ច្រើនឆ្នាំមកនេះ រូបភាពអ្នកគ្រូ ឡឹមធីគឹមតៀង នៅភូមិឃូ២ ឃុំញូយ៉ា ទីក្រុងកឹងធើ មានការមមាញឹកជាមួយដំណើរបញ្ជូនអំណោយ ជួយឧបត្ថម្ភសិស្សក្រីក្រ បានក្លាយជារូបភាពជិតស្និទ្ធរបស់មាមីងខ្មែរនៅទីនេះ។ អ្នកគ្រូវ័យក្មេងរូបនេះ បានយកចិត្តទុកដាក់ភ្ជាប់ទំនាក់ទំនងជាមួយសប្បុរសជន នាំយកក្តីស្រឡាញ់មកជូនអ្នកមានវាសនាមិនល្អ បន្សល់នូវចំណាប់អារម្មណ៍ល្អៗជាច្រើន ព្រមទាំងរួមចំណែកធ្វើឱ្យរីកសាយភាយស្មារតីចែករំលែកនៅក្នុងសហគមន៍។
(1).jpg "អ្នក \"បណ្តុះ\" ក្តីស្រឡាញ់នៅតំបន់ជនបទខ្មែរ")
អ្នកគ្រូឡឹមធីគឹមតៀង មានស្នាមញញឹមរីករាយពេលធ្វើសប្បុរសធម៌។
ឆ្នាំ ២០១៩ បន្ទាប់ពីប្រឡងបញ្ចប់សញ្ញាបត្រអនុមហាវិទ្យាល័យគរុកោសល្យអប់រំបឋមសិក្សា អ្នកគ្រូតៀង បានចុះកិច្ចសន្យាបង្រៀននៅសាលាបឋមសិក្សាថាញ់ភូ ១ ព្រមទាំងចូលរួមការងារយុវជន និងបានបោះឆ្នោតជ្រើសធ្វើជាលេខាសាខាសម្ព័ន្ធយុវជនភូមិឃូ ១។ ក្នុងរយៈពេលជាច្រើនឆ្នាំមកនេះ បន្ទាប់ពីម៉ោងបង្រៀននៅថ្នាក់ អ្នកគ្រូតៀងតែងចុះទៅស្វែងយល់ពីជីវភាពរស់នៅរបស់គ្រួសារក្រីក្រ ចាស់ជរាកំព្រា និងសិស្សានុសិស្សដែលមានជីវភាពលំបាក ដើម្បីស្វែងរកវិធីជួយឧបត្ថម្ភ។ នៅពេលយល់ច្បាស់ពីស្ថានភាពគ្រួសារនីមួយៗ អ្នកគ្រូតៀង បានអំពាវនាវដល់សប្បុរសជនឱ្យជួយជ្រោមជ្រែង។ ព្រោះអ្នកគ្រូតែងប្រកាន់ខ្ជាប់នូវគំនិតថា ក្រៅពីការផ្ទេរចំណេះដឹង គ្រូបង្រៀនត្រូវតែចេះស្តាប់ យល់ចិត្តនិងសកម្មជួយគាំទ្រដល់សិស្ស។ ជាពិសេស នៅពេលឃើញសិស្សក្រីក្រមកសាលាមានខោអាវចាស់រខេរខាក ខ្វះសៀវភៅពុម្ព សៀវភៅសរសេរ កង់... ធ្វើឱ្យអ្នកគ្រូមានចិត្តខ្វល់ខ្វាយជានិច្ច។ ចេញពីក្តីអាណិតអាសូរនោះ អ្នកគ្រូបានម្ចាស់ការភ្ជាប់ទំនាក់ទំនងជាមួយសប្បុរសជន និងអង្គការសប្បុរសធម៌ ដើម្បស្វែងរកប្រភពធនធានជួយឧបត្ថម្ភ។ ចាប់ពីអំណោយតូចៗដូចជា៖ សៀវភៅសរសេរ ឯកសណ្ឋាន កាតាបសិស្ស រហូតដល់អាហារូបករណ៍ កង់ ឬថវិកាជួសជុលផ្ទះសម្បែងសម្រាប់គ្រួសារដែលមានជីវភាពលំបាកខ្លាំង គឺសុទ្ធតែបានអ្នកគ្រូប្រគល់ជូនដោយផ្ទាល់ដៃដល់អ្នកត្រូវការជំនួយ។ អ្នកគ្រូតៀង ឱ្យដឹង៖ " ខ្ញុំគ្មានលទ្ធភាពជួយផ្ទាល់នោះទេ ប៉ុន្តែឃើញជីវភាពមាមីងណាលំបាកខ្លាំង ខ្ញុំក៏ថតរូប កត់ច្បាស់លាស់ពីស្ថានភាព រួចបង្ហោះជាសាធារណៈនៅលើទំព័រ Facebook និង Zalo ដើម្បីឱ្យសប្បុរសជនបានឃើញ។ តាមរយៈទំព័រផ្ទាល់ខ្លួនរបស់ខ្ញុំ មានសប្បុរសជនជាច្រើនបានស្វែងយល់និងចុះទៅផ្ទាល់ដល់ស្ថានភាពនីមួយៗដើម្បីជួយឧបត្ថម្ភ។ ឃើញមាមីងក្រីក្រមានផ្ទះនៅ មានបាយហូប មានខោអាវស្លៀកពាក់ សិស្សានុសិស្សមានអាវថ្មី មានកង់ជិះទៅសាលា... ខ្ញុំសប្បាយចិត្តណាស់ ឃើញថាកិច្ចការសប្បុរសធម៌ពិតជាមានអត្ថន័យ និងមានប្រយោជន៍សម្រាប់សង្គម ទើបកាន់តែមានកម្លាំងចិត្តធ្វើកិច្ចការជាច្រើនបន្ថែមទៀត"។
តាមរយៈសកម្មភាពជាក់ស្តែងក្នុងការជួយឧបត្ថម្ភដល់អ្នកក្រីក្រ ចាស់ជរាកំព្រា និងសិស្សានុសិស្សដែលមានជីវភាពលំបាករបស់អ្នកគ្រូតៀង ទើបទទួលបានការរួមដំណើរពីសប្បុរសជនកាន់តែច្រើនឡើងៗ។ ចាប់ពីឆ្នាំ ២០២០ មកដល់បច្ចុប្បន្ន អ្នកគ្រូតៀង បានអំពាវនាវដល់សប្បុរសជនជួយឧបត្ថម្ភថវិកាទិញរទេះរុញចំនួន ៤ គ្រឿងសម្រាប់អ្នកពិការ កង់ចំនួន ៦ គ្រឿងសម្រាប់សិស្សក្រីក្រ ផ្ទះមហាសាមគ្គីចំនួន ៤ ខ្នងសម្រាប់អ្នកក្រីក្រ ផ្ដល់អង្ករជាង ៤ តោនដល់គ្រួសារដែលមានជីវភាពលំបាក អំណោយជិត ៣០០ ចំណែកជូនដល់គ្រួសារក្រីក្រ និងអាហារូបករណ៍រាប់រយចំណែកសម្រាប់សិស្សក្រីក្រ... ដោយមានតម្លៃសរុបជាង ៥០០ លានដុង។ ក្រៅពីនេះ អ្នកគ្រូតៀង នៅទាំងជួយឧបត្ថម្ភទឹកប្រាក់ចំនួន ៥០ លានដុងសម្រាប់ថ្លៃបុណ្យសព និងក្តារមឈូសចំនួន ៧ ជូនដល់គ្រួសារជួបការលំបាកនៅពេលមានសាច់ញាតិស្លាប់។ ទន្ទឹមនឹងនោះ អ្នកគ្រូតៀង រួមជាមួយសមាជិកនៃសាខាសម្ព័ន្ធយុវជនភូមិបានរក្សា "ស្តង់ទំនិញ ០ ដុង" រួមមាន៖ ខោអាវ ស្បែកជើង និងសម្ភារប្រើប្រាស់ចាំបាច់ផ្សេងៗ ដើម្បីឱ្យប្រជាជនដែលមានជីវភាពលំបាកអាចទទួលយកនៅពេលត្រូវការ។ ដោយសកម្មភាពរបស់អ្នកគ្រូតៀង មានស្ថានភាពក្រីក្រជាច្រើនបានជួយឧបត្ថម្ភ ជំរុញទឹកចិត្តដើម្បីឱ្យពួកគាត់ជម្នះការលំបាក។ អ្នកមីង ថាច់ធីចៀង នៅភូមិឃូ ២ ឱ្យដឹង៖ "អាស្រ័យបានអ្នកគ្រូតៀង អំពាវនាវដល់សប្បុរសជន ទើបខ្ញុំមានផ្ទះថ្មរឹងមាំរស់នៅ លែងព្រួយបារម្ភពីរឿងភ្លៀងស្រក់ លែងខ្លាចផ្ទះបាក់រលំនៅពេលមានភ្លៀងខ្យល់ទៀត។ បច្ចុប្បន្ន ដោយដឹងថាខ្ញុំរស់នៅម្នាក់ឯង សប្បុរសជនតែងតែមកដល់ផ្ទះជួយឧបត្ថម្ភអង្ករ ទឹកដោះគោ មី ប្រាក់... ដូច្នេះខ្ញុំដឹងគុណយ៉ាងជ្រាលជ្រៅ។ អ្នកគ្រូតៀងនៅក្មេង ប៉ុន្តែមានទឹកចិត្តជួយសង្គ្រោះដល់មាមីងប្រជាជនក្រីក្រ ពិតជាគួរឱ្យគោរពកោតសរសើរណាស់"។
.jpg "អ្នក \"បណ្តុះ\" ក្តីស្រឡាញ់នៅតំបន់ជនបទខ្មែរ")
អ្នកគ្រូឡឹមធីគឹមតៀង ជូនប្រាក់និងអំណោយដល់សិស្សក្រីក្រ។
ចំណុចគួរឱ្យគោរពរបស់អ្នកគ្រូតៀង គឺគ្រប់សកម្មភាពសប្បុរសធម៌ទាំងអស់សុទ្ធតែបានអនុវត្តដោយខ្ជាប់ខ្ជួន និងមិនអួតអាងឡើយ។ អ្នកគ្រូគិតថា នៅពេលយើងរស់នៅដោយស្មោះត្រង់ និងបើកចំហ ប្រកាសប្រាប់ច្បាស់លាស់នូវចំនួនថវិកាដែលសប្បុរសជនបានបរិច្ចាគ នោះនឹងទទួលបានការទុកចិត្តពីសហគមន៍។ អាស្រ័យហេតុនេះ កាន់តែមានសប្បុរសជនជាច្រើនត្រៀមរួមដំណើរនៅក្នុងកម្មវិធីសប្បុរសធម៌ដែលអ្នកគ្រូបានភ្ជាប់ទំនាក់ទំនង។ ចាប់ពីអំណោយមួយចំនួនតូចនៅពេលចាប់ផ្តើម រហូតមកដល់ពេលនេះ សិស្សក្រីក្ររាប់រយនាក់ និងគ្រួសារខ្មែរដែលមានជីវភាពលំបាកជាច្រើន ទទួលបានការជួយឧបត្ថម្ភទាន់ពេលវេលា រួមចំណែកកាត់បន្ថយបន្ទុកនៅក្នុងជីវភាព។ វាយតម្លៃចំពោះកិច្ចការរបស់អ្នកគ្រូតៀង លេខាសម្ព័ន្ធយុវជនឃុំញូយ៉ា លោកង្វៀងស្វឹងតៀង ឱ្យដឹង៖ "សមមិត្តឡឹមធីគឹមតៀង មានស្មារតីទទួលខុសត្រូវខ្ពស់ និងឈានមុខរាល់សកម្មភាពចលនា និងសុខុមាលភាពសង្គមនៅភូមិភាគ។ កិច្ចការដែលពោរពេញដោយអត្ថន័យសម្រាប់សហគមន៍ ជួយឧបត្ថម្ភមាមីងប្រជាជនខ្មែរក្រីក្រ និងសិស្សានុសិស្សដែលមានជីវភាពលំបាកនៅក្នុងឃុំរបស់អ្នកគ្រូតៀង គឺគួរតែបានស្ងើចសរសើរ។ ក្រៅពីនេះ អ្នកគ្រូតៀង នៅទាំងជាប្រធានក្រុមបច្ចេកវិទ្យាឌីជីថលសហគមន៍ ជួយឧបត្ថម្ភប្រជាជនដំឡើង ចុះឈ្មោះ និងប្រើប្រាស់កម្មវិធី VNeID ក្នុងដំណើរការផ្លាស់ប្តូរឌីជីថលទិន្នន័យជាតិអំពីចំនួនប្រជាជន ព្រមទាំងជួយចុះឈ្មោះបែបបទសេវារដ្ឋតាមប្រព័ន្ធអនឡាញជូនមាមីងប្រជាជន។ សមមិត្តតៀង សក្តិសមជាគំរូដ៏ភ្លឺស្វាងសម្រាប់សមាជិកសម្ព័ន្ធយុវជនផ្សេងទៀតរៀនសូត្រតាម ដូចពាក្យលោកប្រធាន ហូជីមិញ បានប្រដៅ៖ "ទីណាត្រូវការមានយុវជន ការងារណាពិបាកមានយុវជន"។
ចំពោះអ្នកគ្រូតៀង សុភមង្គលធំបំផុតមិនមែនជាពាក្យសរសើរ ឬស្នាដៃដែលសម្រេចបាននោះទេ ប៉ុន្តែជាស្នាមញញឹមរបស់សិស្សានុសិស្សនៅពេលបានបន្តទៅសាលារៀន ជាក្រសែភ្នែកភ្លឺថ្លារបស់គ្រួសារក្រីក្រនៅពេលទទួលបានការជួយឧបត្ថម្ភចំពេលវេលា។ នោះក៏ជាកម្លាំងចិត្តដើម្បីឱ្យអ្នកគ្រូបន្តដំណើរបណ្តុះក្តីស្រឡាញ់ ធ្វើឱ្យរីកសាយភាយនូវតម្លៃល្អៗនៅក្នុងជីវិត។ កិច្ចការដែលមានអត្ថន័យទាំងនោះ កំពុងតែបំផុសនូវជំនឿទុកចិត្តជារៀងរាល់ថ្ងៃ ផ្តល់ក្តីសង្ឃឹម ដើម្បីឱ្យស្ថានភាពលំបាកជាច្រើនបោះជំហានឈានឡើងនៅក្នុងជីវភាព៕
យ្វីអាញ - សុផន
ពាក្យគន្លឹះ
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
