មហាសាមគ្គីជនជាតិ គំរូក្នុងសហគមន៍

06/09/2021 - 07:36

ព្រះតេជព្រះគុណថាច់ឡែ ឧបត្ថម្ភគ្រួសារជួបការលំបាកដោយសារជំងឺ COVID-១៩

លោកថាច់ឃួន អនុប្រធានគណៈកម្មាធិការរណសិរ្សមាតុភូមិវៀតណាមស្រុកកូវកែ ខេត្តត្រាវិញ ឱ្យដឹង៖ “ព្រះតេជព្រះគុណ ថាច់ឡែ ព្រះចៅអធិការវត្តសាលវ័ន (តាអោក) ឃុំចូវដៀង ស្រុកកូវកែ បានជូនអំណោយចំនួន ១.០០០ ចំណែក ដើម្បីឧបត្ថម្ភដល់គ្រួសារជួបការលំបាកដោយសារជំងឺ COVID- ១៩”។

ព្រះតេជព្រះគុណ ថាច់ឡែ ជូនអំណោយដល់មាមីងជួបការលំបាក។

ព្រះតេជព្រះគុណ ថាច់ឡែ តែងអស់ពីព្រះទ័យដើម្បីការងារសាសនានិងសង្គម។ ក្នុងអំឡុងពេលជំងឺ Covid-១៩ ព្រះអង្គបានបវារណាសប្បុរសជនជិតឆ្ងាយសរុបទឹកប្រាក់ជាង ២០០ លានដុង ដើម្បីឧបត្ថម្ភទាន់ពេលដល់អ្នកមានជីវភាពក្រលំបាកនៅភូមិភាគ។ មិនថាភ្លៀង ក្តៅឬផ្លូវពិបាកនិមន្តទៅមកនោះទេ ឱ្យតែដឹងថា មាមីងពុទ្ធបរិស័ទណាខ្វះខាតអង្ករ ជីវភាពគ្រួសារក្រលំបាកនោះ គឺព្រះតេជព្រះគុណ ថាច់ឡែ តែងនិមន្តទៅដល់កន្លែងឧបត្ថម្ភជានិច្ច។ ព្រះអង្គយល់ច្បាស់ពីជីវភាពក្រលំបាករបស់អ្នកក្រ ដោយតាំងចិត្តប្រកៀកស្មាជាមួយរដ្ឋអំណាច អង្គការមហាជន ភូមិភាគ អនុវត្តការងារសប្បុរសធម៌និងជួយប្រជាជន។ ព្រះតេជព្រះគុណ ថាច់ឡែ មានថេរដីកា៖ “ស្ថិតក្នុងបរិការណ៍ដែលជំងឺឆ្លងកំពុងរាលដាលយ៉ាងស្មុគស្មាញនេះ អ្នកក្រពិតជាលំបាកខ្លាំងណាស់ ដូច្នេះអាត្មាភាពជួយអ្វីបាន គឺចេះតែជួយទៅ។ ទន្ទឹមនឹងនោះ អាត្មាភាពក៏អំពាវនាវដល់មាមីងពុទ្ធបរិស័ទ បន្តការពង្រីកប្រវេណីសាមគ្គីក្នុងសហគមន៍បណ្តាជនជាតិកិញ ខ្មែរ ចិនក្នុងស្រុកកូវកែ សាមគ្គីរួមកម្លាំង ឆាប់បង្ក្រាបបានជំងឺ COVID -១៩”។

ថ្មីៗនេះ ក្រុមសប្បុរសធម៌វត្តតាអោក បានចុះទៅឧបត្ថម្ភគ្រួសារអ្នកមីង ថាច់ធីមី នៅភូមិតាអោក ឃុំចូវដៀងផងដែរ។ គ្រួសារអ្នកមីងជាគ្រួសារក្រ គ្មានទីពឹង។ ពេលទទួលបានអំណោយឧបត្ថម្ភ អ្នកមីងថាច់ធីមី រំភើបចិត្ត ឱ្យដឹង៖ “ប៉ុន្មានថ្ងៃកន្លង ប្រសិនបើគ្មានការឧបត្ថម្ភស្បៀងអាហាររបស់ព្រះតេជព្រះគុណ ថាច់ឡែ និងរដ្ឋអំណាចភូមិភាគ ខ្ញុំពិតជាមិនដឹងធ្វើយ៉ាងណាដើម្បីទ្រទ្រង់ជីវភាពនោះទេ។ ខ្ញុំអរគុណចំពោះការឧបត្ថម្ភរបស់រដ្ឋអំណាច និងព្រះសង្ឃវត្តតាអោកខ្លាំងណាស់”៕

សឺនម៉ាល័យ-លីសៀ

ចែករំលែកអត្ថបទ

ពាក្យគន្លឹះ