គោលនយោបាយ -ការរស់នៅ គោលនយោបាយ

30/08/2021 - 08:00

ខណៈពេលគោលនយោបាយបានអនុវត្តព្រមៗគ្នា

ការដែលខេត្តហូវយ៉ាងអនុវត្តព្រមៗគ្នានូវគោលនយោបាយជនជាតិ បានជួយគ្រួសារជនជាតិភាគតិច ប្រកបរបររកស៊ីចិញ្ចឹមជីវិតមានភាពងាយស្រួល។

កសិករម្ចាស់ការចុះពូជខណៈមានប្រភពទឹកធានារដូវកាល។

តាមប្រសាសន៍ លោកគីហ៊ីវថាញ អនុប្រធានគណៈជនជាតិខេត្តហូវយ៉ាង រយៈពេលកន្លង គណៈជនជាតិបានសហការជាមួយភូមិភាគនីមួយៗ ដែលមានជនជាតិភាគតិចរស់នៅកុះករ ដើម្បីឧបត្ថម្ភប្រកបរបររកស៊ី ចិញ្ចឹមជីវិតដល់គ្រួសារដែលក្រលំបាកខ្លាំង។ អាស្រ័យប្រភពទុនឧបត្ថម្ភ ទើបគ្រួសារជនជាតិភាគតិចក្រីក្រ មានជីវភាពឈានឡើង។ លទ្ធផលខាងលើ គឺអាស្រ័យការពង្រីកព្រមគ្នាៗនូវគោលនយោបាយជាច្រើនសម្រាប់តំបន់ជនជាតិភាគតិច។ លោកង្វៀងវ៉ាន់បែមើុយម៉ោក អនុប្រធានគណៈកម្មាធិការប្រជាជនឃុំត្រឿងឡុង A ឱ្យដឹង៖ “ពេលផ្លូវចូលភូមិត្រឿងថាំង បានក្រាលបេតុងពីប្រភពទុនកម្មវិធី ១៣៥ គ្រួសារដែលបានឧបត្ថម្ភទុនប្រកបរបររកស៊ី បានកែប្រែចម្ការចាស់ ដាំដំណាំរួមផ្សំ ដើម្បីយកទៅលក់ឯផ្សាររៀងរាល់ថ្ងៃ។ បើគ្មានផ្លូវគមនាគមន៍ទេ ការលក់ដូរកសិផលក៏ជួបការលំបាក ហើយភាគច្រើនលក់មិនបានថ្លៃ”។

ចម្ការស្វាយលូតលាស់ខៀវខ្ចីជំនួសឱ្យចម្ការចាស់នៅហូវយ៉ាង។

នៅស្រុកចូវថាញ់ A ពេលទំនប់លូទឹកតាមប្រឡាយកិញ្ឆាងសា-ណ បានកសាងរួចរាល់ កសិករភាគច្រើនបានកែប្រែចម្ការចាស់ ដើម្បីដាំប្រភេទដំណាំដែលមានតម្លៃសេដ្ឋកិច្ចខ្ពស់ ដូច៖ ស្វាយ ទុរេន មង្ឃុតជាដើម។ បងលីវភឿកដាក នៅភូមិ ៤ ទីប្រជុំបៃង៉ាង ឱ្យដឹង៖ “ខ្ញុំសាកល្បងដាំទុរេនពូជ Ri៦ យកមកពីញាតិមិត្តនៅផុងដៀង ដាំលើចម្ការចាស់ ២ កុង មិននឹកស្មានថាដើមលូតលាស់ល្អ។ អាស្រ័យមានប្រព័ន្ធទំនប់ស្ដុកទឹក ទើបគ្រួសារជាច្រើនបានកែប្រែចម្ការចាស់ និងមានទឹកសម្រាប់ស្រោចស្រពដំណាំស្រូវទៀតផង”។ លោកង្វៀងទ្រុងហូវ ប្រធានគណៈកម្មាធិការប្រជាជនទីប្រជុំជនបៃង៉ាង ឱ្យដឹងបន្ថែម៖ “ក្រៅពីអភិវឌ្ឍផ្នែកកសិកម្ម គ្រួសារជនជាតិភាគតិចខ្លះថែមទាំងប្រើប្រាស់ដើមទុនឧបត្ថម្ភ ដើម្បីលក់ដូរនៅផ្សារបៃង៉ាង គ្រួសារខ្លះទៀត ចិញ្ចឹមមាន់ ទា ។ល។ ខណៈពេលគោលនយោបាយបានផ្សព្វផ្សាយព្រមៗគ្នា បានបង្កលក្ខណសម្បត្តិងាយស្រួលដល់គ្រួសារជនជាតិភាគតិចអភិវឌ្ឍសេដ្ឋកិច្ច”។

លោកពូយ័ញធី អ្នកមានប្រជាប្រិយនៅភូមិថាញ់ទ្រុង ឃុំហ្វាលូវ ក្រុងវីថាញ រៀបរាប់៖ “ក្មួយៗខ្ញុំបានប្រើប្រាស់ដើមទុនឧបត្ថម្ភរបស់រដ្ឋ ដើម្បីទិញទោចក្រយានយន្តទៅធ្វើការនៅឯផ្សារវីថាញរាល់ថ្ងៃ ម្ល៉ោះហើយរកបានប្រាក់ចំណូលលំនឹង។ ប្រសិនបើរដ្ឋឧបត្ថម្ភទិញទោចក្រយានយន្ត ប៉ុន្តែផ្លូវមិនទាន់បានធ្វើ ក៏មិនអាចបើកទោចក្រយានយន្តទៅធ្វើការបានដែរ”៕

ហាថាញ-លីសៀ

ចែករំលែកអត្ថបទ

ពាក្យគន្លឹះ