មហាសាមគ្គីជនជាតិ ភូមិស្រុកផ្លាស់ថ្មី

08/03/2021 - 15:48

ចាកផុតពីភាពក្រីក្រ អាស្រ័យការដាំដំណាំ

កាលពី ៥ ឆ្នាំមុន គ្រួសារបងថាច់ថឿន ជាគ្រួសារក្រីក្រមួយខ្វះដីផលិត នៅភូមិអំពាំងសាន្ត ឃុំទ្រឿង-ថ ស្រុកកូវង៉ាង ខេត្តត្រាវិញ អាស្រ័យមានបទពិសោធន៍ដាំដំណាំកាលទៅធ្វើការឈ្នួលនៅដុងណាយ ឡុងអាង។ល។ ពេលវិលត្រឡប់មកស្រុកវិញ បងក៏ដាំដំណាំ ហើយបានចាកផុតពីភាពក្រីក្រ។

 បងថាច់ថឿន កំពុងប្រមូលផលប៉េងប៉ោះ។

ដើមឆ្នាំ ២០១៨ ក្រោយពីច្រើនឆ្នាំទៅធ្វើការឈ្នួល បងថឿន សម្រេចចិត្តត្រឡប់មកស្រុក ជួលដីដាំដំណាំ។ ប្តីប្រពន្ធបងថឿន ចាប់ផ្តើមរៀបចំដីនិងប្តូរផ្ទៃដីស្រែទាំងមូលទៅដាំដំណាំ។ រដូវដំបូងបងដាំប៉េងប៉ោះ លុះប្រមូលផលលក់ក្នុងតម្លៃជិត ១០ ពាន់ដុង/គីឡូក្រាម។ ជាមួយតម្លៃខាងលើ គ្រួសារបងក៏យកបានដើមទុននិងមានចំណេញខ្លះ។ តាមសម្ដីបងថាច់ថឿន រដូវនេះមិនត្រឹមតែលក់បានថ្លៃទេ នៅទាំងមានទិន្នផលខ្ពស់ និងមានទម្ងន់ពី ៧-៩ ផ្លែ/គីឡូក្រាម។

ជារៀងរាល់ឆ្នាំ គ្រួសារបងតែងផ្តោតសំខាន់លើដំណាំបីប្រភេទនោះគឺ៖ ប៉េងប៉ោះ ត្រសក់និងម្ទេសចង្អុលមេឃ ដាំមធ្យមពី ២-៣ រដូវ/ឆ្នាំ នាំមកនូវប្រាក់ចំណូលដល់គ្រួសារប្រមាណពី ៤០-៥០ លានដុង/ឆ្នាំ។ បងថាច់ថឿន ឱ្យដឹង៖ “ដាំដំណាំត្រូវចំណាយពេលថែទាំច្រើន បើប្រៀបនឹងធ្វើស្រែ។ ទោះបីរដូវខ្លះប្រឈមនឹងការចុះថ្លៃក៏ដោយ ប៉ុន្តែអាចយកប្រភេទដំណាំផ្សេងប៉ះប៉ូវនឹងដំណាំនោះបាន។ បច្ចុប្បន្ន គ្រួសារខ្ញុំបានធូរធារជាងមុន ក៏អាស្រ័យការដាំដំណាំ”។ បងថឿន ឱ្យដឹងបន្ថែម រដូវដំណាំចុងឆ្នាំ ២០១៩ លើផ្ទៃដីដែលបងជួលនោះ បងដាំត្រសក់ជាង ២ កុង ដល់រដូវប្រមូលផល ត្រសក់មានតម្លៃ ២០ ពាន់ដុង/គីឡូក្រាម ដូច្នេះរដូវនេះ គិតតែដំណាំត្រសក់ គ្រួសារបងរកបានប្រាក់ចំណូលជាង ៣០ លានដុង។

មិនដូចគ្រួសារកសិករឯទៀតនៅក្នុងភូមិនោះទេ នៅពេលប្រមូលផលពួកគាត់ច្រើនតែលក់ទៅឱ្យឈ្មួញកណ្ដាល ។ សម្រាប់គ្រួសារបងថឿនវិញ គឺប្រពន្ធគាត់ដឹកទៅលក់ឯផ្សារដោយខ្លួនឯង។ ថ្ងៃខ្លះ បងស្រីថាច់ធីធៀ - ប្រពន្ធបងថឿន ដឹកទៅផ្សារត្រាវិញលក់ពី ១-២ ជើងឯណោះ។ ដូច្នេះហើយ បានជាគ្រួសារបងក្តាប់បានព័ត៌មានទីផ្សារ និងអតិថិជន។ ផ្ដើមពីនោះ បងក៏លៃលកដាំដំណាំឱ្យសមស្របនឹងទីផ្សារ ដើម្បីជៀសវាងដំណាំបានផល តែខុសតម្លៃ។ បងស្រីថាច់ធីធៀ ឱ្យដឹង៖ “ប្រសិន បើលក់ឱ្យឈ្មួញកណ្ដាល គិតទៅមួយថ្ងៃគ្រួសារខ្ញុំខាតតិចបំផុតពី ១.៥០០-២.០០០ ដុង/គីឡូក្រាម។ ដឹកទៅលក់ខ្លួនឯង បើប្រសិនជាតម្លៃទីផ្សារនេះចុះថោក យើងអាចបន្តស្វែងរកទីផ្សារផ្សេងទៀតដើម្បីលក់ ដូច្នេះយើងអាចរកបានប្រាក់ចំណេញខ្ពស់ជាង” ។

និយាយពីកសិករ ថាច់ថឿន លោកហោថាញតឹម ប្រធានភូមិអំពាំងសាន្ត ចែករំលែក៖ “អាស្រ័យខិតខំធ្វើការរកស៊ី អនុវត្តមានប្រសិទ្ធភាពទម្រង់ដាំបន្លែ ដំណាច់ ឆ្នាំ ២០១៩ គ្រួសារបងថាច់ថឿន បានរដ្ឋអំណាចភូមិភាគ ស្នើថ្នាក់លើលប់ឈ្មោះពីបញ្ជីគ្រួសារក្រីក្ររបស់ភូមិ។ បងថាច់ថឿនបានទទួលស្គាល់ជាកសិករផលិតពូកែថ្នាក់ មូលដ្ឋាន” ៕

សឺនមាល័យ-លេងមី

ចែករំលែកអត្ថបទ

ពាក្យគន្លឹះ