មហាសាមគ្គីជនជាតិ គំរូក្នុងសហគមន៍

15/05/2023 - 15:01

ព្រះតេជព្រះគុណ គឹមហ៊ឺវង៉ី រៀនសូត្រតាមអ៊ំដោយឥតឈប់ឈរ

រយៈពេលជាង ១៤ ឆ្នាំ សាងផ្នួសបួសរៀន ព្រះតេជព្រះគុណគឹមហ៊ឺវង៉ី ព្រះចៅអធិការវត្តចុងព្រៃ ឃុំភឿកហ៊ឹង ស្រុកថ្កូវ ខេត្តត្រាវិញ តែងអស់ពីព្រះទ័យដើម្បីសាសនា និងសង្គម។ មិនត្រឹមតែគិតគូរបានល្អការរៀនសូត្ររបស់ព្រះសង្ឃ កូនចៅជនជាតិខ្មែរ ជួយគ្រួសារក្រីក្រជាច្រើនឆ្លងកាត់ការលំបាកក្នុងជីវភាពប៉ុណ្ណោះទេ សូម្បីព្រះអង្គផ្ទាល់ក៏រៀនសូត្រនិងធ្វើតាមសតិអារម្មណ៍ សីលធម៌ ឥរិយាបថ ហូជីមិញ ដោយឥតឈប់ឈរផងដែរ។

ព្រះតេជព្រះគុណ គឹមហ៊ឺវង៉ី កំពុងពិភាក្សាយោបល់ជាមួយគណៈកម្មការវត្តចុងព្រៃ
និងថ្នាក់ដឹកនាំឃុំភឿកហ៊ឹង។

ក៏ដូចជាយុវជនជនជាតិខ្មែរឯទៀតដែរ ឆ្នាំ ២០០៩ គឹមហ៊ឺវង៉ី ត្រូវបានឪពុកម្តាយបញ្ជូនទៅវត្តចុងព្រៃសាងផ្នួសបួសរៀន។ ក្នុងរយៈពេលបួសរៀន ព្រះតេជព្រះគុណគឹមហ៊ឺវង៉ី ព្យាយាមរៀនសូត្រធម៌អាថ៌វិន័យ រៀនអក្សរសាស្ត្ររួមជាមួយព្រះសង្ឃនិងគណៈកម្មការវត្ត គិតគូរកសាងវត្តអារាម ឃោសនាចលនាមាមីង អនុវត្តល្អគោលការណ៍ គោលនយោបាយរបស់បក្ស ច្បាប់របស់រដ្ឋ។ ឆ្នាំ ២០១៧ ព្រះអង្គបានគណៈកម្មការវត្តនិងពុទ្ធបរិស័ទទំនុកចិត្តតែងតាំងធ្វើជាព្រះចៅអធិការវត្តចុងព្រៃ រហូតមកដល់សព្វថ្ងៃ។

ក្នុងតំណែងជាព្រះចៅអធិការវត្ត ព្រះតេជព្រះគុណគឹមហ៊ឺវង៉ី បានឃោសនាចលនាមាមីងពុទ្ធបរិស័ទកសាងឧបដ្ឋានសាលា ក្លោងទ្វារជួសជុលព្រះវិហារនិងឈាបនដ្ឋាន៘ ក្រៅពីនេះ ព្រះអង្គថែមទាំងចលនាសប្បុរសជនក្នុងនិងក្រៅខេត្ត កសាងផ្លូវបេតុងប្រវែង ៥០០ ម៉ែត្រ ជូនអំណោយដល់អ្នកក្រ សិស្សក្រីក្រសង្វាតរៀនសូត្រ។ ថ្មី្មៗនេះ ព្រះតេជព្រះគុណគឹមហ៊ឺវង៉ី បានផ្តល់ជូនផ្ទះមហាសាមគ្គីមួយខ្នងឱ្យគ្រួសារ ពូគឹមថាញ់ស្វឹង ជាគ្រួសារក្រីក្រនៅភូមិត្រាម តម្លៃ ១៥០លានដុង។ ព្រះតេជព្រះគុណ គឹមហ៊ឺវង៉ី មានថេរដីកា៖ “ចំពោះអាត្មាភាព ការធ្វើប្រយោជន៍ដល់សង្គម ជួយមាមីងពុទ្ធបរិស័ទរស់នៅមានសេចក្តីសុខគឺជាកិច្ចធុរៈរបស់អ្នកបួស ហើយក៏ជាភារកិច្ចរបស់អាត្មាភាពចំពោះភូមិស្រុកផងដែរ។ ក្នុងរយៈពេលខាងមុខ អាត្មាភាពបន្តការពង្រីកនូវស្នាដៃដែលសម្រេចបានដើម្បីរក្សាចលនា “រៀនសូត្រនិងធ្វើតាមឧត្តមគតិ សីលធម៌ ឥរិយាបថហូជីមិញថែមទៀត”។

លោកលីវ៉ាន់ហ្វា ប្រធានរណសិរ្សមាតុភូមិវៀតណាមឃុំភឿកហ៊ឹង ឱ្យដឹង៖ “ ព្រះតេជព្រះគុណគឹមហ៊ឺវង៉ី គឺជាអង្គគំរូក្នុងចំណោមគំរូឆ្នើម រួមចំណែកកសាងធ្លុងមហាសាមគ្គីទូទាំងជនជាតិ។ ជាពិសេស ព្រះអង្គតែងសកម្មចូលរួមកសាងឃុំវប្បធម៌-ជនបទថ្មី ផ្សារភ្ជាប់នឹងកសាងផ្លូវគមនាគមន៍ជនបទផង”៕

សើុងម៉ាល័យ-លីសៀ

ចែករំលែកអត្ថបទ

ពាក្យគន្លឹះ