ព្រឹត្តិការណ៍ - នយោបាយ ព្រឹត្តិការណ៍

30/08/2021 - 08:00

ឆន្ទៈមោះមុតនៃបដិវត្តន៍ខែសីហានិងបុណ្យជាតិ ២ កញ្ញា អមតៈ !

ថ្ងៃទី ២ ខែសីហា ឆ្នាំ ១៩៤៥ នៅទីលានបាឌិញ (ហាណូយ) លោកប្រធាន ហូជីមិញ អានសេចក្ដីប្រកាសឯករាជ្យ បង្កើតប្រទេសសាធារណរដ្ឋប្រជាធិបតេយ្យវៀតណាម បើកទំព័រនៃយុគសម័យថ្មី សម្រាប់ប្រវត្តិសាស្រ្តជនជាតិ។ រូបឯកសារ

មុននេះ ៧៦ ឆ្នាំ នៅខែសីហា ឆ្នាំ ១៩៤៥ បក្សយើងបានដឹកនាំទូទាំងប្រជាជនក្រោកឡើង វាយកម្ទេចនឹមត្រួតត្រានៃរបបអាណានិគមសក្ដិភូមិ និងដណ្ដើមមកវិញខឿនឯករាជ្យជូនជនជាតិ។ ផ្ដើមពីបដិវត្តន៍ដ៏មហិមានោះ ថ្ងៃទី ២-៩-១៩៤៥ ប្រទេសសាធារណរដ្ឋប្រជាធិបតេយ្យវៀតណាមត្រូវបានបង្កើតឡើង នាំមកជីវភាពថ្មីដ៏ភ្លឺស្វាងជូនប្រជាជនវៀតណាម។

ថ្ងៃទី ១៥-៤-១៩៤៥ បក្សយើងបានបង្រួបបង្រួមរវាងកងវៀតណាមឃោសនារំដោះ និងកងសង្គ្រោះជាតិ ទៅជាកងរំដោះវៀតណាម។ នៅខែមិថុនា ឆ្នាំ ១៩៤៥ បក្សយើងបានសម្រេចបង្កើតតំបន់រំដោះវៀតបាក់ ជាទីតាំងមូលដ្ឋានបដិវត្តន៍លើទូទាំងប្រទេស។

សន្និបាតតំណាងទូទាំងប្រទេសរបស់បក្ស ប្រជុំនៅតឹងត្រាវ ចាប់ពីថ្ងៃទី ១៣ ដល់ថ្ងៃទី ១៥-៨-១៩៤៥ បក្សបានសម្រេចបំផុសចលនា កុបកម្មលើទូទាំងប្រទេស ដណ្ដើមយករដ្ឋអំណាច មុនពេលកងទ័ពសម្ពន្ធភាពចូលមកឥណ្ឌូចិន។ ក្នុងលិខិតអំពាវនាវធ្វើកុបកម្ម (១៨ -៨-១៩៤៥) លោកប្រធាន ហូជីមិញ លើកឡើងយ៉ាងច្បាស់៖ “បងប្អូនជនរួមជាតិទាំងឡាយជាទីគោរពស្រឡាញ់ ! ពេលវេលាសម្រេចជោគវាសនារបស់ជនជាតិយើងបានមកដល់។ ជនរួមជាតិយើងទូទាំងប្រទេស ចូរក្រោកឈរឡើង យកកម្លាំងខ្លួនយើង ដើម្បីរំដោះខ្លួនយើង”។

ជាមួយនឹងបក្ខជន ៥.០០០ នាក់ បក្សយើងបានដឹកនាំទូទាំងប្រជាជនបើកយុទ្ធនាការធ្វើកុបកម្ម ខែសីហា ឆ្នាំ១៩៤៥ ដើម្បីផ្ដួលរំលំការជិះជាន់គាបសង្កត់នៃរបបអាណានិគមចក្រពត្តិ និងសក្ដិភូមិ។ ក្នុងនោះ ហាណូយ សាយហ្គង ហ្វេ ជាតំបន់ទាំង ៣ ដ៏សំខាន់ សម្រេចនូវជ័យជម្នះនៃបដិវត្តន៍ខែសីហា ឆ្នាំ ១៩៤៥។

ថ្ងៃទី ២ ខែសីហា ឆ្នាំ ១៩៤៥ នៅទីលានបាឌិញ (ហាណូយ) លោកប្រធាន ហូជីមិញ ជំនួសមុខរដ្ឋាភិបាលបណ្ដោះអាសន្ន អានសេចក្ដីប្រកាសឯករាជ្យ បង្កើតប្រទេសសាធារណរដ្ឋប្រជាធិបតេយ្យវៀតណាម។

ក្រោយនេះ និយាយពីគោលដៅរបស់បដិវត្តន៍ខែសីហា លោកប្រធាន ហូជីមិញ បានបង្ហាញច្បាស់៖ “គោលដៅបដិវត្តន៍ខែសីហា ជាអ្វី ? គឺការដណ្ដើមយកវិញនូវសន្តិភាព បូរណភាព ឯករាជ្យនិងប្រជាធិបតេយ្យសម្រាប់ប្រទេសជាតិយើង សម្រាប់ប្រជាជនយើង។ បដិវត្តន៍ខែសីហាសម្រេចជោគជ័យ ថ្ងៃទី ២ ខែកញ្ញា ប្រទេសយើងបានប្រកាសឯករាជ្យ។ ប្រទេសសាធារណរដ្ឋប្រជាធិបតេយ្យវៀតណាមត្រូវបានបង្កើតឡើង។ ការបោះឆ្នោត ជាសកលដោយសេរី ត្រូវបានរៀបចំឡើង ប្រជាជនទូទាំងប្រទេស បានបោះឆ្នោតបង្កើតរដ្ឋសភា។ រដ្ឋសភាបានអនុមតិច្បាប់រដ្ឋធម្មនុញ្ញនិងបោះឆ្នោតបង្កើតរដ្ឋាភិបាលមជ្ឈិម រដ្ឋអំណាចមូលដ្ឋាន ចាប់ពីឃុំដល់ខេត្ត គឺអាស្រ័យប្រជាជនជាអ្នកបោះឆ្នោតជ្រើសរើស។ ដូច្នេះដំណាក់កាលនោះ យើងបានចាប់ផ្ដើមអនុវត្តបូរណភាព ឯករាជ្យ និងប្រជាធិបតេយ្យ”។

លោកប្រធាន ហូជីមិញ ក៏បានលើកឡើងយ៉ាងច្បាស់ អំពីអត្ថន័យដ៏ធំធេងនៃបដិវត្តន៍ ខែសីហា៖ “បដិវត្តន៍ខែសីហា ឆ្នាំ ១៩៤៥ សម្រេចជោគជ័យ។ នោះគឺជ័យជម្នះដំបូងរបស់លទ្ធិម៉ាក្ស-លេនីន នៅប្រទេសអាណានិគមពាក់កណ្ដាលសក្ដិភូមិ”។ លោកសង្កត់ធ្ងន់៖ “ជ័យជម្នះនោះ បានជួយឱ្យជនជាតិវៀតណាមឆ្ពោះទៅយុគសម័យថ្មី យុគសម័យឯករាជ្យ សេរីភាព និងសង្គមនិយម”។ អាស្រ័យហេតុនោះ លោកបញ្ជាក់៖ “នោះគឺជាការផ្លាស់ប្ដូរដ៏ធំធេងណាស់ក្នុងប្រវត្តិសាស្រ្តប្រទេសយើង”។

សេចក្ដីប្រកាសឯករាជ្យ (២-៩-១៩៤៥) បានប្រកាសជាសាធារណៈ “គ្រប់ជនជាតិលើពិភពលោកកើតមកមានសមភាព ជនជាតិណាក៏មានសិទ្ធិរស់រាន មានសិទ្ធិទទួលបានសុភមង្គល និងសិទ្ធិសេរីភាព” ក៏ជាសញ្ញានៃការដួលរលំរបស់អាណានិគមនិយមលើសកលលោក៕

យោង៖ កាសែតបៀងផុង - ប្រែ៖ ពេជ្រសឿន

ចែករំលែកអត្ថបទ

ពាក្យគន្លឹះ