ព្រឹត្តិការណ៍ - នយោបាយ ព្រឹត្តិការណ៍

27/06/2022 - 16:35

ខួបអនុស្សាវរីយ៍ ៥៥ ឆ្នាំ ទិវាបង្កើតទំនាក់ទំនងការទូតរវាងវៀតណាម-កម្ពុជា

សាកលវិទ្យាល័យកឹងធើ សហព័ន្ធអង្គការមិត្តភាពក្រុងកឹងធើ បានសហការជាមួយអគ្គកុងស៊ុលនៃព្រះរាជាណាចក្រកម្ពុជា សមាគមមិត្តភាពវៀតណាម-កម្ពុជា ប្រចាំនៅក្រុងកឹងធើ រួមនឹងមន្ទីរ គណៈ ផ្នែកដែលពាក់ព័ន្ធ ទើបចាត់តាំងយ៉ាងមហោឡារិកពិធីជួបជុំខួបអនុស្សាវរីយ៍ ៥៥ ឆ្នាំ ទិវាបង្កើតទំនាក់ទំនងការទូតរវាងវៀតណាម-កម្ពុជា (ថ្ងៃទី ២៤ មិថុនា ១៩៦៧- ថ្ងៃទី ២៤ មិថុនា ២០២២)។

ថ្នាក់ដឹកនាំក្រុងកឹងធើ ជូនបាច់ផ្កា និងវត្ថុអនុស្សាវរីយ៍ដល់លោក សុខ ដារ៉េត អគ្គកុងស៊ុលនៃព្រះរាជាណាចក្រកម្ពុជាប្រចាំនៅក្រុងហូជីមិញនិងភរិយា។

ថ្លែងក្នុងពិធីជួបជុំ លោកង្វៀងធឹកហៀង អនុប្រធានគណៈកម្មាធិការប្រជាជនក្រុងកឹងធើ គូសបញ្ជាក់៖ វៀតណាម-កម្ពុជា គឺជាប្រទេសជិតខាងដ៏ជិតស្និទ្ធ និងមានទំនាក់ទំនងសាមគ្គី មិត្តភាពជាប្រពៃណីដ៏យូរអង្វែង។ ក្នុងរយៈពេលពីរឆ្នាំ ឆ្នាំ ២០២០ និងឆ្នាំ ២០២១ ទោះបីរងផលប៉ះពាល់ជាច្រើនពីជំងឺរាតត្បាត COVID-១៩ ក៏ដោយ ប៉ុន្តែទំនាក់ទំនងរវាងប្រទេសទាំងពីរនៅតែបន្តរក្សាបាននូវសន្ទុះនៃការអភិវឌ្ឍជាវិជ្ជមានក្នុងវិស័យជាច្រើន។ ចែករំលែក និងគាំទ្រទៅវិញទៅមកក្នុងការបង្ការ និងទប់ស្កាត់ជំងឺរាតត្បាត។ រដ្ឋអំណាច និងប្រជាជនក្រុងកឹងធើ បានកំណត់ច្បាស់ ទំនាក់ទំនងមិត្តភាពជាប្រពៃណី និងសាមគ្គីភាពជាមួយប្រជាជនកម្ពុជា ជាកត្តាកិច្ចការបរទេសដ៏សំខាន់។ កម្មវិធីជួបជុំរំលឹកខួបអនុស្សាវរីយ៍ ៥៥ ឆ្នាំ ទិវាបង្កើតទំនាក់ទំនងការទូតរវាងវៀតណាម-កម្ពុជា សំដៅជំរុញទំនាក់ទំនងសាមគ្គីភាព មិត្តភាពជិតដិតរវាងវៀតណាម-កម្ពុជានាពេលបច្ចុប្បន្ន និងទៅអនាគត។

លោក សុខ ដារ៉េត អគ្គកុងស៊ុលនៃព្រះរាជាណាចក្រកម្ពុជាប្រចាំនៅក្រុងហូជីមិញ បានសម្តែងនូវមោទនភាពចំពោះការអភិវឌ្ឍប្រកបដោយនិរន្តរភាព និងកាន់តែខ្លាំងឡើងក្នុងកិច្ចសហប្រតិបត្តិការ និងទំនាក់ទំនងនៃប្រទេសទាំងពីរ។ ជំនួសមុខរាជរដ្ឋាភិបាលនិងប្រជាជនកម្ពុជា លោក សុខ ដារ៉េត បានជូនពរឱ្យទំនាក់ទំនងរវាងប្រទេសទាំងពីរកម្ពុជា-វៀតណាម កាន់តែមានទំនាក់ទំនងយ៉ាងជិតស្និទ្ធ រីកចម្រើន រុងរឿង និងប្រកបដោយចីរភាព។ លោក សុខ ដារ៉េត គូសបញ្ជាក់៖ សកម្មភាពអបអរសាទរខួបអនុស្សាវរីយ៍ ៥៥ ឆ្នាំ ទិវាបង្កើតទំនាក់ទំនងការទូតនៃប្រទេសទាំងពីរ គឺជាសកម្មភាពដ៏មានអត្ថន័យ រួមចំណែកជំរុញនិងលើកកម្ពស់ទំនាក់ទំនងសហប្រតិបត្តិការរវាងប្រទេសទាំងពីរឡើងមួយកម្រិតទៀត៕

ហ៊ុងវ៉ឹង-បកប្រែ៖ សុផន

ចែករំលែកអត្ថបទ

ពាក្យគន្លឹះ