ព្រឹត្តិការណ៍ - នយោបាយ ព្រឹត្តិការណ៍

24/08/2026 - 20:44

យុវជនឃុំធ្វឹងហ្វា ផុសផុលក្នុងសកម្មភាពអបអរសាទរទិវាបុណ្យជាតិ ២ កញ្ញា

ឆ្ពោះដល់ខួបអនុស្សាវរីយ៍លើកទី៨១ឆ្នាំ ទិវាបុណ្យជាតិនៃសាធារណរដ្ឋសង្គមនិយមវៀតណាម (០២/៩/១៩៤៥–០២/៩/២០២៦) សម្ព័ន្ធយុវជនឃុំធ្វឹងហ្វា ទីក្រុងកឹងធើ បានចាត់តាំងសកម្មភាពជាក់ស្តែងជាច្រើន ដើម្បីពង្រីកស្មារតីឈានមុខ និងស្ម័គ្រចិត្តរបស់យុវជន។ ចាប់ពីការបំភ្លឺដងផ្លូវជនបទ ជួយប្រជាជនបង្ខិតជិតបច្ចេកវិទ្យាឌីជីថល រហូតដល់ការបណ្តុះបណ្តាលវិជ្ជាជីវៈ និងការយកចិត្តទុកដាក់ចំពោះកុមារ សកម្មភាពទាំងនេះបានបង្កនូវចំណាប់អារម្មណ៍ដ៏ល្អ និងរួមចំណែកកសាងមាតុភូមិកាន់តែស្រស់ស្អាតនិងស៊ីវិស័យ។

សមាជិកសម័្ពន្ធយុវជនរួមគ្នាដំឡើងអំពូលភ្លើងថាមពលព្រះអាទិត្យ។

ក្នុងប៉ុន្មានថ្ងៃនេះ នៅតាមដងផ្លូវជនបទភូមិត្រាកាញ់ ២A ឃុំធ្វឹងហ្វា រូបភាពអាវពណ៌បែតងរបស់សមាជិកសម្ព័ន្ធយុវជនបានស៊ាំភ្នែកសម្រាប់ប្រជាជននៅទីនេះ។ ដ្បិតគម្រោង “បំភ្លឺផ្លូវជនបទ” បានអនុវត្តលើដងផ្លូវប្រវែងជិត ៥០០ ម៉ែត្រ ដោយមានសមាជិកសម្ព័ន្ធយុវជនជាង ៤០ នាក់ ចូលរួមដំឡើងអំពូលភ្លើងថាមពលព្រះអាទិត្យចំនួន ៥០ ដើមដែលមានតម្លៃសរុបជាង ១៥ លានដុង។ គម្រោងនេះ មិនត្រឹមតែរួមចំណែកធ្វើឱ្យតំបន់ជនបទមានភាពភ្លឺ-បៃតង-ជ្រះ-ស្អាត និងមានសណ្តាប់ធ្នាប់ប៉ុណ្ណោះទេ ថែមទាំងជួយដល់ប្រជាជនធ្វើដំណើរបានកាន់តែងាយស្រួលនៅពេលយប់។ ពិសេស គម្រោងនេះក៏បង្ហាញពីស្មារតីទទួលខុសត្រូវរបស់យុវជនក្នុងការរួមដំណើរជាមួយភូមិភាគក្នុងការកសាងជនបទថ្មី។ ពូត្រឹងវ៉ាំងដេវ នៅភូមិត្រាកាញ់ ២A សម្តែងក្តីរីករាយ៖ “កាលពីមុន ដងផ្លូវនេះនៅពេលយប់ងងឹតឈឹង ប្រជាជនធ្វើដំណើរនិងអ្នកបើកបរយានយន្ត ក៏មានការព្រួយបារម្ភ ព្រោះកើតមានគ្រោះថ្នាក់ចរាចរណ៍ជាញឹកញាប់។ ឥឡូវនេះ សមាជិកសម្ព័ន្ធយុវជន បានមកដំឡើងអំពូលភ្លើងថាមពលព្រះអាទិត្យ ធ្វើឱ្យផ្លូវជនបទមានពន្លឺភ្លឺ ហើយការធ្វើដំណើរនៅពេលយប់ក៏មានសុវត្ថិភាពជាងមុន ដូច្នេះប្រជាជនមានសេចក្តីត្រេកអរយ៉ាងខ្លាំង។ នេះជាការងារដ៏មានអត្ថន័យជាក់ស្ដែង និងផ្តលប្រយោជន៍ដោយផ្ទាល់ដល់ប្រជាជនក្នុងភូមិ”។

អំពូលភ្លើងបានដំឡើងរួចរាល់ ធ្វើឱ្យផ្លូវជនបទក្នុងភូមិត្រាកាញ់ ២A ឃុំធ្វឹងហ្វា ទីក្រុងកឹងធើ ភ្លឺចិញ្ចាចនៅពេលរាត្រី។

មិនត្រឹមតែចូលរួមកសាងជនបទប៉ុណ្ណោះទេ យុវជនឃុំធ្វឹងហ្វា ក៏យកចិត្តទុកដាក់លើការផ្តល់បំណិននិងចំណេះដឹងដល់យុវជន។ តាមរយៈនោះ សម្ព័ន្ធយុវជនឃុំបានចាត់តាំងសកម្មភាពបណ្តុះបណ្តាលវិជ្ជាជីវៈ និងណែនាំអាជីពដល់សមាជិកសម្ព័ន្ធយុវជននិងយុវជនចំនួន ៥០ នាក់ នៅភូមិរបរតម្បាញបន្ទោះភូមិភឿកគ្វើយ។ នៅទីនេះ យុវជនបានចូលទស្សនានិងស្វែងយល់អំពីរបរតម្បាញបន្ទោះប្រពៃណី ព្រមទាំងទទួលបានការណែនាំដោយផ្ទាល់ពីជាងក្នុងភូមិរបរដែលចែករំលែកបទពិសោធន៍ និងណែនាំការអនុវត្តតាមដំណាក់កាលនីមួយៗ។

សកម្មភាពនេះ បានផ្តល់ឱកាសបន្ថែមដល់សមាជិកសម្ព័ន្ធយុវជន ឱ្យបានស្គាល់ពីរបរប្រពៃណីរបស់ភូមិស្រុក ដើម្បីរួមគ្នាថែរក្សានិងពង្រីកភូមិរបរប្រពៃណីរបស់សហគមន៍នៅភូមិភាគ។ សមាជិកសម្ព័ន្ធយុវជន គឹមង៉ុកប៊ិច ចែករំលែក៖ “តាមរយៈការចូលរួមវគ្គបណ្តុះបណ្តាលរបរតម្បាញ ខ្ញុំបានយល់ដឹងបន្ថែមអំពីតម្លៃនៃរបរប្រពៃណីរបស់ជនជាតិ។ ខ្ញុំក៏មានបំណងឱ្យសកម្មភាពនេះនៅតែបន្តអនុវត្តដើម្បីជួយឱ្យយុវជន ជាពិសេសយុវជនខ្មែរបានយល់ដឹងនិងស្រឡាញ់របរដែលបុព្វបុរសបានបន្សល់ទុក ហើយរួមគ្នាថែរក្សានិងលើកកម្ពស់របរប្រពៃណីជនជាតិរបស់ភូមិភាគ”។

ក្នុងដំណើរការផ្លាស់ប្តូរឌីជីថល យុវជនឃុំធ្វឹងហ្វា បន្តពង្រីកតួនាទីស្នូលរបស់ខ្លួនក្នុងសកម្មភាព “ប្រជាសិក្សាឌីជីថល”។ យុវជនបានចុះទៅណែនាំប្រជាជនដោយផ្ទាល់អំពីការប្រើប្រាស់ទូរស័ព្ទឆ្លាតវៃ ការដំឡើងនិងបើកដំណើរការគណនី VNeID ព្រមទាំងជួយប្រជាជនបង្ខិតជិតអត្ថប្រយោជន៍ឌីជីថល។ ដោយវិធីណែនាំដែលជិតស្និទ្ធនិងងាយយល់ ក្រុមយុវជនបានជួយប្រជាជនឱ្យចាប់ផ្តើមស្គាល់បច្ចេកវិទ្យាជាបណ្តើរៗ និងមានភាពងាយស្រួលជាងមុនក្នុងការអនុវត្តបែបបទរដ្ឋបាលតាមប្រព័ន្ធឌីជីថល។ សកម្មភាពនេះ រួមចំណែកពង្រីកតួនាទីឈានមុខនិងស្ម័គ្រចិត្តរបស់យុវជនឃុំធ្វឹងហ្វា ក្នុងដំណើរការផ្លាស់ប្តូរឌីជីថល ដោយនាំយកបច្ចេកវិទ្យាកាន់តែខិតជិតនឹងប្រជាជន និងរួមចំណែកកសាងសង្គមឌីជីថល និងពលរដ្ឋឌីជីថលចាប់ពីមូលដ្ឋាន។

សមាជិកសម្ព័ន្ធយុវជនឃុំធ្វឹងហ្វា ចុះទៅតាមផ្ទះដើម្បីណែនាំប្រជាជនដំឡើងកម្មវិធី VneID។

ជាមួយគ្នានេះ នៅសាលាបឋមសិក្សាធ្វឹងហ្វា យុវជនឃុំធ្វឹងហ្វា សហការជាមួយសម្ព័ន្ធយុវជនសាលាកសិកម្មនៃសាកលវិទ្យាល័យកឹងធើ ចាត់តាំងកម្មវិធីសកម្មភាពរដូវវិស្សមកាលសម្រាប់កុមារ។ ក្នុងកម្មវិធីនេះ ប្អូនៗកុមារបានទទួលការផ្សព្វផ្សាយ និងស្វែងយល់អំពីប្រពៃណីប្រវត្តិសាស្ត្រដ៏រុងរឿងរបស់ជនជាតិ ក្នុងឱកាសខួបអនុស្សាវរីយ៍លើកទី៨១ឆ្នាំ ទិវាបុណ្យជាតិ ២ កញ្ញា។ ប្អូនៗកុមារបានស្តាប់និងរំលឹកឡើងវិញនូវប្រវត្តិសាស្ត្រដ៏រុងរឿងរបស់ប្រទេសជាតិ និងយល់ដឹងកាន់តែស៊ីជម្រៅអំពីអត្ថន័យនៃឯករាជ្យ សេរីភាព និងសន្តិភាព។ ផ្ដើមពីនោះ រួមចំណែកបណ្តុះទឹកចិត្តស្នេហាជាតិ មោទនភាពជាតិ ស្មារតីទទួលខុសត្រូវ និងបំណងប្រាថ្នាឈានទៅមុខរបស់យុវជនជំនាន់ក្រោយជាមួយមាតុភូមិនិងប្រទេសជាតិ។ ក្នុងកម្មវិធីនេះ សម្ព័ន្ធយុវជនឃុំក៏បានជូនអំណោយ ២០ ចំណែកដល់សិស្សានុសិស្សដែលមានជីវភាពលំបាក ដើម្បីផ្តល់ក្តីរីករាយនិងកម្លាំងចិត្តឱ្យប្អូនៗ បន្តខិតខំរៀនសូត្របានល្អក្នុងឆ្នាំសិក្សាថ្មី។ លេខាសម្ព័ន្ធយុវជនឃុំធ្វឹងហ្វា ឡឹមវិញហាវ ឱ្យដឹង៖ “សកម្មភាពអបអរសាទរទិវាបុណ្យជាតិ ២ កញ្ញា បានអនុវត្តតាមទិសដៅជាក់ស្តែង ដោយភ្ជាប់ជាមួយតម្រូវការរបស់ភូមិភាគនិងប្រជាជន។ តាមរយៈគម្រោងនិងការងាររបស់យុវជន យើងខ្ញុំមានបំណងពង្រីកស្មារតីឈានមុខ និងស្ម័គ្រចិត្តរបស់សមាជិកសម្ព័ន្ធយុវជន ព្រមទាំងបង្កបរិយាកាសឱ្យយុវជនបានលត់ដំនិងលះបង់។ នៅពេលខាងមុខ សម្ព័ន្ធយុវជនឃុំនឹងបន្តកែលម្អខ្លឹមសារសកម្មភាព ដោយផ្តោតលើការផ្លាស់ប្តូរឌីជីថល ជួយឧបត្ថម្ភការប្រកបមុខរបរចិញ្ចឹមជីវិត ការកសាងជនបទថ្មីនិងការយកចិត្តទុកដាក់ចំពោះកុមារ”។

តាមរយៈគម្រោងនិងសកម្មភាពជាក់ស្តែងទាំងនេះ យុវជនឃុំធ្វឹងហ្វា កំពុងចូលរួមធ្វើឱ្យភូមិស្រុកកាន់តែស្រស់ស្អាត ដោយប្រើប្រាស់កម្លាំងយុវវ័យ ភាពក្លៀវក្លានិងស្មារតីទទួលខុសត្រូវរបស់ខ្លួន។ ដងផ្លូវបានបំភ្លឺ បំណិនថ្មីៗបានចែករំលែក ប្រជាជនទទួលបានការជួយបង្ខិតជិតក្នុងការប្រើប្រាស់បច្ចេកវិទ្យា និងសិស្សានុសិស្សបន្តបានទៅសាលារៀន។ល។ ទាំងអស់នេះ បានរួមចំណែក បង្កបរិយាកាសប្រឡងប្រណាំងយ៉ាងផុសផុលនិងមានអត្ថន័យ ឆ្ពោះដល់ខួបអនុស្សាវរីយ៍លើកទី៨១ឆ្នាំ ទិវាបុណ្យជាតិនៃសាធារណរដ្ឋសង្គមនិយមវៀតណាម (០២/៩/១៩៤៥ – ០២/៩/២០២៦)៕

យ៉ីអាញ - ពេជ្រសឿន

ចែករំលែកអត្ថបទ

ពាក្យគន្លឹះ