គោលនយោបាយ -ការរស់នៅ ការរស់នៅ

09/09/2026 - 06:01

ចិញ្ចឹមកង្កែបទំនិញផ្តល់ប្រាក់ចំណូលគ្រាន់បើ

ក្រោយពីរយៈពេលធ្វើជាកម្មករនៅប៊ិញយឿង បង ថាច់ វង្សា បានត្រឡប់មកស្រុកកំណើតវិញ ដើម្បីស្វែងរកទិសដៅអភិវឌ្ឍន៍សេដ្ឋកិច្ច។ ផ្តើមពីទម្រង់ចិញ្ចឹមសាកល្បងកង្កែបចំនួន ១.០០០ ក្បាល មកទល់ពេលនេះ បងបានពង្រីកឡើងដល់ ២៨ អាង គួបផ្សំការចិញ្ចឹមកង្កែបទំនិញ និងបង្កាត់ពូជលក់ឱ្យប្រជាជនដែលមានតម្រូវការ នាំមកនូវប្រភពចំណូលរាប់សិបលានដុង។

បង ថាច់ វង្សា នៅក្បែរអាងចិញ្ចឹមកង្កែបទំនិញ។

មកកាន់ភូមិព្រែកនិស្ស័យ ឃុំត្រាកូង ខេត្តវិញឡុង សួរអំពីទម្រង់ចិញ្ចឹមកង្កែបរបស់បង ថាច់ វង្សា កើតឆ្នាំ ១៩៩៦ ប្រជាជននៅភូមិភាគភាគច្រើនសុទ្ធតែបានស្គាល់។ កាលពីមុន បងធ្លាប់ទៅធ្វើជាកម្មករនៅប៊ិញយឿង។ ក្រោយរយៈពេលធ្វើការឆ្ងាយស្រុកកំណើត ដោយមើលឃើញថា នៅភូមិភាគអាចអភិវឌ្ឍន៍សេដ្ឋកិច្ចពីការផលិតកសិកម្មបាន បងក៏បានសម្រេចចិត្តត្រឡប់មកស្រុកកំណើតវិញ ដើម្បីស្វែងរកទិសដៅរកស៊ីសមស្រប។ មិនមានបទពិសោធន៍ច្រើនក្នុងការចិញ្ចឹមកង្កែប បងវង្សា បានសិក្សាស្វែងយល់ដោយខ្លួនឯង រៀនសូត្របច្ចេកទេសតាមប្រភពជាច្រើន និងបានពូម្នាក់ជួយណែនាំបន្ថែមអំពីវិធីថែទាំ ការបង្ការនិងព្យាបាលជំងឺ ក៏ដូចជាការបង្កាត់ពូជ។ ក្រោយរយះពេលស្វែងយល់ បងក៏ចាប់ផ្តើមចិញ្ចឹមសាកល្បងប្រមាណ ១.០០០ ក្បាល នៅក្នុងអាង។ “ដំបូងឡើយ ខ្ញុំគ្រាន់តែចិញ្ចឹមសាកល្បងដើម្បីស្វែងយល់អំពីលក្ខណៈរបស់កង្កែប និងទីផ្សារប្រើប្រាស់។ ក្រោយមួយរយៈពេល ដោយឃើញកង្កែបធំធាត់ល្អ ទីផ្សារលំនឹងគួរសម ទើបខ្ញុំសម្រេចចិត្តពង្រីកទ្រង់ទ្រាយ ទន្ទឹមនឹងនោះ បង្កាត់ពូជដើម្បីម្ចាស់ការប្រភពពូជ” បង ថាច់ វង្សាបានចែករំលែក។

ទិដ្ឋភាពទាំងមូលនៃអាងចិញ្ចឹមកង្កែបទំនិញរបស់បង ថាច់ វង្សា។

ផ្តើមពីអាងចិញ្ចឹមសាកល្បងដំបូង មកទល់ពេលនេះ បង វង្សា បានអភិវឌ្ឍឡើងដល់ ២៨ អាងចិញ្ចឹមកង្កែប អាងនីមួយៗមានផ្ទៃដី ៣ x ៥ ម៉ែត្រ។ តាមប្រសាសន៍របស់បង កង្កែបគឺជាសត្វចិញ្ចឹមដែលមានរយៈពេលធំធាត់ខ្លី បើទទួលបានការថែទាំល្អ ធានាប្រភពទឹក និងចំណីសមស្រប នោះក្រោយរយៈពេលជាង ៣ ខែ អាចប្រមូលផលបានហើយ។ ដើម្បីឱ្យហ្វូងកង្កែបធំធាត់បានល្អ បងផ្តោតសំខាន់លើដំណាក់កាលអនាម័យ និងគ្រប់គ្រងប្រភពទឹក ដោយផ្លាស់ប្តូរទឹកជាទៀងទាត់ប្រមាណ ២ លើក/ថ្ងៃ។ ចំណីត្រូវផ្តល់ឱ្យតាមដំណាក់កាលនីមួយៗ ធានាត្រូវតាមកម្រិត ជៀសវាងការសេសសល់ដែលប៉ះពាល់ដល់គុណភាពទឹក។ ពេលកង្កែបមានទម្ងន់សមស្រប បងក៏លក់ចេញឱ្យឈ្មួញ។ តម្លៃកង្កែបទំនិញអាស្រ័យលើពេលវេលានីមួយៗ មានពេលខ្លះទាបប្រមាណ ២៧.០០០ - ៣២.០០០ ដុង/គីឡូក្រាម។ បង វង្សា បានឱ្យដឹង៖ ដើម្បីចិញ្ចឹមកង្កែបសម្រេចបានប្រសិទ្ធភាព អ្នកចិញ្ចឹមត្រូវតាមដានហ្វូងកង្កែបជាប្រចាំ ពិសេសគឺថ្ងៃដែលអាកាសធាតុផ្លាស់ប្តូរ ឬបរិស្ថានទឹកមិនស្អាត។ តាមរយៈការចិញ្ចឹមជាក់ស្តែង បងពិនិត្យឃើញថាជំងឺដែលជួបញឹកញាប់នៅលើកង្កែបគឺទល់ខ្យល់ និងហើមពោះ។ ពេលឃើញកង្កែបមានអាការៈមិនប្រក្រតី បងម្ចាស់ការដោះស្រាយតាមការណែនាំបច្ចេកទេស គួបផ្សំនឹងការកែសម្រួលប្រភពទឹក ចំណី និងប្រើប្រាស់ថ្នាំសមស្រប ដើម្បីបន្ថយអត្រាខូចខាត។

កង្កែបពូជដែលបង ថាច់ វង្សា បង្កាត់ ត្រៀមលក់ជូនអតិថិជនចិញ្ចឹមកង្កែបទំនិញ។

ទន្ទឹមនឹងការចិញ្ចឹមកង្កែបទំនិញ បង វង្សា នៅទាំងស្វ័យបង្កាត់ពូជដើម្បីលក់ជូនគ្រួសារដែលមានតម្រូវការ។ អាស្រ័យម្ចាស់ការប្រភពពូជ បងបន្ថយបានការចំណាយដើមទុនសម្រាប់គ្រួសារផង ទាំងមានបន្ថែមប្រភពចំណូលផង។ គ្រួសារដែលទិញកង្កែបពូជក៏បានបងចែករំលែកបទពិសោធន៍អំពីរបៀបធ្វើអាង ថែទាំ ផ្តល់ចំណី និងតាមដានដំណើរការធំធាត់របស់កង្កែប។ បងបានឱ្យដឹង៖ រយៈពេលដំបូងនៃការស្វ័យបង្កាត់ពូជជួបការលំបាកមិនតិចឡើយ ប៉ុន្តែដោយសារព្យាយាមស្វែងយល់ រៀនសូត្របទពិសោធន៍ ទើបមានរបៀបធ្វើសមស្រប ដូច្នេះការបង្កាត់ពូជកាន់តែមានភាពងាយស្រួល។ បច្ចុប្បន្ន ក្រៅពីការផ្គត់ផ្គង់កង្កែបទំនិញជូនឈ្មួញ បងនៅទាំងលក់កូនពូជជូនប្រជាជនក្នុងនិងក្រៅភូមិភាគទៀតផង។

ផ្តើមពីទម្រង់ចិញ្ចឹមសាកល្បងដំបូង បច្ចុប្បន្ន ទម្រង់ចិញ្ចឹមកង្កែបទំនិញគួបផ្សំនឹងការបង្កាត់ពូជរបស់បង បានអភិវឌ្ឍយ៉ាងស្ថិរភាព នាំមកនូវប្រភពចំណូលរាប់សិបលានដុង។ មិនត្រឹមតែបង្កបន្ថែមចំណូលសម្រាប់គ្រួសារប៉ុណ្ណោះទេ ទម្រង់នេះនៅទាំងរួមចំណែកផ្គត់ផ្គង់កូនពូជ និងចែករំលែកបទពិសោធន៍ជូនគ្រួសារទាំងឡាយដែលចង់អភិវឌ្ឍមុខរបរចិញ្ចឹមកង្កែបនៅភូមិភាគ។ តាមរយៈនោះ បង្ហាញឱ្យឃើញ៖ ការហានស្វែងយល់ រៀនសូត្រ និងជ្រើសរើសទម្រង់សមស្របនឹងមានលក្ខណៈជាក់ស្តែង អាចជួយឱ្យប្រជាជនបង្កការរកស៊ីនៅនឹងស្រុកកំណើត កាត់បន្ថយការចេញទៅធ្វើការស្រុកឆ្ងាយ៕

ទីទុយ-មេងលី

ចែករំលែកអត្ថបទ

ពាក្យគន្លឹះ