សុខភាព - អប់រំ អប់រំ

09/08/2021 - 08:12

ឱកាសសិក្សាមានច្រើនសម្រាប់បេក្ខសិស្ស

យោងតាមការប្រកាសទិន្នន័យរបស់ក្រសួងអប់រំនិងបណ្តុះបណ្តាលពិន្ទុប្រឡងមធ្យមសិក្សាចំណេះទូទៅថ្នាក់ជាតិឆ្នាំនេះខ្ពស់ជាងឆ្នាំ ២០២០។ ហេតុនេះ ពិន្ទុជម្រើសសិស្សនៅតាមសាកលវិទ្យាល័យប៉ាន់ស្មាននឹងខ្ពស់ជាងមុន។

សាកលវិទ្យាល័យកឹងធើ ត្រូវបានបេក្ខសិស្សនៅតំបន់វាលរាបទន្លេគឺវឡុងចុះឈ្មោះច្រើន។

ជាសាកលវិទ្យាល័យដ៍សំខាន់នៅតំបន់វាលរាបទន្លេគឺវឡុង សាកលវិទ្យាល័យកឹងធើ បានប្រកាសពិន្ទុជម្រើសដោយវិធីពិនិត្យពិន្ទុតាមរយៈសិក្ខាគារិកឆ្នាំសិក្សា ២០២១ ខ្ពស់ជាងជម្រើសឆ្នាំ ២០២០ ទាំង ៩៩ មុខវិជ្ជាសិក្សា។ ពិន្ទុជម្រើសខ្ពស់បំផុតគឺផ្នែកគរុកោសល្យគណិតវិទ្យា ពិន្ទុជាប់ជម្រើសសិក្ខាគារិកគឺ ២៩,២៥ ពិន្ទុ និងផ្នែកសិក្សាបន្ទាប់ចំនួន ៣ មានពិន្ទុជម្រើសសិក្ខាគារិក ២៩ ពិន្ទុ នោះគឺផ្នែកគរុកោសល្យគីមីវិទ្យា ផ្នែក Marketing និងផ្នែកពាណិជ្ជកម្មអន្តរជាតិ។ ពិន្ទុពិនិត្យជម្រើសសិក្ខាគារិកទាបបំផុតនៅសាកលវិទ្យាល័យកឹងធើ ១៩,៥ ពិន្ទុ។ ពិន្ទុជម្រើសសិក្ខាគារិកនិងពិន្ទុប្រឡងជម្រើសឆ្នាំ ២០២០ នៃសាកលវិទ្យាល័យកឹងធើមិនលើសគ្នាច្រើន។ ហេតុនេះ បន្ទាប់ពីសាកលវិទ្យាល័យកឹងធើ ប្រកាសពិន្ទុកំណត់ជាប់ បេក្ខសិស្សគប្បីតាមដានដើម្បីកែសម្រួលគោលបំណងសិក្សាឱ្យបានសមស្រប។ បេក្ខសិស្ស ឡឹមក្វឹកអាញ នៅទីប្រជុំជនកើ-ដ ស្រុកកើ-ដ ក្រុងកឹងធើ ឱ្យដឹង៖ “ប្រៀបនឹងពិន្ទុជម្រើសឆ្នាំ ២០២០ ពិន្ទុប្រឡងសមាយោគ D01 (គណិតវិទ្យា អក្សរសាស្រ្ត អង់គ្លេស) របស់ប្អូនមិនជាប់ជម្រើសព្រោះខ្វះ ១ ពិន្ទុ។ ប្អូនកំពុងរង់ចាំសាកលវិទ្យាល័យកឹងធើ ប្រកាសពិន្ទុកំណត់ជាប់ដើម្បីកែសម្រួលគោលបំណងសិក្សា”។ ក្រសួងអប់រំនិងបណ្តុះបណ្តាលបានកំណត់ថា សាលានីមួយៗគប្បីប្រកាសពិន្ទុកំណត់ត្រូវជាប់មុនថ្ងៃ ៥/៨/២០២១ និងកំណត់ពេលកែសម្រួលគោលបំណងសិក្សាចាប់ពីថ្ងៃ ៧ ខែសីហាដល់ថ្ងៃ ១៧ ខែសីហា ឆ្នាំ ២០២១។ នេះគឺរយៈពេលល្មមដើម្បីបេក្ខសិស្សជ្រើសរើសមុខវិជ្ជាសិក្សាសមស្រប។ ហើយបើសិនមិនជាប់ជម្រើស បេក្ខសិស្សនៅតែមានឱកាសសិក្សាជាច្រើននៅតាមសាកលវិទ្យាល័យឯកជន អនុមហាវិទ្យាល័យ មធ្យមសិក្សាវិជ្ជាជីវៈ។

បេក្ខសិស្សចុះឈ្មោះជម្រើសចូលរៀនសាលាអនុមហាវិទ្យាល័យកឹងធើ។

បេក្ខសិស្ស តូង៉ុកហឹង នៅស្រុកផុងដៀង ក្រុងកឹងធើ ឱ្យដឹង៖ “ដោយសារកំណត់ជ្រើសរើសផ្នែកសិក្សាគរុកោសល្យមត្តេយ្យតាំងពីដំបូង ដូច្នេះ ប្អូនមិនរងសម្ពាធធ្ងន់ក្នុងសម័យប្រឡងសញ្ញាបត្រមធ្យមសិក្សាចំណេះទូទៅកន្លងហើយ។ ឆ្នាំនេះ សាកលវិទ្យាល័យកឹងធើ មិនជម្រើសសិស្សផ្នែកគរុកោសល្យមត្តេយ្យ ទើបប្អូនធ្វើសំណុំបែបបទដាក់ពាក្យជម្រើសចូលរៀននៅសាលាអនុមហាវិទ្យាល័យកឹងធើ”។ អ្នករួមស្រុកកំណើតនឹងប្អូន តូង៉ុកហឹង គឺប្អូនង្វៀងថាយយ្វី ក៏បានសម្រេចចិត្តរៀនអនុមហាវិទ្យាល័យ។ យ្វីឱ្យដឹង៖ “តាមពិត ឱកាសរៀនមហាវិទ្យាល័យរបស់ប្អូនក៏មានសង្ឃឹម ព្រោះប្អូនជាប់និទ្ទេសគ្រាន់បើ ប៉ុន្តែប្អូននឹកគិតថា រៀនអនុមហាវិទ្យាល័យឆាប់ចេញសាលា តិចបង់ខាតដល់គ្រួសារ ទើបប្អូនសម្រេចចិត្តរៀនអនុមហាវិទ្យាល័យ។ ពេលប្អូនចេញទៅធ្វើការ បើសិននៅមានបំណងបង្កើនចំណេះដឹង ប្អូនអាចនឹងទៅបន្តការសិក្សាមហាវិទ្យាល័យ (ប្រព័ន្ធរៀនបណ្តើរ ធ្វើការបណ្តើរ)”៕

ហាថាញ-មុនី

ចែករំលែកអត្ថបទ

ពាក្យគន្លឹះ