គោលនយោបាយ -ការរស់នៅ គោលនយោបាយ

02/10/2023 - 17:32

សមាគមមិត្តភាពវៀតណាម - កម្ពុជាក្រុងកឹងធើ

រួមចំណែកបង្កើនចំណងសាមគ្គីភាព មិត្តភាពវៀតណាម - កម្ពុជា

លោកង្វៀងវ៉ាន់កឹង ប្រធានសមាគមមិត្តភាពវៀតណាម - កម្ពុជាក្រុងកឹងធើ។

ចាប់តាំងពីបង្កើត (ឆ្នាំ១៩៩៥) មកដល់ពេលនេះ ពិសេសចាប់ពីពេលដែលក្រុងកឹងធើចំណុះមជ្ឈិម សមាគមមិត្តភាពវៀតណាម-កម្ពុជាក្រុងកឹងធើ មានការចូលរួមយ៉ាងសកម្មជាច្រើន រួមចំណែកបង្កើនចំណងសាមគ្គីភាព មិត្តភាពវៀតណាម-កម្ពុជា។

ដោះដូរជាមួយកាសែតកឹងធើ - ភាសាខ្មែរលោកង្វៀងវ៉ាន់កឹង ប្រធានសមាគម មិត្តភាពវៀតណាម-កម្ពុជាក្រុងកឹងធើ ឱ្យដឹង៖

- សមាគមមិត្តភាពវៀតណាម-កម្ពុជាក្រុងកឹងធើ តែងបញ្ជ្រាបនូវគោលលំនាំ “ម្ចាស់ការ វាងវៃ ច្នៃប្រតិដ្ឋ ប្រសិទ្ធភាព” អនុវត្តល្អរាល់ភារកិច្ចដែលប្រគល់ឱ្យ រួមចំណែកអភិវឌ្ឍទំនាក់ទំនងសហប្រតិបត្តិការមិត្តភាពវៀតណាម-កម្ពុជានិយាយរួម និងបង្កើនមនោសញ្ចេតនា មិត្តភាពជិតស្និទ្ធរវាងប្រជាជននៃប្រទេសទាំង ២និយាយដោយឡែក។ យោងលើមូលដ្ឋានស្រាវជ្រាវ ក្តាប់ច្បាស់នូវខ្លឹមសារនៃកិច្ចសហប្រតិបត្តិការក្នុងទំនាក់ទំនងរវាងប្រទេសទាំង២ សមាគមបានផ្សព្វផ្សាយអនុវត្តនូវសកម្មភាពកិច្ចការបរទេសប្រជាជនដោយរូបភាពជាច្រើន និងមានខ្លឹមសារយ៉ាងសម្បូរបែប ដែលមានអត្ថន័យនយោបាយសង្គមដ៏ជ្រាលជ្រៅ។

* លោកអាចលើកឡើងទ្រួសៗពីសកម្មភាពគំរូមួយចំនួនរបស់សមាគមរយៈកន្លង ជម្រាបប្រសាសន៍លោក?

ឈុតសិល្បៈក្នុងពិធីបើកសប្តាហ៍វប្បធម៌កម្ពុជានៅវៀតណាម ត្រូវបានរៀបចំឡើងនៅក្រុងកឹងធើ កាលពីខែវិច្ឆិកា ឆ្នាំ២០១៩។ រូបថត៖ ថាញឡុង

- សមាគមបានរៀបចំពិធីខួបអនុស្សាវរីយ៍ ពិធីជួបជុំ សំណេះសំណាល ទំនាក់ទំនងនាឱកាសថ្ងៃបុណ្យផ្សេងៗ ព្រឹត្តិការណ៍សំខាន់ៗ នៃប្រទេសទាំង២។ តួយ៉ាងដូច ឱកាសបុណ្យចូលឆ្នាំថ្មីប្រពៃណីជនជាតិខ្មែររៀងរាល់ឆ្នាំ សមាគមបានរៀបចំពិធីជួបជុំមិត្តភាពសមាជិកជាជនរួមជាតិខ្មែរ និងនិស្សិតកម្ពុជាដែលកំពុងរៀនសូត្រនៅក្រុងកឹងធើ; រៀបចំក្រុមការងារទៅសួរសុខទុក្ខ ប្រសិទ្ធពរបុណ្យចូលឆ្នាំថ្មីដល់អគ្គស្ថានកុងស៊ុលព្រះរាជាណាចក្រកម្ពុជាប្រចាំក្រុងហូជីមិញ ព្រមទាំងព្រះឧបជ្ឈាយ៍ ព្រះតេជព្រះគុណនៅតាមវត្តនានាលើភូមិសាស្ត្រក្រុងកឹងធើ៘ សាខាសមាគមមូលដ្ឋាននានា ជានិច្ចកាលផ្តល់ព័ត៌មានពីសកម្មភាព មិត្តភាពនិងសហប្រតិបត្តិការរវាងប្រទេសទាំង២។ ផ្តើមពីនោះ ក្រើនរំលឹកដល់សមាជិកអភិរក្ស ពង្រីកប្រវេណីមិត្តភាព សហប្រតិបត្តិការនៃរដ្ឋាភិបាល និងប្រជាជនប្រទេសទាំង២; ចលនាឧបត្ថម្ភ សមាជិកក្រីក្រ ដែលមានការលំបាកពីលំនៅឋាន និងការងារធ្វើ។ ម្យ៉ាងទៀត សមាគមជំរុញការឃោសនា ចលនា ផ្សព្វផ្សាយពីរូបភាព និងឧទ្ទេសនាមដល់ប្រជាជននៃប្រទេសទាំង២ វៀតណាម-កម្ពុជា ពីប្រវត្តិសាស្ត្រ វប្បធម៌ប្រទេសជាតិ មនុស្សជាតិ ពីកិច្ចការកសាងនិងអភិវឌ្ឍនៃប្រទេសនីមួយៗ សំដៅជំរុញសកម្មភាពមិត្តភាពសហប្រតិបត្តិការ ទំនាក់ទំនងវប្បធម៌ សេដ្ឋកិច្ច វិទ្យាសាស្ត្របចេ្ចកទេស៘

* រយៈពេលខាងមុខ តើសមាគមមានសកម្មភាពអ្វីខ្លះ ដើម្បីបន្តរួមចំណែកបង្កើនចំណងសាមគ្គី ភាពមិត្តភាពវៀតណាម-កម្ពុជា ជម្រាបប្រសាសន៍លោក?

- សមាគមនឹងរៀបចំចលនា ទាក់ទាញអង្គការ បុគ្គលជាជនជាតិវៀតណាម រាប់ទាំងជនជាតិវៀតណាមនៅកម្ពុជា និងជនជាតិកម្ពុជា មានដំណាក់កាលសហប្រតិបត្តិការជាមួយវៀតណាម ចូលរួមនូវសកម្មភាពមិត្តភាព សាមគ្គីភាព។ ជាពិសេស សមាគមបន្តការរៀបចំឃោសនា ផ្សព្វផ្សាយពីគោលការណ៍របស់បក្ស គោលនយោបាយ ច្បាប់របស់រដ្ឋ ស្តីពីសកម្មភាពទំនាក់ទំនងការបរទេសប្រជាជន; ជំរុញសកម្មភាពឃោសនា ចលនា ផ្សព្វផ្សាយរូបភាពនិងឧទ្ទេសនាមដល់ប្រជាជននៃប្រទេសទាំង២ វៀតណាម- កម្ពុជា ពីប្រវត្តិសាស្ត្រ វប្បធម៌ ប្រទេសជាតិ មនុស្សជាតិ ពីកិច្ចការកសាងនិងអភិវឌ្ឍនៃប្រទេសនីមួយៗ សំដៅជំរុញនូវសកម្មភាពមិត្តភាព សហប្រតិបត្តិការ ដោះដូរវប្បធម៌ សេដ្ឋកិច្ច វិទ្យាសាស្ត្របច្ចេកទេស រវាងប្រជាជននៃប្រទេសទាំង២។ ទន្ទឹមនឹងនោះ ចលនាបង្កើតបន្ថែមសាខាសមាគមកងទ័ពស្ម័គ្រចិត្តវៀតណាមនៅយោធភូមិភាគ៩ និងសាខាសមាគមនាយកដ្ឋានការងារជនជាតិភូមិភាគ។

ទន្ទឹមនឹងនោះ សមាគមបង្កើននូវសកម្មភាព អភិវឌ្ឍទាំងវិសាលភាព និងទាំងការស៊ីជម្រៅពីចំណងសាមគ្គីភាព មិត្តភាពរវាងប្រជាជនវៀតណាមនិងប្រជាជនកម្ពុជា។ សមាគមនឹងសកម្មផ្សព្វផ្សាយ ទាក់ទាញវិនិយោគ ទេសចរណ៍ពីកម្ពុជាចូលមកក្រុងកឹងធើ; ម្ចាស់ការចាប់យកឱកាស បង្កើតទំនាក់ទំនងដៃគូ សហប្រតិបត្តិការជាមួយអាជីវកម្មពីកម្ពុជា ជាពិសេសទៀត គឺបង្កើតក្លឹបអាជីវកម្មវៀតណាម-កម្ពុជា នៅក្រុងកឹងធើ រួមចំណែកបង្កើនទំនាក់ទំនងពាណិជ្ជកម្មរវាងអាជីវកម្មកម្ពុជានិងអាជីវកម្មក្រុងកឹងធើ៕

*សូមអរគុណលោក!

ថាញឡុង (អនុវត្ត)- ប្រែសម្រួល៖ លីសៀ

ចែករំលែកអត្ថបទ

ពាក្យគន្លឹះ