- គណៈកម្មាធិការប្រជាជនទីក្រុងកឹងធើ ទើបដាក់ចេញផែនការអនុវត្តគម្រោង “ឧបត្ថម្ភមុខរបរចិញ្ចឹមជីវិតជូនប្រជាជន និងលើកកម្ពស់សមត្ថភាពបន្សាំនឹងការប្រែប្រួលអាកាសធាតុសម្រាប់សហគមន៍នៅទីក្រុងកឹងធើ” ដំណាក់កាល ២០២៦-២០២៨ ដោយថវិកាសរុប ១២,៦ ពាន់លានដុង។ គម្រោងនេះទទួលបានការឧបត្ថម្ភពីអង្គការ Merry Year International (MYI) នៃសាធារណរដ្ឋកូរ៉េ។
គម្រោងបានអនុវត្តនៅឃុំវិញវៀន និងឃុំលឿងតឹម ដែលជាតំបន់រងផលប៉ះពាល់នៃការជ្រៀបចូលទឹកប្រៃ និងគ្រោះរាំងស្ងួត។ សមាសភាពចូលរួម រួមមាន៖ គ្រួសារក្រីក្រ គ្រួសារក្បែរក្រ គ្រួសារជួបការលំបាក ក្រុមងាយរងគ្រោះដោយសារការប្រែប្រួលអាកាសធាតុ គ្រួសារផលិត ជួញដូរ គ្រួសារប្រកបមុខរបរត្បាញបន្ទោះ ត្បាញកំប្លោក និងរបរសិប្ប-ឧស្សាហកម្ម ព្រមទាំងករណីទាំងឡាយដែលត្រូវការឧបត្ថម្ភមុខរបរចិញ្ចឹមជីវិតតាមការស្នើរបស់រដ្ឋអំណាចភូមិភាគ។ សកម្មភាពឧបត្ថម្ភសំខាន់ៗ រួមមាន៖ កែលម្អ និងដំឡើងស្ថានីយវាស់កម្រិតប្រៃ និងគុណភាពទឹក; បំពាក់ឧបករណ៍បម្រើការវាស់ស្ទង់និងគ្រប់គ្រងប្រភពទឹក; ថែទាំ និងជួសជុលហេដ្ឋារចនាសម្ព័ន្ធ; កែលម្អនិងលើកកម្ពស់គុណភាព ទំនប់ និងទ្វារបិទទឹក; បង្កើតហេដ្ឋារចនាសម្ព័ន្ធបច្ចេកវិទ្យាព័ត៌មាន និងសារគមនាគមន៍បម្រើការបង្ការខូចខាតដោយសារគ្រោះរាំងស្ងួត និងទឹកប្រៃ។
តាមផែនការ គម្រោងនឹងកសាងនិងពង្រីកជាបណ្តើរៗនូវទម្រង់ឧបត្ថម្ភមុខរបរចិញ្ចឹមជីវិតបន្សាំនឹងការប្រែប្រួលអាកាសធាតុ ផ្សារភ្ជាប់នឹងការផ្ទេរវិទ្យាសាស្ត្របច្ចេកទេស ចងសម្ព័ន្ធជាមួយអាជីវកម្ម និងឈ្មួញប្រមូលទិញផលិតផល ដោយទិសដៅបង្កើនប្រាក់ចំណេញយ៉ាងតិច ១០% បើធៀបនឹងវិធីសាស្ត្របង្កបង្កើនផលតាមបែបប្រពៃណី។ គណៈកម្មាធិការប្រជាជនទីក្រុងប្រគល់ភារកិច្ចជូនមន្ទីរកសិកម្ម និងបរិស្ថានធ្វើជាអធិបតី សហការជាមួយស្ថាប័ន អង្គភាពពាក់ព័ន្ធ ប្រឹក្សាយោបល់រៀបចំអនុវត្តផែនការ; តាមដានល្បឿន ត្រួតពិនិត្យ វាយតម្លៃ និងរាយការណ៍លទ្ធផលអនុវត្តតាមសេចក្ដីកំណត់៕
កៀងក្វឹក - ថាច់ធី
ពាក្យគន្លឹះ
