ព្រឹត្តិការណ៍ - នយោបាយ ព្រឹត្តិការណ៍

07/09/2020 - 16:21

រាជរដ្ឋាភិបាលកម្ពុជាប្រគល់ផែនទីឋានលេខាព្រំដែនគោកកម្ពុជា-វៀតណាម

យោងតាមអ្នកយកព័ត៌មាននៃទីភ្នាក់ងារសារព័ត៌មានវៀតណាម ប្រចាំនៅប្រទេសកម្ពុជា កាលពីថ្ងៃទី ២៧ ខែសីហា រាជរដ្ឋាភិបាលនៃព្រះរាជាណាចក្រកម្ពុជា បានធ្វើពិធីប្រគល់ច្បាប់ចម្លងផែនទីឋានលេខាព្រំដែនគោករវាងកម្ពុជា-វៀតណាម មាត្រដ្ឋាន ១/២៥.០០០ ជូនស្ថាប័ន ក្រសួង ផ្នែកពាក់ព័ន្ធចំនួន ៣៥ របស់កម្ពុជា។

លោក ឡេហ្វាយទ្រុង អនុរដ្ឋមន្ត្រី ក្រសួងការបរទេសវៀតណាម និងលោកវ៉ាគឹមហុង ទេសរដ្ឋមន្ត្រីទទួលបន្ទុកកិច្ចការព្រំដែនកម្ពុជា បានប្រគល់ ទទួលផែនទីឋានលេខាព្រំដែនគោក មាត្រដ្ឋាន ១/២.៥០០ រវាងប្រទេសទាំងពីរ។ (រូប៖ TTXVN)

ពិធីប្រគល់ត្រូវបានប្រារព្ធឡើងនៅវិមានសន្តិភាព រាជធានីភ្នំពេញ ក្រោមអធិបតីភាពសម្តេចពិជ័យសេនា ទៀបាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិនៃព្រះរាជាណាចក្រកម្ពុជា ។

ផែនទីឋានលេខាព្រំដែនគោករវាងកម្ពុជា-វៀតណាម មាត្រដ្ឋាន ១/២.៥០០ បានបង្ហាញយ៉ាងពេញលេញនូវសមិទ្ធផលនៃកិច្ចការខណ្ឌសីមា និងបោះបង្គោលព្រំដែនគោក (ប្រមាណ៨៤%) និងជាឧបសម្ព័ន្ធ មិនអាចផ្តាច់ចេញបានពីពិធីសារខណ្ឌសីមានិងបោះបង្គោលព្រំដែនគោករវាងកម្ពុជា-វៀតណាម ដែលប្រទេសទាំងពីរបានចុះហត្ថលេខានៅថ្ងៃទី ៥ ខែតុលា ឆ្នាំ ២០១៩ ព្រមជាមួយនឹងសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនជាតិឆ្នាំ ១៩៨៥ និងសន្ធិសញ្ញាបំពេញបន្ថែមឆ្នាំ២០០៥។

ថ្លែងយោបល់នៅក្នុងពិធីប្រគល់ផែនទីឋានលេខាព្រំដែននៅវិមានសន្តិភាព លោកវ៉ាគឺមហុង ទេសរដ្ឋមន្ត្រីទទួលបន្ទុកកិច្ចការព្រំដែននិងជាប្រធានគណៈកម្មការចម្រុះខណ្ឌសីមា និងបោះបង្គោលព្រំដែនគោកកម្ពុជា មានប្រសាសន៍ ៖ “ផែនទីនេះឆ្លុះបញ្ចាំងសមិទ្ធផល ៨៤% នៃកិច្ចការខណ្ឌសីមា និងបោះបង្គោលព្រំដែនគោករវាងកម្ពុជានិងវៀតណាម”។

មុននោះ កាលពីថ្ងៃទី ១ ខែសីហា គណ:ប្រតិភូវៀតណាម ដឹកនាំដោយលោក ឡេហ្វាងទ្រុង អនុរដ្ឋមន្ត្រី ក្រសួងការបរទេស ប្រធានគណ:កម្មការចម្រុះខណ្ឌសីមា និងបោះបង្គោលព្រំដែនរវាងវៀតណាម-កម្ពុជា និងគណៈប្រតិភូកម្ពុជា ដឹកនាំដោយលោកវ៉ាគឹមហុងទេស រដ្ឋមន្ត្រីទទួលបន្ទុកកិច្ចការព្រំដែន និងជាប្រធានគណៈកម្មការចម្រុះខណ្ឌសីមា និងបោះបង្គោលព្រំដែនគោករវាងកម្ពុជា-វៀតណាម បានជួបពិភាក្សាការងារ និងប្រគល់ផែនទីឋានលេខាព្រំដែនគោក មាត្រដ្ឋាន ១/២៥.០០០ រវាងសាធារណរដ្ឋសង្គមនិយមវៀតណាម និងព្រះរាជា ណាចក្រកម្ពុជា នៅច្រកព្រំដែនអន្តរជាតិម៉ុកបាយ ខេត្តតីនិញ។

ភាគីទាំងពីរបានដំណើរការត្រួតពិនិត្យ ផ្ទៀងផ្ទាត់ និងឯកភាពលើផែនទីឋានលេខាព្រំដែនចំនួន ៥០០ ច្បាប់ បានបោះជាសៀវភៅ ក្នុងនោះរួមមាន៖ ភាសាវៀត-ខ្មែរ ២៥០ ច្បាប់ និងភាសាខ្មែរ-វៀត ២៥០ ច្បាប់ និងបានចុះហត្ថលេខាគ្រប់គ្រាន់តំណាងឱ្យស្ថាប័នមានសមត្ថកិច្ចគ្រប់ជាន់ថ្នាក់នៃប្រទេសទាំងពីរ និងបានភាគីខាងវៀតណាមបោះជាសៀវភៅ (Album) មាំមួន ត្រូវតាមលក្ខណៈបច្ចេកទេស។

លើមូលដ្ឋានពិភាក្សានិងឯកភាពគ្នា ភាគីវៀតណាមបានប្រគល់ជូនភាគីកម្ពុជានូវផែនទីច្បាប់ដើមចំនួន ២៥០ ច្បាប់ ក្នុងនោះ ភាសាខ្មែរ-វៀតចំនួន ១៣០ ច្បាប់ បានបោះជាសៀវភៅ និងបោះគាបចំនួន ១០០ ច្បាប់ (អាចដោះចេញបាន) និងភាសាវៀត-ខ្មែរចំនួន ២០ ច្បាប់ បោះជាសៀវភៅ ដើម្បីបម្រើកិច្ចការព្រំដែនដីគោករវាងប្រទេសទាំងពីរ។

ភាគីវៀតណាមក៏បានរក្សាផែនទីទុកចំនួន ២៥០ ច្បាប់ផងដែរ រួមមាន៖ ផែនទីភាសាវៀត-ខ្មែរ ២៣០ ច្បាប់ និងផែនទីភាសាខ្មែរ-វៀត ចំនួន ២០ ច្បាប់។

ប្រការដែលភាគីទាំងពីរសម្រេចកិច្ចការប្រគល់ ទទួលផែនទីឋានលេខាព្រំដែនគោករវាងវៀតណាម-កម្ពុជា គឺមូលដ្ឋានសំខាន់ជួយជំរុញពិធីដោះដូរឯកសារផ្ដល់សច្ចាប័នសន្ធិសញ្ញាបំពេញបន្ថែម លើសន្ធិសញ្ញាកំណត់ព្រំដែនជាតិឆ្នាំ ១៩៨៥ និងសន្ធិសញ្ញាបំពេញបន្ថែម ឆ្នាំ ២០០៥ និងពិធីសារខណ្ឌសីមានិងបោះបង្គោលព្រំដែនគោករវាងប្រទេសទាំងពីរ ដែលបានចុះហត្ថលេខាកាលពីថ្ងៃទី ៥ ខែតុលា ឆ្នាំ ២០១៩ មានសុពលភាព៕

យោង៖ ត្រឹងឡុង (TTXVN)-វិមាន

ចែករំលែកអត្ថបទ

ពាក្យគន្លឹះ