សុខភាព - អប់រំ អប់រំ

27/02/2023 - 16:42

រួមចំណែកអភិវឌ្ឍវិស័យអប់រំ

រយៈពេលច្រើនឆ្នាំកន្លង សមាគមជំរុញការសិក្សាខេត្តសុកត្រាំង បានជំនួយសិស្ស និស្សិតក្រីក្រសង្វាតរៀនសូត្ររាប់សិបពាន់នាក់ រួមចំណែកលើកកម្ពស់ប្រជាបញ្ញា បណ្ដុះបណ្ដាលប្រភពធនធានមនុស្ស ឆ្លើយតបតម្រូវការអភិវឌ្ឍសេដ្ឋកិច្ច-សង្គមរបស់ខេត្ត។

គ្រូបង្រៀនប្រជាជនឡឹមអែស ជូនអាហារូបករណ៍ដល់សិស្ស
និស្សិតដែលមានស្ថានភាពលំបាក។

ឆ្នាំ ២០២២ សមាគមជំរុញការសិក្សាគ្រប់លំដាប់ថ្នាក់របស់ខេត្ត បានរវាសរវៃ ធ្វើពិពិធកម្មទម្រង់ចលនាសប្បុរសជន ស្ថាប័ន អង្គភាពអាជីវកម្មទាំងក្នុងនិងក្រៅខេត្តបានទឹកប្រាក់ជាង ៦១,៦ ពាន់លានដុងសម្រាប់មូលនិធិ ជំរុញការសិក្សា ជំរុញបញ្ញា។ ឆ្លងតាមរយៈនោះ បានជូនអាហារូបករណ៍ជំរុញការសិក្សា ជំរុញបញ្ញាចំនួន ១០១.២៣៥ ចំណែកដល់សិស្ស និស្សិតជម្នះលំបាក សង្វាតរៀនសូត្រ; សិស្សសម្រេចបានស្នាដៃខ្ពស់ក្នុងសម័យប្រឡងជម្រើសសិស្សពូកែថ្នាក់ខេត្ត ថ្នាក់តំបន់ និងថ្នាក់ជាតិ; សិស្សប្រឡងសញ្ញាបត្រវិទ្យាល័យមានពិន្ទុខ្ពស់បំផុតទូទាំងខេត្ត; សិស្សជាកូនកម្មាភិបាល បុគ្គលិកដែលមានស្ថានភាពលំបាក ដោយសាររងផលប៉ះពាល់នៃជំងឺ COVID - ១៩ លើភូមិសាស្រ្តខេត្ត។ល។

រួមដំណើរជាមួយនឹងមូលនិធិអាហារូបករណ៍ “លឿងឌិញកួរ” តាំងពីឆ្នាំ ២០០៤ មកទល់បច្ចុប្បន្ន ក្រុមហ៊ុនចំកាត់សមាជិកមួយឆ្នោតជាតិសុកត្រាំង ធ្វើហិរញ្ញប្បទានជាង ៣៥ ពាន់លានដុងដើម្បីជំនួយដល់សិស្ស និស្សិតក្រីក្រ ឆ្លងកាត់ការលំបាករៀនសូត្របានល្អ។ លោក ឡេវ៉ាន់ខាញ ប្រធានក្រុមហ៊ុនចំកាត់សមាជិកមួយឆ្នោតជាតិសុកត្រាំង ឱ្យដឹង៖ “ក្រុមហ៊ុនតែងរួមដំណើរជាមួយនឹងមូលនិធិជំរុញការសិក្សាខេត្ត ដើម្បីចែករំលែកការលំបាក ជួយដល់សិស្ស និស្សិតក្រីក្រ សំខាន់គឺសិស្សជនជាតិខ្មែរ មានទំនុកចិត្ត ជំហររឹងមាំទៅកាន់សាលាដើម្បីបំពេញក្ដីស្រមៃ។ សង្ឃឹមថា ប្អូនៗនឹងព្យាយាមរៀនសូត្រ លត់ដំសីលធម៌ ដើម្បីក្លាយជាមនុស្សមានគុណសម្បត្តិនិងវិជ្ជាសម្បត្តិ បម្រើដល់ការអភិវឌ្ឍសេដ្ឋកិច្ច-សង្គមរបស់ខេត្តសុកត្រាំងនិយាយដោយឡែក ប្រទេសជាតិនិយាយរួម”។

ផ្ដើមពីអាហារូបករណ៍បានជំនួយ មានសិស្ស និស្សិតជាច្រើនដែលមានស្ថានភាពលំបាក បំពេញបានក្ដីស្រមៃ ជោគជ័យក្នុងដំណើររៀនមហាវិទ្យាល័យ។ ប្អូនតាភូតឹម គឺសិស្សខ្មែរក្រីក្រនៅឃុំទ្វឹងហឹង ស្រុកមីទូ បានទទួលអាហារូបករណ៍ ជួយឱ្យប្អូនឆ្លងកាត់ការលំបាក មានជំហររឹងមាំក្នុងដំណើររៀនមហាវិទ្យាល័យ។ បច្ចុប្បន្ន ប្អូនតឹម កំពុងសិក្សាឆ្នាំចុងក្រោយផ្នែកគរុកោសល្យអក្សរសាស្រ្ត។ ប្អូនតឹម ឱ្យដឹង៖ “ពេលប្អូនប្រឡងជាប់មហាវិទ្យល័យ ឪពុកម្តាយគ្មានលុយឱ្យរៀន គាត់ថាឱ្យខ្ញុំឈប់រៀនទៅធ្វើការនៅក្រុមហ៊ុន។ កាលនោះ ប្អូនបានទៅពឹងលោកគ្រូអ្នកគ្រូដើម្បីជួយ និងសុំបានអាហារូបករណ៍របស់សមាគមជំរុញការសិក្សាខេត្ត ២០ លានដុងសម្រាប់ត្រៀមលក្ខណៈ គិតគូរចូលរៀនមហាវិទ្យាល័យ។ ផ្ដើមពីនោះ ប្អូនប្ដេជ្ញាចិត្តរៀនសូត្រនិងឆ្លៀតឱកាសទៅបង្រៀនតាមផ្ទះ រកប្រាក់បន្ថែមសម្រាប់ចាយវាយក្នុងការរៀនសូត្រ។ អាហារូបករណ៍គឺជាកម្លាំងចលករ អំណោយស្មារតីយ៉ាងមានតម្លៃ ជួយដល់សិស្ស និស្សិតខ្មែរក្រីក្របំពេញក្ដីស្រមៃ”។

តាមប្រសាសន៍ លោកឡឹមសៅ អនុប្រធានសមាគមជំរុញការសិក្សាខេត្តសុកត្រាំង ជាមួយនឹងការគាំទ្ររបស់គណៈកម្មាធិការបក្ស រដ្ឋអំណាចភូមិភាគនិងក្រុមហ៊ុន អាជីវកម្ម សមាគមគ្រប់លំដាប់ថ្នាក់ក្នុងខេត្ត ក៏ចលនាបានមូលនិធិជំរុញការសិក្សា ជំរុញបញ្ញា កាន់តែកើនឡើងពីមួយថ្ងៃទៅមួយថ្ងៃ។ ផ្ដើមពីមូលនិធិនេះ បានជួយឧបត្ថម្ភទាន់ពេលដល់សិស្ស និស្សិត ដែលមានស្ថានភាពលំបាក គ្មានទីពឹង ពិការភាព រាប់សិបពាន់នាក់បានបន្តការសិក្សា៕

យ្វីអាញ-ថាច់ធី

ចែករំលែកអត្ថបទ

ពាក្យគន្លឹះ