ព្រឹត្តិការណ៍ - នយោបាយ ព្រឹត្តិការណ៍

07/09/2026 - 17:52

ចេញដំណើររួមបំបាត់ផ្ទះបណ្តោះអាសន្ន ផ្ទះទ្រុឌទ្រោមជូនកូនបង្កើតរបស់អ្នកដែលចូលរួមតស៊ូក្នុងសម័យសង្គ្រាម រងផលប៉ះពាល់ដោយសារធាតុគីមីពុលនៅឃុំយាហ្វា

(អ.ឡ) - ព្រឹកថ្ងៃទី៧ ខែកញ្ញា គណៈកម្មាធិការប្រជាជនឃុំយាហ្វាចាត់តាំងពិធីចេញដំណើរបំបាត់ផ្ទះបណ្តោះអាសន្ន ផ្ទះទ្រុឌទ្រោមដល់កូនបង្កើតរបស់អ្នកដែលបានចូលរួមតស៊ូក្នុងសម័យសង្គ្រាម រងផលប៉ះពាល់ដោយសារធាតុគីមីពុលនៅលើភូមិឋានឃុំ។

លោកត្រឹងវ៉ាំងជិញ សមាជិកគណៈអចិន្ត្រៃយ៍គណៈកម្មាធិការបក្សទីក្រុង អនុប្រធានប្រចាំការគណៈកម្មាធិការរណសិរ្សមាតុភូមិវៀតណាមទីក្រុងកឹងធើ; លោកវរសេនីយ៍ឯក ហ្វិញថាញហ៊ុង ស្នងការនយោបាយរងគណៈបញ្ជាការយោធាទីក្រុងកឹងធើ និងជាស្នងការនយោបាយនៃគណៈបញ្ជាការកងទ័ពការពារព្រំដែនទីក្រុង អញ្ជើញចូលរួមពិធី។

លោកត្រឹងវ៉ាំងជិញ (កណ្តាល) សមាជិកគណៈអចិន្ត្រៃយ៍គណៈកម្មាធិការបក្សទីក្រុង អនុប្រធានប្រចាំការគណៈកម្មាធិការរណសិរ្សមាតុភូមិវៀតណាមទីក្រុងកឹងធើ ប្រគល់ផ្ទាំងនិមិត្តរូបឧបត្ថម្ភសាងសង់ផ្ទះថ្មីជូនដល់គ្រួសារចំនួន៣គ្រួនៅឃុំយាហ្វា។

មានចំនួន៦គ្រួសារបានឧបត្ថម្ភសាងសង់ ជួសជុលផ្ទះ ក្នុងនោះមាន៣ខ្នងសាងសង់ថ្មីនិង៣ខ្នងទៀតជួសជុល។ ជាក់ស្តែង នៅភូមិហ្វិញផឹម មានគ្រួសារ៖ លោកពូ ឡេថាញ់កុង លោកពូ ង្វៀងវ៉ាំងយឹង អ្នកមីង ឡេគឹមជឿង និងអ្នកមីង ផាមធីកឹមឡាយ; នៅភូមិហ្វាខាញមានគ្រួសារលោកពូ វ៉ូថាញញ៉ាងនិងគ្រួសារអ្នកមីង វ៉ូធីលៀង។

លោកវរសេនីយ៍ឯក ហ្វិញថាញហ៊ុង (ខាងឆ្វេង) ស្នងការនយោបាយរងគណៈបញ្ជាការយោធាទីក្រុងកឹងធើ នឹងជាស្នងការនយោបាយនៃគណៈបញ្ជាការកងទ័ពការពារព្រំដែនទីក្រុង ប្រគល់ផ្ទាំងនិមិត្តរូបឧបត្ថម្ភជួសជុលផ្ទះជូនដល់គ្រួសារចំនួន៣គ្រួនៅឃុំយាហ្វា។

ផ្ទះសាងសង់ថ្មីមួយខ្នងៗបានឧបត្ថម្ភ ១០០លានដុង ផ្ទះជួសជុលមួយខ្នងៗបានឧបត្ថម្ភ៥០លានដុង។ ថវិកាឧបត្ថម្ភសរុបផ្ទះទាំង៦ខ្នងគឺ៤៥០លានដុង ប្រភពថវិកាបានមកពីកម្មវិធីជំនួយបំបាត់ផ្ទះបណ្តោះអាសន្ន ផ្ទះទ្រុឌទ្រោម តាមរយៈមូលនិធិ "ដើម្បីអ្នកក្រ" មជ្ឈិមនិងគណៈចលនាមូលនិធិ "ដើម្បីអ្នកក្រ" ទីក្រុងកឹងធើ។

ថ្នាក់ដឹកនាំឃុំយាហ្វាជូនបាច់ផ្កាលើកទឹកចិត្តកងកម្លាំងចូលរួមឧបត្ថម្ភសាងសង់
និងជួសជុលផ្ទះ។

ដើម្បីឱ្យកម្មវិធីបានអនុវត្តត្រូវតាមល្បឿនដំណើរការ ធានាគុណភាព គណៈកម្មាធិការប្រជាជនឃុំយាហ្វាចង្អុលការឱ្យស្ថាប័នជំនាញនានា គណៈបញ្ជាការយោធាឃុំ នគរបាលឃុំ អង្គការនយោបាយ-សង្គមនិងគណៈប្រជាជននៃភូមិនានាសហការយ៉ាងជិតស្និទ្ធក្នុងដំណើរការអនុវត្ត; ទន្ទឹមនឹងនោះចូលរួមតាមដាន ត្រួតពិនិត្យ ឃ្លាំមើលល្បឿនដំណើរការ គុណភាពសំណង់និងការប្រើប្រាស់ថវិកាឱ្យចំគោលដៅ សន្សំសំចៃ បើកចំហនិងតម្លាភាព។

តំណាងគ្រួសារទាំងឡាយបានថ្លែងអំណរគុណចំពោះការយកចិត្តទុកដាក់ ឧបត្ថម្ភរបស់គ្រប់ថ្នាក់ គ្រប់ផ្នែក ព្រមទាំងសន្យាខិតខំពលកម្មផលិត ដើម្បីលំនឹងជីវភាព៕

ថាញតឹម - សុផន

ចែករំលែកអត្ថបទ

ពាក្យគន្លឹះ