វប្បធម៌-សិល្បៈ វប្បធម៌

23/08/2026 - 15:48

ថាច់ហ្វិញឡុក – សិប្បករវ័យក្មេងសម្បូរទេពកោសល្យ

មិនត្រឹមតែស្នងបន្តរបរប្រពៃណីពីឪពុក ថាច់តឺ ដែលជាសិប្បករឆ្នើមប៉ុណ្ណោះទេ បងថាច់ហ្វិញឡុក កើតឆ្នាំ ១៩៩០ នៅឃុំចូវថាញ់ ខេត្តវិញឡុង ថែមទាំងអភិវឌ្ឍជំនាញក្នុងវិស័យចម្លាក់ សូនរូប និងរចនាក្បូរក្បាច់ខ្មែរទៀតផង។ ពិសេស បងបង្រៀនរបរឥតគិតថ្លៃ បង្កការងារធ្វើ និងរកប្រាក់ចំណូលដល់យុវជនជាច្រើននៅភូមិភាគ រួមចំណែកអភិរក្ស ពង្រីកតម្លៃវប្បធម៌ប្រពៃណីជនជាតិ។

បងថាច់ហ្វិញឡុក កំពុងផ្ចិតផ្ចង់ឆ្លាក់ព្រះពុទ្ធបដិមា។

កើតធំដឹងក្តីក្នុងគ្រួសារដែលផ្សារភ្ជាប់ជាមួយរបរចម្លាក់ សូនរូប ៣ ជំនាន់ បងថាច់ហ្វិញឡុក តាំងពីកុមារភាពបានចិញ្ចឹមក្តីប្រាថ្នាជាមួយរបរប្រពៃណីទៅហើយ។ ឪពុករបស់បង គឺសិប្បករឆ្នើមថាច់តឺ ជាអ្នកមានរយៈពេលយូរឆ្នាំផ្សារភ្ជាប់នឹងរបរ បានគេស្គាល់តាមរយៈសំណង់ចម្លាក់ និងសូនរូបនៅតាមវត្តខ្មែរនានា។ តាំងពីក្មេងមក បងឡុក បានឪពុកអស់ពីចិត្តបង្ហាត់បង្រៀនពីបច្ចេកទេសចម្លាក់ គូរគំនូរលើវត្ថុធាតុផ្សេងៗ សូនរូបព្រះពុទ្ធបដិមា និងរូបសំណាកផ្សេងៗតាមតម្រូវការរបស់អតិថិជន។ ឆ្លងតាមរយៈពេលរៀនរបរ បងយល់ថា វត្ថុធាតុនីមួយៗសុទ្ធតែមានលក្ខណៈពិសេសដោយឡែក ទាមទារមិនត្រឹមតែប៉ិនប្រសប់ អត់ធ្មត់ប៉ុណ្ណោះទេ ថែមទាំងត្រូវយល់ដឹងពីសិល្បៈ និងមានភាពច្នៃប្រតិដ្ឋពីផលិតផលនីមួយៗទៀតផង។

អាស្រ័យបានបង្ហាត់បង្រៀនរបរតៗមក និងរៀនសូត្រឥតឈប់ឈរ បងឡុក បានលើកកម្ពស់ថ្វីដៃជាបណ្តើរៗ អាចនឹងទទួលបន្ទុកការងារផ្សេងៗជាច្រើន។ បច្ចុប្បន្ន ភាគច្រើនការងាររបស់បងគឺអនុវត្តផ្នែកចម្លាក់ សូនរូប រចនាសម្រាប់សំណង់ធំៗនៅតាមវត្តខ្មែរ ដូច៖ វត្តសំរោងឯក វត្តស្លែងចាស់។ល។ បងចូលរួមមួយចំណែកក្នុងដំណាក់កាលអនុវត្តសំណង់ ទទួលបន្ទុកដំណាក់ការដែលសមស្របទៅនឹងមុខជំនាញ និងថ្វីដៃរបស់ខ្លួន។ ផ្តើមពីដុំថ្ម និងវត្ថុធាតុដើម តាមរយៈថ្វីដៃជាង រូបចម្លាក់ ក្បាច់រចនាប្រកបដោយលក្ខណៈវប្បធម៌ខ្មែរត្រូវបានបង្កើតឡើង។ បងឱ្យដឹង៖ របរនេះមិនត្រឹមតែត្រូវការទេពកោសល្យប៉ុណ្ណោះទេ ថែមទាំងត្រូវទ្រាំលំបាកហ្វឹកហាត់ ពីព្រោះសំណង់នីមួយៗមានតម្រូវការ និងលក្ខណៈពិសេសដោយឡែក។

សិប្បករវ័យក្មេងដែលបងថាច់ហ្វិញឡុកបណ្តុះបណ្តាល កំពុងបង្ហើយផលិតផលតាមដំណាក់ការនីមួយៗ។

ចំណុចគួរស្ងើចសរសើរចំពោះបងឡុក គឺក្នុងអំឡុងពេលប្រកបរបរ បងមិនលាក់បាំងការងារសម្រាប់តែខ្លួនឯងនោះទេ ប៉ុន្តែត្រៀមបង្ហាត់បង្រៀនតៗដល់អ្នកដែលមានតម្រូវការចង់រៀនផងដែរ។ យុវជនជាច្រើននៅភូមិភាគបានបងទទួលឱ្យចូលធ្វើការ រៀនរបរឥតគិតថ្លៃផង មានការងារធ្វើ និងប្រាក់ចំណូលផង។ ប្អូនថាច់ ហ្វាងណាម កើតឆ្នាំ ២០០១ ជានាក់ក្នុងចំណោមនាក់ដែលកំពុងធ្វើការ រៀនរបរនៅរោងជាងរបស់បង ឡុក។ ក្រោយចេញពីកងទ័ព ហ្វាងណាម បានបងទទួលឱ្យចូលធ្វើការ និងណែនាំតាំងពីដំណាក់ការសាមញ្ញៗ រហូតដល់ផ្នែកការងារដែលទាមទារបច្ចេកទេសខ្ពស់ជាង។ ដោយសារបានអនុវត្តជាប្រចាំ មកទល់ពេលនេះ ហ្វាងណាម អាចនឹងអនុវត្តបានការងារមួយចំនួនក្នុងវិស័យចម្លាក់ និងសូនរូប។ ហ្វាងណាម ចែករំលែក៖ ពីមុន ប្អូនមិនទាន់មានបទពិសោធន៍លើរបរនេះទេ។ នៅពេលបានបងឡុក ទទួលឱ្យចូលធ្វើការ ប្អូនបានរៀនរបរផង មានប្រាក់ចំណូលបន្ថែមដើម្បីលំនឹងជីវភាពផង។ ក្នុងដំណាក់កាលរៀន បងឡុកតែងអស់ពីចិត្តណែនាំ ចង្អុលបង្ហាញពីដំណាក់ការនីមួយៗ ជួយប្អូនមានកម្លាំងចលករបន្ថែមផ្សារភ្ជាប់នឹងរបរ។

ផលិតផលបង្ហើយ ត្រៀមប្រគល់ជូនអតិថិជន។

បើតាមបងថាច់ហ្វិញឡុក បង្ហាត់បង្រៀនរបរឥតគិតថ្លៃគឺជាអ្វីដែលឪពុកបងបានបង្រៀន និងរក្សាច្រើនឆ្នាំមកហើយ។ តាំងពីជំនាន់ឪពុកដល់ជំនាន់បង គ្រួសារតែងមានបំណងចង់ឱ្យអ្នកដែលស្រឡាញ់របរមានឱកាសរៀនសូត្រ មានអាជីព និងមានប្រាក់ចំណូលលំនឹង។ អាស្រ័យបានបង្ហាត់បង្រៀនរបរ មានអ្នកខ្លះបានពង្រឹងថ្វីដៃ អាចទទួលនិងអនុវត្តសំណង់នីមួយៗដោយខ្លួនឯង ជាជំហានលំនឹងជីវភាព។ បច្ចុប្បន្ន បងបង្កការងារធ្វើជាប្រចាំជូនពលករជាង ១០ នាក់នៅរោងជាង និងរួមគ្នាអនុវត្តសំណង់នៅតាមវត្តខ្មែរ។ អាស្រ័យលើសមត្ថភាព ម្នាក់ៗបានបែងចែកការងារសមស្រប ធ្វើផងរៀនសូត្រផង លើកកម្ពស់ថ្វីដៃ។

ជាមួយនឹងការស្នងបន្តពីគ្រួសារ ចំណង់ចំណូលចិត្ត និងស្មារតីចែករំលែក បងថាច់ហ្វិញឡុក ជាជំហានកំពុងបញ្ជាក់នូវតួនាទីជាសិប្បករវ័យក្មេងសម្បូរទេពកោសល្យមួយរូប រួមចំណែកផ្តល់សោភ័ណភាពបរិយាកាសតាមវត្តខ្មែរ និងអភិរក្សអត្តសញ្ញាណវប្បធម៌របស់ជនរួមជាតិខ្មែរណាមបូ៕

ទីទុយ - លីសៀ

ចែករំលែកអត្ថបទ

ពាក្យគន្លឹះ