មហាសាមគ្គីជនជាតិ គំរូក្នុងសហគមន៍

22/08/2026 - 20:43

កសិករថាច់អេះ រកបានប្រាក់ចំណូលបង្គួរ ដោយការចិញ្ចឹមមាន់ជល់លើកម្រាលជីវសាស្ត្រ រួមផ្សំការធ្វើចម្ការនិងធ្វើស្រែ

ដោយភាពឈ្លាសវៃក្នុងការអនុវត្តបច្ចេកទេសប្រើប្រាស់កម្រាលជីវសាស្ត្រក្នុងការចិញ្ចឹមមាន់ជល់ រួមផ្សំនឹងការធ្វើចម្ការ ៥ កុង និងធ្វើស្រែ ៥ កុង លោកថាច់អេះ នៅភូមិព្រែកឈូក ឃុំង៉ាយតឺ ខេត្តវិញឡុង មិនត្រឹមតែដោះស្រាយបញ្ហាបរិស្ថានប្រកបដោយប្រសិទ្ធភាពប៉ុណ្ណោះទេ ថែមទាំងកសាងជោគជ័យទម្រង់សេដ្ឋកិច្ចវិលជុំទៀតផង។ ប្រភពប្រាក់ចំណូលប្រមាណ ១៥០ លានដុងក្នុងមួយឆ្នាំ ពីទម្រង់ “៣ ក្នុង ១” នេះ បានជួយគ្រួសារលោកឈានឡើងចាកភាពក្រីក្រដោយចីរភាព និងលើកកម្ពស់គុណភាពជីវភាពរស់នៅ។

សំចៃប្រាក់ចំណាយ លើកកម្ពស់ប្រសិទ្ធភាព ដោយខ្សែសង្វាក់ផលិតបិទជិត

នៅពេលមកដល់ភូមិព្រែកឈូក ឃុំង៉ាយតឺ ខេត្តវិញឡុង សាកសួរពីទម្រង់ធ្វើសេដ្ឋកិច្ចមានប្រសិទ្ធភាពរបស់លោកថាច់អេះ (កើតឆ្នាំ ១៩៦១) មាមីងជនជាតិខ្មែរនៅទីនេះ នរណាក៏លាន់មាត់សរសើរគាត់ដែរ។ លើផ្ទៃដី ១០ កុងរបស់គ្រួសារ លោកថាច់អេះ បានរៀបចំយ៉ាងប៉ិនប្រសប់នូវទម្រង់ពហុដំណាំ ពហុសត្វ៖ ៥ កុងធ្វើស្រែពូជស្រូវ OM ៣ រដូវក្នុងមួយឆ្នាំ ចំណែក៥ កុងទៀតធ្វើចម្ការដាំដំណាំហូបផ្លែ មានដូច៖ មង្ឃុត ក្រូចថ្លុងសំបកក្រាស់ ប្រឡុងកុង សាវម៉ាវ ក្រូចពោធិ៍សាត់... និងតំបន់ទ្រុងចិញ្ចឹមមាន់ជល់បេនត្រែ ដោយទ្រង់ទ្រាយធំបង្គួរ។

លោកថាច់អេះ កំពុងថែទាំហ្វូងមាន់នៅកសិដ្ឋានរបស់ខ្លួន។

រៀងរាល់ឆ្នាំ លោកថាច់អេះ ចិញ្ចឹមមាន់ ៣ ល្បាស់ ក្នុងមួយល្បាស់ពី ៤០០ - ៥០០ ក្បាល។ ចំណុចពិសេសនៃទម្រង់ចិញ្ចឹមសត្វរបស់លោក គឺការប្រើប្រាស់កម្រាលជីវសាស្ត្រដោយប្រើអង្កាមលាយជាមួយផលិតផលអតិសុខុមប្រាណ។ វិធីសាស្ត្រនេះជួយឱ្យទ្រុងមាន់ស្ទើរតែគ្មានក្លិនស្អុយ មិនចំណាយកម្លាំងបោសសំអាតលាមកមាន់រាល់ថ្ងៃ អត្រាមាន់ងាប់និងជំងឺឆ្លងក៏បានថយចុះជាអតិបរមា។

ចែករំលែកអំពីការចាប់យករបរចិញ្ចឹមសត្វ និងបណ្តាថ្ងៃដំបូងជួបការលំបាក លោកថាច់អេះ បានឱ្យដឹងទាំងក្ដីរីករាយ៖ “ខ្ញុំចាប់ផ្តើមចិញ្ចឹមមាន់ជល់បេនត្រែ ប្រមាណ ២ ឆ្នាំមុននេះ។ ពូជមាន់នេះមានសាច់ឆ្ងាញ់ ម៉្លោះហើយទីផ្សារនិយមចូលចិត្តណាស់។ កាលដំបូងមិនទាន់មានបទពិសោធន៍ ខ្ញុំចិញ្ចឹមចំនួន ៤០០ ក្បាល ប៉ុន្តែត្រូវខាតបង់អស់មួយចំនួន។ សំណាងល្អបានកូនប្រសារៀនផ្នែកបសុពេទ្យណែនាំវិធីថែទាំ ចាក់វ៉ាក់សាំងការពារជំងឺ ព្រមទាំងបានចូលរួមបណ្តាវគ្គហ្វឹកហាត់បច្ចេកទេសដែលភូមិភាគចាត់តាំង ទើបខ្ញុំក្តាប់បានបែបបទនៃការចិញ្ចឹម”។

លោកថាច់អេះ បានឱ្យដឹងបន្ថែមទៀតថា ក្នុងមួយល្បាស់នៃការចិញ្ចឹមប្រមាណ ៤ ខែ មាន់អាចសម្រេចទម្ងន់ចាប់ពី ១,៥ ដល់ ២ គីឡូក្រាមក្នុងមួយក្បាល។ ដល់ពេលត្រូវលក់ ឈ្មួញបានចុះមកទិញដល់ផ្ទះ ក្នុងមួយថ្ងៃទិញប្រមាណ ៣០ ទៅ ៤០ ក្បាល ក្នុងតម្លៃប្រមាណ ៨០.០០០ ដុង/គីឡូក្រាម រហូតដល់លក់អស់ពីទ្រុង។

លោកថាច់អេះ នៅចម្ការឈើហូបផ្លែ ដែលជាផ្នែកមួយនៃទម្រង់សេដ្ឋកិច្ចវិលជុំ “៣ ក្នុង ១” របស់គ្រួសារ។

មិនត្រឹមតែលក់មាន់សាច់ប៉ុណ្ណោះទេ លោកថាច់អេះ នៅទាំងឆ្លៀតប្រើប្រាស់ប្រភពជីលាមកមាន់លើកម្រាលជីវសាស្ត្រ បន្ទាប់ពីលក់មាន់អស់ក្នុងមួយល្បាស់ៗ ដើម្បីធ្វើជីសរីរាង្គដាក់ចម្ការឈើហូបផ្លែ ៥ កុងទៀតផង។ ដោយប្រភពជីជីវសាស្ត្រដ៏សម្បូរនេះ ចម្ការដំណាំមានការលូតលាស់ខៀវស្រង៉ាត់ កាត់បន្ថយការប្រើប្រាស់ជីគីមីបានយ៉ាងច្រើន ប៉ុន្តែនៅតែផ្ដល់ទិន្នផលខ្ពស់។

“ដោយសារមានប្រភពជីលាមកមាន់ដាក់ចម្ការ ក្នុងមួយឆ្នាំៗខ្ញុំសំចៃបានប្រមាណ ១៥ លានដុង ថ្លៃទិញជីគីមី។ ប៉ុន្មានឆ្នាំនេះ ចម្ការឈើហូបផ្លែ៥កុងបានមកប្រាក់ចំណេញប្រមាណ ២០ លានដុងក្នុងមួយឆ្នាំ; ៥ កុងស្រែផលិតពូជស្រូវ OM ៣ រដូវ ចំណេញប្រមាណ ៣០ លានដុងក្នុងមួយឆ្នាំ។ បូករួមជាមួយប្រភពចំណូលពីមាន់ ៣ ល្បាស់ បន្ទាប់ពីទូទាត់ថ្លៃចំណាយទាំងអស់ គ្រួសារខ្ញុំសន្សំបានប្រមាណ ១៥០ លានដុងក្នុងឆ្នាំ។ ហេតុនោះ គ្រួសារខ្ញុំរួចផុតពីភាពក្រីក្រ និងមានជីវភាពកាន់តែធូរធារ” – លោកថាច់អេះ បាននឹក គិតឡើងវិញជាមួយស្នាមញញឹមស្រស់ស្រាយ។

ចំណុចលេចធ្លោសម្រាប់ពង្រីកនៅក្នុងសហគមន៍

ទម្រង់ “ចិញ្ចឹមមាន់ប្រើប្រាស់កម្រាលជីវសាស្ត្រ + ដាំចម្ការ + ធ្វើស្រែ” របស់គ្រួសារលោកថាច់អេះ មិនត្រឹមតែនាំមកនូវប្រសិទ្ធភាពសេដ្ឋកិច្ចជាក់ស្តែងសម្រាប់គ្រួសារប៉ុណ្ណោះទេ ថែមទាំងក្លាយជាគំរូដ៏លេចធ្លោសម្រាប់គ្រួសារជាច្រើនក្នុងភូមិធ្វើតាម រួមចំណែកជំរុញចលនាកសិករប្រឡងប្រណាំងផលិត ធ្វើអាជីវកម្មពូកែនៅភូមិភាគ។

តាមការវាយតម្លៃអំពីទម្រង់អភិវឌ្ឍន៍សេដ្ឋកិច្ចរបស់លោកថាច់អេះ លោកថាច់សាងសាធី – អនុលេខាសាខាបក្សភូមិព្រែកឈូក បានបញ្ជាក់៖ “ទម្រង់សេដ្ឋកិច្ចរបស់គ្រួសារពូថាច់អេះ គឺជាគំរូមួយសម្រាប់ទិសដៅអភិវឌ្ឍន៍កសិកម្មប្រកបដោយចីរភាពនៅភូមិភាគ។ ការដែលពូម្ចាស់ការធ្វើឱ្យសម្បូរបែបនូវដំណាំដាំដុះ និងសត្វចិញ្ចឹម – ចាប់ពីការផលិតស្រូវ ដាំឈើហូបផ្លែ រហូតដល់ការចិញ្ចឹមបសុបក្សី គឺបានបង្កប្រភពចំណូលស្ថិរភាព កាត់បន្ថយហានិភ័យប្រែប្រួលតម្លៃនៅលើទីផ្សារ។ ជាពិសេស ការអនុវត្តវិទ្យាសាស្ត្រក្នុងការចិញ្ចឹមសត្វ ដូចការចាក់វ៉ាក់សាំងតាមពេលកំណត់ និងការកែច្នៃកម្រាលជីវសាស្ត្រធ្វើជាជីសរីរាង្គ មិនត្រឹមតែជួយលើកកម្ពស់ទិន្នផលប៉ុណ្ណោះទេ ថែមទាំងដោះស្រាយបានយ៉ាងល្អនូវបញ្ហាបំពុលបរិស្ថាននៅជនបទទៀតផង។ នេះជាទម្រង់គំរូគួរឱ្យសរសើរសម្រាប់បងប្អូនមាមីងនៅក្នុងភូមិសិក្សារៀនសូត្រ និងចែករំលែកបទពិសោធន៍ ដើម្បីរួមគ្នាពង្រីកការផលិត ឈានដល់ការធ្វើមានប្រកបដោយចីរភាព”។

ភាពតស៊ូ អត់ធ្មត់ ព្រមជាមួយស្មារតីខិតខំរៀនសូត្រវិទ្យាសាស្ត្រ - បច្ចេកទេស បានជួយឱ្យកសិករថាច់អេះ ធ្វើមានបានដោយស្របច្បាប់លើដីកំណើតរបស់ខ្លួន។ ទម្រង់សេដ្ឋកិច្ចវិលជុំរបស់លោក កំពុងរំលេចបន្ថែមនូវរូបភាពជនបទថ្មីស្អាតបាត ធូរធារ នៅឃុំង៉ាយតឺសព្វថ្ងៃ៕

ថាច់ធី

ចែករំលែកអត្ថបទ

ពាក្យគន្លឹះ