មហាសាមគ្គីជនជាតិ គំរូក្នុងសហគមន៍

25/10/2021 - 08:57

គិតគូរការងារសាសនា ការងារសង្គម

អស់រយៈពេលជាង ២២ ឆ្នាំ ព្រះចៅអធិការវត្តមជ្ឈិមារាម (ជ្រោយទឹមចាស់) សង្កាត់ទី ១០ ក្រុងសុកត្រាំង ខេត្តសុកត្រាំង ព្រះតេជព្រះគុណលីឌាង តែងយកព្រះទ័យគិតគូរដល់ការបួសរៀនរបស់ព្រះសង្ឃ កសាងវត្តអារាម និងជួយមាមីងពុទ្ធបរិស័ទក្រីក្រ។ល។

ព្រះតេជព្រះគុណ លីឌាង។

ឆ្នាំ ១៩៨២ ព្រះតេជព្រះគុណ លីឌាង បានចូលសាងផ្នួសបួសរៀននៅវត្តជ្រោយទឹមចាស់។ លុះដល់ឆ្នាំ ១៩៩៧ ព្រះតេជព្រះគុណលីឌាង ត្រូវបានគណៈកម្មការវត្តនិងមាមីងពុទ្ធបរិស័ទទំនុកចិត្ត តែងតាំងធ្វើជាព្រះចៅអធិការវត្ត រហូតមកទល់សព្វថ្ងៃ។ ព្រះអង្គរួមជាមួយគណៈកម្មការវត្តបវារណាមាមីងពុទ្ធបរិស័ទក្នុងនិងក្រៅប្រទេស រួមវិភាគទានទឹកប្រាក់រាប់សិបពាន់លានដុង ដើម្បីកសាងក្លោងទ្វារ ទីធ្លាវត្ត កុដិ សាលា។ល។ ពិសេស វត្តកំពុងកសាងព្រះវិហារ គិតជាទឹកប្រាក់ជាង ១០ ពាន់លានដុង ដែលពុទ្ធបរិស័ទរួមវិភាគទាន។ តាមការគ្រោងទុក ព្រះវិហារនឹងដាក់ឱ្យប្រើប្រាស់នៅឆ្នាំ ២០២៣។ ព្រះតេជព្រះគុណលីឌាង មានថេរដីកា “អាត្មាតែងយកព្រះទ័យគិតគូរដល់ការសិក្សារៀនសូត្ររបស់ព្រះសង្ឃ និងការកសាងវត្តអារាមឱ្យបានសមរម្យ។ បច្ចុប្បន្ន វត្តជ្រោយទឹមចាស់មានព្រះសង្ឃជាច្រើនអង្គបាននិមន្តទៅសិក្សាថ្នាក់ពុទ្ធិកបឋមសិក្សា និងសាលាមធ្យមសិក្សាបំពេញវិជ្ជាបាលីណាមបូ។ អាត្មាភាពខិតខំប្រឹងប្រែងកសាងវត្តមានសោភណភាពស្រស់ស្អាត និងអភិរក្សតម្លៃវប្បធម៌ខ្មែរ ដើម្បីទាក់ទាញភ្ញៀវទេសចរមកទស្សនាកម្សាន្ត”។

ព្រះតេជព្រះគុណ លីឌាង ផ្តល់ជូននំនិងគ្រឿងភេសជ្ជៈដល់មូលដ្ឋានធ្វើចត្តាឡីស័កប្រមូលផ្តុំ ដើម្បីឧបត្ថម្ភប្រជាជនមកពីតំបន់ជំងឺ។

សាងផ្នួសបួសរៀនរយៈពេលជាង ៤០ វស្សា ព្រះអង្គតែងគិតគូរការងារសាសនា ការងារសង្គម ដោយចលនាពុទ្ធបរិស័ទខិតខំធ្វើការរកស៊ី ដើម្បីមានជីវភាពធូរធារ។ ទង្វើល្អរបស់ព្រះអង្គរីកសាយភាយ ត្រូវបានមាមីងពុទ្ធបរិស័ទក្នុងនិងក្រៅប្រទេសទំនុកចិត្ត ម្ល៉ោះហើយមាមីងខ្នះខ្នែងរួមវិភាគទាន ដើម្បីកសាងវត្តអារាមនិងជួយអ្នកក្រីក្រនៅភូមិស្រុក។ ជាក់ស្តែង ព្រះអង្គចលនាបានអង្ករជាង ៩ តោន មីរាប់រយកែស និងសម្ភារៈប្រើប្រាស់ផ្សេងៗ ដើម្បីឧបត្ថម្ភគ្រួសារក្រីក្រ មានជីវភាពក្រលំបាកដែលរងប៉ះពាល់ដោយជំងឺ COVID-១៩។ ជាពិសេស ព្រះតេជព្រះគុណ ថែមទាំងចលនាពុទ្ធបរិស័ទឧបត្ថម្ភចំណីអាហារ នំបុ័ង ផ្លែឈើ និងទឹកសុទ្ធ។ល។ ដល់ប្រជាជនមកពីតំបន់ជំងឺដែលធ្វើចត្តាឡីស័កនៅសាលាបឋមសិក្សាសង្កាត់ទី ១០។

លោក ង្វៀងវៀតយុង ប្រធានគណៈកម្មាធិការប្រជាជនសង្កាត់ទី ១០ ឱ្យដឹង៖ “ព្រះតេជព្រះគុណលីឌាង គឺជាគំរូឆ្នើមក្នុងការអនុវត្តល្អការងារសាសនា បំពេញល្អការងារសង្គម។ ព្រះអង្គចលនាពុទ្ធបរិស័ទគិតគូរដល់អ្នកក្រ ដែលរងប៉ះពាល់ដោយជំងឺ COVID-១៩។ សំខាន់ គឺការផ្សព្វផ្សាយ ចលនាមាមីងខ្មែរអនុវត្តល្អគោលមាគ៌ា គោលការណ៍របស់បក្ស ក្រឹត្យច្បាប់របស់ រដ្ឋ។ ជាក់ស្តែង ក្នុងពិធីបុណ្យភ្ជុំបិណ្ឌកន្លងហើយ មាមីងខ្មែរក្នុងសង្កាត់ទី ១០ អនុវត្តយ៉ាងម៉ឺងម៉ាត់សារ ៥K អំពីការបង្ការ ប្រឆាំងជំងឺ COVID-១៩”៕

យ្វីអាញ-លីសៀ

ចែករំលែកអត្ថបទ

ពាក្យគន្លឹះ