មហាសាមគ្គីជនជាតិ គំរូក្នុងសហគមន៍

21/11/2022 - 13:56

អស់ពីចិត្តជាមួយបុព្វហេតុអប់រំ

លោកគ្រូ គឹមសុវណ្ណ គ្រូបង្រៀនវិញ្ញាសាភាសាខ្មែរ និងជាលេខាសម្ព័ន្ធយុវជនសាលាវិទ្យាល័យជនជាតិអន្តេវាសិកខេត្តត្រាវិញ។ លោកគ្រូ ជាគ្រូបង្រៀនដែលមានជំនាញល្អ និងជាលេខាសម័្ពន្ធយុវជនសកម្មក្នុងការងារ ជាគំរូលេចធ្លោ...។

លោកគ្រូសុវណ្ណ លេខាសម្ព័ន្ធយុវជននៃសាលាវិទ្យាល័យជនជាតិអន្តេវាសិកខេត្តត្រាវិញ។

ឆ្នាំ ២០២២ លោកគ្រូគឹមសុវណ្ណ បានជាប់ជម្រើសចូលបង្រៀននៅសាលាវិទ្យាល័យជនជាតិអន្តេវាសិកខេត្តត្រាវិញ ហើយត្រូវបានចាត់ឱ្យបង្រៀនវិញ្ញាសាភាសាខ្មែរ។ ដោយមានរបៀបធ្វើការប្រកបដោយវិទ្យាសាស្ត្រ រួសរាយរាក់ទាក់ ស្និទ្ធស្នាល លោកគ្រូគឹមសុវណ្ណ តែងបានមិត្តរួមអាជីពរាប់អាន សិស្សគោរពស្រឡាញ់ ព្រមទាំងបង្កបានទំនុកចិត្តខ្ពស់ក្នុងសមូហភាពគ្រូបង្រៀនរបស់សាលា។ ផ្តើមពីនោះ រាល់សកម្មភាពចលនារបស់សាលា កាន់តែមានភាពពុះពោរនិងទទួលបានលទ្ធផលខ្ពស់ៗជាច្រើនសម្រាប់សមូហភាពនិងបុគ្គល។ លោកគ្រូគឹមសុវណ្ណ ឱ្យដឹង៖ “ផ្សារភ្ជាប់ជាមួយនឹងអាជីពជាគ្រូបង្រៀន បានចែករំលែកចំណេះដឹងដល់សិស្សជំនាន់ក្រោយ គឺជាមោទនភាព ហើយផ្តល់កម្លាំងចិត្តឱ្យខ្ញុំរឹតតែខិតខំប្រឹងប្រែង និងតស៊ូដោយឥតឈប់ឈរ។ ខ្ញុំព្យាយាមសិក្សាបន្ថែមពីមិត្តភក្តិ ស្រាវជ្រាវតាមប្រព័ន្ធអុីនធឺណិត និងទៅសិក្សាបង្កើនជំនាញ ដើម្បីស្វែងរកវិធីសាស្ត្របង្រៀនវិញ្ញាសាភាសាខ្មែរឱ្យបានសមស្រប ជួយឱ្យសិស្សរៀនបានល្អ។ ដើម្បីរៀនភាសាខ្មែរបានល្អ ទី ១ គឺខ្ញុំហាត់ប្អូនៗអានឱ្យបានត្រឹមត្រូវ; ទី ២ ប្អូនៗក៏ត្រូវយកចិត្តទុកដាក់ស្រឡាញ់ចូលចិត្តវិញ្ញាសាភាសាខ្មែរដែលជាភាសាកំណើតផងដែរ”។

លោកគ្រូគឹមសុវណ្ណ កំពុងបង្រៀនវិញ្ញាសាភាសាខ្មែរដល់សិស្សថ្នាក់ទី ១២A២។

អាស្រ័យដោយលោកគ្រូសុវណ្ណ ឧស្សាហ៍ផ្លាស់ថ្មីវិធីសាស្ត្របង្រៀន ម៉្លោះហើយសិស្សចូលចិត្តរៀនវិញ្ញាសារបស់គាត់។ ប្អូនថាច់ថាញត្រឿង សិស្សថ្នាក់ទី ១២A ឱ្យដឹង៖ “លោកគ្រូគឹមសុវណ្ណ មានវិធីសាស្ត្របង្រៀនខុសប្លែកពីគ្រូៗដែលខ្ញុំធ្លាប់រៀន។ គាត់បង្រៀនមិនផ្អែកតាមសៀវភៅពុម្ពទាំងស្រុងនោះទេ គាត់អនុវត្តវិធានការផ្សេងៗជាច្រើន ដើម្បីពន្យល់ឱ្យយើងខ្ញុំងាយយល់។ លោកគ្រូបង្រៀនវេយ្យាករណ៍ ហាត់អាន ហាត់សរសេរ និងដាក់ឱ្យធ្វើមេរៀនលំហាត់នៅផ្ទះ។ ចាប់តាំងពីខ្ញុំបានចូលសិក្សានៅសាលាអន្តេវាសិក ហើយបានសិក្សាជាមួយនឹងលោកគ្រូសុវណ្ណ ខ្ញុំមានទំនុកចិត្តខ្ពស់និងកាន់តែចូលចិត្តរៀនវិញ្ញាសារបស់គាត់”។

លោកគ្រូ ហូជីយុង នាយករងសាលាវិទ្យាល័យជនជាតិអន្តេវាសិកខេត្តត្រាវិញ ឱ្យដឹង៖ “លោកគ្រូសុវណ្ណ ជាគ្រូបង្រៀនម្នាក់មានជំនាញល្អ និងជាលេខាសម្ព័ន្ធយុវជនសាលាវិទ្យាល័យជនជាតិអន្តេវាសិកខេត្តត្រាវិញ លោកគ្រូតែងសកម្មក្នុងការងារ ជាគូរំលេចធ្លោជាច្រើនឆ្នាំបន្តបន្ទាប់ តែងសម្រេចឆ្នើមភារកិច្ចប្រគល់ឱ្យ”៕

សឺនម៉ាល័យ-មុនី

ចែករំលែកអត្ថបទ

ពាក្យគន្លឹះ