មហាសាមគ្គីជនជាតិ ភូមិស្រុកផ្លាស់ថ្មី

16/12/2019 - 17:25

នៅពេលប្រជាជនមូលមតិ សាមគ្គីរួមកម្លាំង

ការកសាងហេដ្ឋារចនាសម្ព័ន្ធគមនាគមន៍ជនបទ គឺជាលក្ខឋានមួយក្នុងចំណោមលក្ខឋានសំខាន់ៗ រួមចំណែកអភិវឌ្ឍសេដ្ឋកិច្ច-សង្គមនៅភូមិភាគ លើកស្ទួយជីវភាពប្រជាជន ដើម្បីសម្រេចរួចរាល់លក្ខឋានកសាងជនបទថ្មី។ អាស្រ័យហេតុនោះ រយៈពេលកន្លង គណៈកម្មាធិការបក្សឃុំគីមហ្វា ស្រុកកូវង៉ាង ខេត្តត្រាវិញ អនុវត្តល្អនូវការផ្សព្វផ្សាយ ចលនាដើម្បីប្រជាជនរួមកម្លាំងសាមគ្គីកសាង និងធ្វើឱ្យសុក្រឹតគមនាគមន៍ជនបទ រួមចំណែកកសាងមុខមាត់ជនបទកាន់តែមានភាពរីកចម្រើន។

ប្រជាជនភូមិរាជមល្ល បរិច្ចាគដីធ្វើផ្លូវគមនាគមន៍ជនបទ។

លោកត្រឹងថាយផុង លេខាគណៈកម្មាធិការបក្សឃុំគីមហ្វា ឱ្យដឹង៖ “ដំបូង ការចលនាប្រជាជនបរិច្ចាគដី ចម្ការ ដំណាំឈើហូបផ្លែ ដើម្បីធ្វើផ្លូវគមនាគមន៍ជនបទក្នុងការកសាងជនបទថ្មី ជួបការលំបាកណាស់។ មកពីប្រជាជនមិនទាន់យល់ពីគោលបំណង និងអត្ថន័យនៃកម្មវិធីនេះ ម្ល៉ោះហើយការកៀរគរប្រជាជនរួមវិភាគទានទឹកប្រាក់ និងកម្លាំងពលកម្ម ពិសេសគឺការឈូសឆាយពង្រាបផ្ទៃដីដើម្បីធ្វើផ្លូវមានការលំបាកណាស់។ ចំពោះស្ថានភាពនោះ ឃុំក៏បានជំរុញការងារផ្សព្វផ្សាយដោយរូបភាពផ្សេងៗ ដើម្បីលើកកម្ពស់ស្មារតីភ្ញាក់រលឹកដល់ប្រជាជន រូបគាត់ជាកម្មាភិបាលថ្នាក់ដឹកនាំឃុំគំរូ ចលនាគ្រួសារគាត់ឈានមុខចំណាយកម្លាំងទ្រព្យ កម្លាំងពលកម្ម ដើម្បីធ្វើផ្លូវគមនាគមន៍ជនបទ ដូច្នេះ បានធ្វើឱ្យប្រជាជនក្នុងឃុំមានការផ្លាស់ប្តូរឆាប់រហ័ស។ ដោយសារអនុវត្តល្អការងារផ្សព្វផ្សាយ ចលនាពង្រីកបទកំណត់ប្រជាធិបតេយ្យដល់ប្រជាជន បានជាចលនាធ្វើផ្លូវគមនាគមន៍ជនបទ, តែងបានប្រជាជនចូលរួមយ៉ាងសកម្ម”។

ពូង្វៀនវ៉ាន់ម៉ឺយ ស្នាក់នៅភូមិតឹងហ៊ីប ឱ្យដឹងដោយក្តីរីករាយ៖ “ផ្ទះខ្ញុំនៅក្បែរផ្លូវជាតិ៥៣ ឃើញអ្នកភូមិពិបាកក្នុងការធ្វើដំណើរទៅមក រដ្ឋក៏មានគោលការណ៍ធ្វើផ្លូវកាត់តាមវាលស្រែទទឹង២,៥ម៉ែត្រ ប្រវែង២,៧គីឡូម៉ែត្រ ប្រសិនបើខ្ញុំមិនបរិច្ចាគដីនោះទេ ដងផ្លូវនេះមិនអាចតភ្ជាប់ផ្លូវជាតិ៥៣ ហើយអ្នកភូមិក៏ពិបាកធ្វើដំណើរទៅមកដែរ។ ក្រោយពេលពិភាក្សានឹងគ្រួសារ ខ្ញុំឯកភាពបរិច្ចាគដីក្បែរផ្លូវជាតិ៣៥០ម៉ែត្រការ៉េដើម្បីធ្វើផ្លូវ។ ខ្ញុំទន្ទឹងឱ្យតែផ្លូវនេះកសាងហើយឆាប់ៗ ដើម្បីបង្កលក្ខណៈងាយស្រួលសម្រាប់អ្នកភូមិធ្វើដំណើរទៅមកបានខួបប្រាំងវស្សា”។

ជាមួយគោលលំនាំ “រដ្ឋនិងប្រជាជនរួមគ្នាធ្វើ” រយៈពេលកន្លង ឃុំគីមហ្វាកសាងបានដងផ្លូវបេតុងស្អាតរឹងមាំជាច្រើន ភ្ជាប់ពីភូមិមួយទៅភូមិមួយ ឆ្លងតាមរយៈនោះ ញុាំងឱ្យមុខមាត់ជនបទផ្លាស់ថ្មីបន្តិចម្តងៗ រួមចំណែកជំរុញសេដ្ឋកិច្ច-សង្គមភូមិភាគរីកចម្រើន៕

សឺនម៉ាល័យ-លីសៀ

ចែករំលែកអត្ថបទ

ពាក្យគន្លឹះ