ព្រឹត្តិការណ៍ - នយោបាយ ព្រឹត្តិការណ៍

13/08/2026 - 08:32

ឡុងភូ បើកវគ្គបំប៉នបំណិន មុខជំនាញផ្សព្វផ្សាយ អប់រំច្បាប់ជូនដល់អ្នកមានប្រិយភាព

គណៈកម្មាធិការប្រជាជនឃុំឡុងភូ បានសហការជាមួយមន្ទីរជនជាតិនិងសាសនាទីក្រុងកឹងធើ ចាត់តាំងសន្និបាតបំប៉នបំណិន មុខជំនាញផ្សព្វផ្សាយ អប់រំច្បាប់ និងចលនាប្រជាជននៅតំបន់ជនជាតិភាគតិច ឆ្នាំ២០២៦ ជូនដល់អ្នកមានប្រិយភាព គណៈកម្មការបណ្តាវត្ត និងប្រធានភូមិនានាចំនួន ៨០ រូប នៅលើភូមិឋានឃុំ។

អ្នកតំណាងទាំងឡាយចូលរួមវគ្គបំប៉ន។

ក្នុងអង្គសន្និបាតអ្នកតំណាងទាំងឡាយបានស្តាប់អ្នករបាយការណ៍លើកយកបណ្តាប្រធានបទអំពីគោលនយោបាយ ច្បាប់ និងបំណិនផ្សព្វផ្សាយច្បាប់នៅតំបន់ជនជាតិភាគតិចមករាយការណ៍ជូន។ ក្នុងនោះ ផ្តោតសំខាន់ទៅលើគោលការណ៍ធំៗរបស់បក្ស និងច្បាប់ស្តីពីប្រជាធិបតេយ្យ សន្តិសុខសណ្តាប់ធ្នាប់នៅមូលដ្ឋាន; គោលនយោបាយដីធ្លីពិសេសដោយឡែកចំពោះតំបន់ជនជាតិភាគតិច; បណ្តាបញ្ហាគតិយុត្តិ និងយន្តការជំនួយផ្នែកច្បាប់ជូនជនជាតិភាគតិច; កម្មវិធីទិសដៅជាតិ និងសិទ្ធិទទួលផលប្រយោជន៍; ចំណេះដឹងទូទៅអំពីការងារផ្សព្វផ្សាយ អប់រំច្បាប់ និងបទប្បញ្ញត្តិនានាដែលមានការពាក់ព័ន្ធដល់អ្នករាយការណ៍ច្បាប់ និងអ្នកផ្សព្វផ្សាយច្បាប់... ក្រៅពីនោះ អ្នកតំណាងទាំងឡាយក៏បានផ្តល់ចំណេះដឹងបន្ថែមអំពីបំណិនប្រើប្រាស់បញ្ញាសិប្បនិម្មិត (AI) ក្នុងការងារផ្សព្វផ្សាយ អប់រំច្បាប់នៅតំបន់ជនជាតិភាគតិចផងដែរ។

តាមរយៈវគ្គបំប៉ននេះ អ្នកតំណាងទាំងឡាយបានលើកកម្ពស់សមត្ថភាព ពង្រីកតួនាទីជាកម្លាំងស្នូលក្នុងការងារផ្សព្វផ្សាយ អប់រំគោលនយោបាយ និងច្បាប់នៅមូលដ្ឋាន; រួមចំណែកអនុវត្តមានប្រសិទ្ធភាពនូវកម្មវិធីទិសដៅជាតិអភិវឌ្ឍន៍សេដ្ឋកិច្ច - សង្គម តំបន់ជនជាតិភាគតិចនិងកសាងផែនមហាសាមគ្គីទូទាំងជនជាតិក្នុងស្ថានភាពថ្មី។

យោងតាមមន្ទីរជនជាតិនិងសាសនាទីក្រុងកឹងធើ ចាប់ពីថ្ងៃទី១១ ដល់ថ្ងៃទី១៤ ខែសីហា នឹងរៀបចំវគ្គបំប៉នចំនួន ២០ ថ្នាក់ អំពីបំណិន មុខជំនាញផ្សព្វផ្សាយ អប់រំច្បាប់ និងឃោសនា ចលនាប្រជាជននៅតំបន់ជនជាតិភាគតិច ជូនដល់អ្នកមានប្រិយភាព គណៈកម្មការបណ្តាវត្ត និងប្រធានភូមិនានាជាង ១.៧០០ រូប នៅ ២០ ឃុំដែលលំបាកខ្លាំងរបស់ទីក្រុងកឹងធើ៕

យ៉ីអាញ - សុផន

ចែករំលែកអត្ថបទ

ពាក្យគន្លឹះ