន់ជនជាតិភាគតិចនិងតំបន់ភ្នំ ដំណាក់កាល ២០២១-២០២៥ (ហៅកាត់ថា កម្មវិធី)។ តាមរយៈនោះ បានបង្កលក្ខណសម្បត្តិដើម្បីជនរួមជាតិខ្មែរអភិវឌ្ឍសេដ្ឋកិច្ច និងកសាងតំបន់ជនបទកាន់តែសម្បូរសប្បាយនិងស្រស់ស្អាត។

បងស្រីឡឹមធីហៀង ចិញ្ចឹមសត្វនិងដាំដំណាំ ដើម្បីបង្កើនប្រាក់ចំណូល។

យោងតាមគណៈកម្មាធិការប្រជាជនស្រុកចូវថាញ់ ក្នុងឆ្នាំ២០២៤ កម្មវិធីបានបែងចែកប្រភពទុនជាង១០,៧ពាន់លានដុង។ ផ្តើមពីប្រភពទុននេះ ស្រុកបានវិនិយោគទៅលើការកសាងសំណង់ផ្លូវជនបទចំនួន២ខ្សែ; ជួសជុលនិងថែរក្សាសំណង់ហេដ្ឋារចនាសម្ព័ន្ធចំនួន១៣; ឧបត្ថម្ភសង់លំនៅឋានជូន៦៦គ្រួសារ និងប្តូរមុខរបរជូន៣០គ្រួសារ ឧបត្ថម្ភទឹកស្អាតប្រើប្រាស់ស្របអនាម័យជូន២៦គ្រួសារ; ឧបត្ថម្ភដល់គ្រួសារក្រីក្រ និងគ្រួសារប្រកៀកបន្ទាត់ក្រ៣៣គ្រួសារ ចូលរួមទម្រង់ចិញ្ចឹមគោបន្តពូជ។ លើសពីនេះ ស្រុកក៏បានរៀបចំវគ្គបណ្តុះបណ្តាលវិជ្ជាជីវៈដល់កម្មករខ្មែរ២៣៤នាក់។ល។ អាស្រ័យហេតុនេះ ជនរួមជាតិខ្មែរមានផ្ទះសម្បែងរស់នៅលំនឹង មានលក្ខណសម្បត្តិអភិវឌ្ឍសេដ្ឋកិច្ចនិងលំនឹងជីវភាព។

ផ្លូវគមនាគមន៍ជនបទនៅតំបន់ជនរួមជាតិខ្មែរ។

បងស្រី គឹមធីយៀង នៅភូមិតាឃ្វិច B ឃុំធ្វឹងហ្វា បានឱ្យដឹង៖ “អាស្រ័យមានកម្មវិធីវិនិយោគ ទើបខ្ញុំមានផ្ទះសមរម្យសម្រាប់រស់នៅ។ រដ្ឋអំណាចភូមិភាគបានឧបត្ថម្ភគោ២ក្បាលនិងឱ្យបុលដើមទុនអនុគ្រោះ ម្ល៉ោះហើយ ខ្ញុំមានប្រាក់ប្រកបរបររកស៊ី។ ខ្ញុំឆ្លៀតយកដីតាមមាត់ប្រឡាយដើម្បីដាំដំណាំនិងដាំស្មៅចិញ្ចឹមគោ។ ឥឡូវនេះ ដំណាំលក់បានប្រាក់ចំណូលប្រចាំថ្ងៃ ចំណែកគោក៏ធំធាត់ល្អដែរ។ ប្ដីខ្ញុំធ្វើជាងសំណង់ ឯកូនខ្ញុំធ្វើកម្មករក្រុមហ៊ុនជលផល ក៏រកបានប្រាក់ចំណូល ជីវភាពគ្រួសារខ្ញុំបានលំនឹងជាបណ្ដើរៗ។ បងស្រី ឡឹមធីហៀង នៅឃុំភូតឹង បានឱ្យដឹង៖ “អាស្រ័យមានកម្មវិធីជំនួយសង់លំនៅឋាន ទើបខ្ញុំសង់បានផ្ទះសម្បែងសមរម្យសម្រាប់រស់នៅ និងបានបុលប្រាក់ពីធនាគារគោលនយោបាយសង្គម ខ្ញុំវិនិយោគលើការចិញ្ចឹមគោនិងដាំដំណាំ។ ចំណែកកូនស្រីបានរៀនរបរកាត់ដេរដោយឥតគិតថ្លៃ ហើយបានសមាគមនារីឧទ្ទេសនាមការងារនៅក្នុងក្រុមហ៊ុន រកបានប្រាក់ចំណូលលំនឹង។ ឥឡូវនេះ ខ្ញុំរកបានប្រាក់ចំណូលពីការចិញ្ចឹមសត្វនិងដាំដំណាំ ទើបជីវភាពគ្រួសារកាន់តែល្អប្រសើរឡើង”។

លោកង្វៀងវ៉ាន់មី អនុប្រធានគណៈកម្មាធិការប្រជាជនស្រុកចូវថាញ់ មានប្រសាសន៍៖ “កម្មវិធីផ្ដល់ផលជាវិជ្ជមានដល់ការអភិវឌ្ឍសេដ្ឋកិច្ច-សង្គមនៅតំបន់ជនរួមជាតិខ្មែរ។ ផ្តើមពីនោះ អត្រាគ្រួសារក្រីក្របានថយចុះជាលំដាប់ ហើយអត្រាគ្រួសារអ្នកគ្រាន់បើ ធូរធារក៏កើនឡើង។ ស្រុកនឹងផ្តុំកម្លាំងរំសាយដើមទុនដែលនៅសេសសល់ ដើម្បីជួយប្រជាជនខ្មែរអភិវឌ្ឍសេដ្ឋកិច្ច ក៏ដូចជាវិនិយោគធ្វើឱ្យសុក្រឹតហេដ្ឋារចនាសម្ព័ន្ធនៅតំបន់ជនបទ”៕

យ៉ីអាញ - សុផន

ចែករំលែកអត្ថបទ

ពាក្យគន្លឹះ