ព្រឹត្តិការណ៍ - នយោបាយ ព្រឹត្តិការណ៍

10/08/2026 - 22:36

ធានាសន្តិសុខ សណ្តាប់ធ្នាប់នៅសាលាមធ្យមសិក្សាបំពេញវិជ្ជាបាលីណាមបូ

នៅរសៀលថ្ងៃទី១០ ខែសីហា សាលាមធ្យមសិក្សាបំពេញវិជ្ជាបាលីណាមបូ បានសហការជាមួយនគរបាលទីក្រុងកឹងធើ ចាត់តាំងទិវាទូទាំងប្រជាជនការពារសន្តិសុខមាតុភូមិឆ្នាំ២០២៦។ និមន្តនិងអញ្ជើញចូលរួមមាន ព្រះឧបជ្ឈាយ៍តាំងណោ ព្រះសុធម្មាធិបតីរង ក្រុមប្រឹក្សាវិន័យធ័រពុទ្ធសាសនាវៀតណាម ប្រធានសមាគមព្រះសង្ឃសាមគ្គីស្នេហាជាតិទីក្រុងកឹងធើ ព្រះចៅអធិការវត្តឃ្លាំង សង្កាត់សុកត្រាំងទីក្រុងកឹងធើ; លោកត្រឹមខាក់ទ្រុង នាយករងមន្ទីរជនជាតិនិងសាសនាទីក្រុង; លោកវរសេនីយ៍ឯកបម្រុង វ៉ហុងជី អនុប្រធានការិយាល័យសន្តិសុខផ្ទៃក្នុងនៃនគរបាលទីក្រុង; លោកថាច់ស៊ុង ចាងហ្វាងសាលាមធ្យមសិក្សាបំពេញវិជ្ជាបាលីណាមបូ; ថ្នាក់ដឹកនាំសង្កាត់សុកត្រាំង ព្រមទាំងលោកគ្រូ អ្នកគ្រូនិងសមណសិស្សជាង២០០អង្គនិងរូបរបស់សាលា។

ទិដ្ឋភាពនៃទិវាទូទាំងប្រជាជនការពារសន្តិសុខមាតុភូមិ ឆ្នាំ២០២៦ នៅសាលាមធ្យមសិក្សាបំពេញវិជ្ជាបាលីណាមបូ។

សាលាមធ្យមសិក្សាបំពេញវិជ្ជាបាលីណាមបូគឺជាកន្លែងសិក្សានិងបួសរៀនរបស់សមណសិស្សជនជាតិខ្មែរ រួមចំណែកក្នុងការបណ្តុះបណ្តាលធនធានមនុស្ស ថែរក្សានិងពង្រីកតម្លៃវប្បធម៌ ភាសា និងអក្សរសាស្ត្រខ្មែរណាមបូ។ ហេតុដូច្នេះហើយ ការកសាងបរិស្ថានសិក្សាប្រកបដោយស្ថិរភាពសាមគ្គីភាព និងសុវត្ថិភាព គឺមានអត្ថន័យសំខាន់ណាស់។ ចាប់ពីឆ្នាំ២០១៨ រហូតមកដល់បច្ចុប្បន្ន ទម្រង់ "៤ គ្មាន ៤មាន" ត្រូវបានសាលាបង្កើតឡើង និងបានធ្វើឱ្យជាក់ស្តែងតាមរយៈសកម្មភាពជាក់ស្តែង។ ទាំងនេះគឺជាខ្លឹមសារដែលជិតស្និទ្ធនឹងជីវភាពរស់នៅ សមស្របទៅនឹងបរិស្ថានអប់រំនិងចាំបាច់បន្តរក្សាជាប្រចាំ។

កិច្ចសន្ទនានៅសាលាមធ្យមសិក្សាបាលីណាមបូ។

ក្រៅពីកិច្ចសហការរវាងសាលាមធ្យមសិក្សាបំពេញវិជ្ជាបាលីណាមបូជាមួយការិយាល័យសន្តិសុខនយោបាយផ្ទៃក្នុងនៃនគរបាលទីក្រុង ត្រូវបានអនុវត្តយ៉ាងជិតស្និទ្ធ។ បណ្តាភាគីរក្សាការដោះដូរដំណឹង ពង្រឹងការផ្សព្វផ្សាយ អប់រំអំពីបទប្បញ្ញត្តិស្តីពីការការពារការសម្ងាត់របស់រដ្ឋ សន្តិសុខអ៊ីនធឺណិត បង្ការ ទប់ស្កាត់បទល្មើស និងទង្វើល្មើសច្បាប់ក្នុងវិស័យអប់រំ លើកកម្ពស់តួនាទីរបស់កម្មាភិបាល គ្រូបង្រៀន បុគ្គលិកក្នុងការទប់ស្កាត់ រកឃើញ និងរាយការណ៍ពីបទល្មើស...

លោកវរសេនីយ៍ឯកបម្រុង វ៉ហុងជី អនុប្រធានការិយាល័យសន្តិសុខផ្ទៃក្នុងនៃនគរបាលទីក្រុងកឹងធើ បានសំណូមពរសាលាមធ្យមសិក្សាបំពេញវិជ្ជាបាលីណាមបូ គប្បីបង្កើនកិច្ចសហការយ៉ាងជិតស្និទ្ធជាមួយកម្លាំងនគរបាល ក្នុងការក្តាប់ស្ថានការណ៍ ទប់ស្កាត់ និងដោះស្រាយករណីនានាដែលកើតឡើង ពង្រឹងកិច្ចដំណើរការនៃទម្រង់ការពារ បង្ការបទល្មើស និងសន្តិសុខសណ្តាប់ធ្នាប់ក្នុងបរិវេណសាលា រួមចំណែកកសាងសាលាសម្រេចបទដ្ឋានសុវត្ថិភាពអំពីសន្តិសុខ សណ្តាប់ធ្នាប់ និងកសាងរូបភាពដ៏ល្អប្រពៃរបស់សាលាមធ្យមសិក្សាបំពេញវិជ្ជាបាលីណាមបូឱ្យក្លាយជាសាលាដែលមានវប្បធម៌ អរិយធម៌ និងអភិវឌ្ឍន៍។ កម្មាភិបាល លោកគ្រូ អ្នកគ្រូ បុគ្គលិកបម្រើការងារ និងសមណសិស្សគ្រប់អង្គ សូមរួមគ្នាអនុវត្តឱ្យបានល្អនូវទិសស្លោក៖ "ស្វ័យបង្ការ - ស្វ័យគ្រប់គ្រង - ស្វ័យការពារ - ភ្ញាក់រលឹកគោរពច្បាប់" ជាពិសេសគឺត្រូវធ្វើឱ្យខ្លឹមសារ "៤មិន ៤មាន" ក្លាយជាសកម្មភាពជាក់ស្តែង ជាប្រចាំក្នុងការសិក្សា បំពេញការងារនិងប្រជុំជីវភាពប្រចាំថ្ងៃ។

ក្នុងឱកាសនេះ សមូហភាពនិងបុគ្គលដែលមានស្នាដៃឆ្នើមក្នុងចលនាទូទាំងប្រជាជនការពារសន្តិសុខមាតុភូមិ បានទទួលប័ណ្ណសរសើរពីគណៈកម្មាធិការប្រជាជនទីក្រុងកឹងធើ និងលិខិតសរសើរពីនគរបាលទីក្រុងកឹងធើផងដែរ៕

ទ្រឿងផល

ចែករំលែកអត្ថបទ

ពាក្យគន្លឹះ