ជាជនជាតិខ្មែរ គ្រួសារផ្សារភ្ជាប់នឹងរបរត្បាញបន្ទោះ ដូច្នេះ បងស្រីទ្រឿងធីបាត់ធ្វី នាយិការសហករណ៍ត្បាញផ្តៅនិងឫស្សីធ្វីត្វៀក នៅឃុំធ្វឹងហ្វា ទីក្រុងកឹងធើ តែងមានការប្តេជ្ញាចិត្តក្នុងការនាំយកផលិតផលពីឫស្សីទៅឆ្ងាយ។ ជាច្រើនឆ្នាំស្វែងរកទីផ្សារ បងធ្វីក៏សម្រេចបាននូវក្តីស្រមៃ គឺនាំយកផលិតផលទៅកាន់ពិភពលោក ព្រមទាំងរក្សាបានភូមិរបរប្រពៃណីរបស់ជនជាតិទៀតផង។
កើតនិងធំដឹងក្តីក្នុងគ្រួសារដែលផ្សារភ្ជាប់នឹងរបរត្បាញបន្ទោះប្រពៃណីជាច្រើនជំនាន់ នៅតំបន់ជនបទបាកលីវ (បច្ចុប្បន្នជាខេត្តកាម៉ាវ) ដូច្នេះ បងស្រីធ្វីយល់ច្បាស់ពីជីវភាព ក៏ដូចជាដំណាក់កាលនីមួយៗ ដើម្បីបង្កើតបានផលិតផលដែលធ្វើពីឫស្សី។ បងស្រីធ្វី ឱ្យដឹង៖ "កាលពីកុមារ ខ្ញុំបានយាយតា ឪពុកម្តាយបង្រៀនត្បាញកន្ត្រក កញ្ជើនិងសម្ភារៈប្រើប្រាស់ពីឫស្សី ម្ល៉ោះហើយ ធ្វើយូរៗទៅកាន់តែពេញចិត្តផ្សារភ្ជាប់នឹងរបរនេះ។ ឆ្នាំ២០០១ ខ្ញុំបើកមូលដ្ឋានអាជីវកម្មផលិតផលផ្តៅនិងឫស្សី កាលនោះ ផលិតផលប្លាស្ទីកមានប្រៀបជាង ធ្វើឱ្យផលិតផលត្បាញពីផ្តៅនិងឫស្សីជួបការលំបាកច្រើន ដូច្នេះ ត្រូវបោះបង់បង្វែរមកធ្វើអាជីកម្មលើវិស័យផ្សេងៗជាច្រើន"។
បងស្រីទ្រឿងធីបាត់ធ្វី (កណ្តាល) កំពុងឧទ្ទេសនាមពីផលិតផលសិប្បកកម្មរបស់សហករណ៍។
មួយរយៈពេលក្រោយមក ពេលអ្នកប្រើប្រាស់មានស្មារតីវិលមកប្រើប្រាស់ផលិតផលផ្តៅឫស្សី ដើម្បីការពារបរិស្ថាន បងស្រីធ្វីក៏បានត្រឡប់មកចាប់យករបរតម្បាញឫស្សី ហើយគាត់បានជ្រើសរើសស្រុកកំណើតជីតាខាងឪពុកនៅខេត្តសុកត្រាំង (ចាស់) បច្ចុប្បន្នជាទីក្រុងកឹងធើដើម្បីកសាងអាជីព។ ពេលសង្កេតឃើញពីសក្តានុភាពនៅធ្វឹងហ្វា មាមីងខ្មែរមានប្រពៃណីត្បាញបន្ទោះឫស្សី ឫស្សីពកជាប្រភពវត្ថុធាតុដើមដែលមានស្រាប់នៅភូមិភាគ គាត់ក៏បានសម្រេចចិត្តវិនិយោគ។ ឆ្នាំ២០២៣ ពេលទទួលបានការឧបត្ថម្ភពីរដ្ឋអំណាចភូមិភាគ បងស្រីក៏បង្កើតសហករណ៍ត្បាញផ្តៅនិងឫស្សីធ្វីត្វៀក ដើម្បីធ្វើទំនិញសិប្បកម្មនិងកសាងសំណង់ពីឫស្សីតាមតម្រូវការរបស់អតិថិជន។ ទិសដៅរបស់បងស្រីធ្វី គឺអភិវឌ្ឍមុខរបរ កសាងខ្សែសង្វាក់តភ្ជាប់ប្រមូលទិញនិងប្រើប្រាស់បណ្តាផលិតផលសិប្បកម្មដល់ប្រជាជនក្នុងតំបន់។ បងស្រីធ្វី ឱ្យដឹង៖ "ខ្ញុំសង្កេតឃើញនៅធ្វឹងហ្វាមានវត្ថុធាតុដើមស្រាប់ មានកម្លាំងកម្មករដែលមានចំណេះជំនាញ ប៉ុន្តែមុខរបរនេះកំពុងរងការបាត់បង់បន្តិចម្តងៗ។ ដោយសារពីមុន ផលិតផលដែលមាមីងធ្វើបានសំខាន់គឺបម្រើជីវភាពប្រចាំថ្ងៃ ដូច្នេះ វាមិនទាន់មានការច្នៃប្រតិដ្ឋនិងអភិវឌ្ឍពិតប្រាកដនៅឡើយ។ ក្រោយពីសិក្សារៀនសូត្រពីតំបន់ផ្សេងៗអស់រយៈកាលជាច្រើនឆ្នាំ ខ្ញុំគិតថាដើម្បីរក្សាភូមិរបរប្រពៃណីរបស់ជនជាតិក្នុងសម័យទំនើបនេះ ផលិតផលត្រូវសម្បូរបែប មានម៉ូដប្លែកៗ បង្កើតចេញនូវផលិតផលថ្មីៗជានិច្ច។ ហេតុនេះ ចាប់តាំងពីបង្កើតសហករណ៍មក ខ្ញុំបានណែនាំមាមីងធ្វើសម្ភារៈសិប្បកម្មដែលមានម៉ូដសម្បូរបែបនិងប្លែកៗ ដើម្បីងាយស្រួលក្នុងការលក់ចេញ"។
ទន្ទឹមនឹងការវិនិយោគនិងការប្តេជ្ញាចិត្តនាំយកផលិតផលទៅឆ្ងាយ ក្រៅពីការប្រើប្រាស់សមាជិកដែលមានចំណេះជំនាញ បងស្រីធ្វីនៅទាំងវិនិយោគលើឧបករណ៍ទំនើបៗជាច្រើន ដើម្បីបង្កើតផលិតផលសិប្បកម្មដ៏ស្រស់ស្អាត ឆ្លើយតបទៅនឹងតម្រូវការទីផ្សារ។ ផលិតផលសិប្បកម្មរបស់សហករណ៍ត្បាញផ្តៅនិងឫស្សី រួមមាន៖ ជាល កញ្ឆេ កន្ត្រកសម្រាមនៅភោជនីយដ្ឋាន កៅអី សម្ភារៈដាក់អាហារ ប្រអប់ដាក់ក្រដាស។ល។ មកទល់នឹងពេលនេះ សហករណ៍មានផលិតផលជាង៧០០ប្រភេទលក់ក្នុងប្រទេសនិងនាំចេញទៅប្រទេសក្រៅ មានដូច៖ ប្រទេសចិន ថៃ កម្ពុជា ស្វីស អាមេរិក។ល។ ដើម្បីមានផលិតផលគ្រប់សម្រាប់ផ្គត់ផ្គង់ដល់ទីផ្សារ បងស្រីធ្វីបានចងសម្ព័ន្ធជាមួយប្រជាជន ៧០ គ្រួសារនៅភូមិភាគ និងមាមីងជាង ២០០ នាក់ នៅបណ្តាខេត្តជិតខាង ដើម្បីរួមគ្នាធ្វើទំនិញសិប្បកម្ម។ របរត្បាញផ្តៅនិងឫស្សីសមស្របគ្រប់វ័យ ទាំងស្រីនិងប្រុស ដូច្នេះ បងស្រីធ្វីតែងបង្កលក្ខណៈល្អបំផុត ដើម្បីប្រជាជនស្ងប់ចិត្តពលកម្មផលិត។ អាស្រ័យហេតុនេះ គ្រួសារខ្មែរជាច្រើនមានប្រភពចំណូលបន្ថែម រួមចំណែកកាត់បន្ថយភាពក្រីក្រដោយចីរភាព។ បងស្រីថាច់ធីហាំង ផ្សារភ្ជាប់នឹងរបរជាង២០ឆ្នាំ ឱ្យដឹង៖ "ចាប់តាំងពីចូលរួមក្នុងសហករណ៍ ខ្ញុំមិនបារម្ភពីការស្វែងរកវត្ថុធាតុដើម ហើយលែងបារម្ភពីទំនិញលក់មិនបាន ព្រោះផលិតផលដែលធ្វើបានសុទ្ធតែបានសហករណ៍ធានាទិញ។ អាស្រ័យហេតុនេះ ទើបខ្ញុំមានប្រាក់ចំណូលបន្ថែម និងថែរក្សាបានមុខរបររបស់ឪពុកម្តាយបន្សល់មក។ ក្រៅពីនោះ បងស្រីធ្វី នៅទាំងជួយបង្រៀនរបរដោយឥតគិតថ្លៃដល់យុវជននិងបងប្អូននារីដែលមានស្ថានភាព លំបាក ដើម្បីអ្នកណាក៏មានមុខរបរ មានប្រាក់ចំណូលបន្ថែម"។
*បើកទិសដៅអភិវឌ្ឍទេសចរណ៍សហគមន៍
មិនបង្អង់ត្រឹមផលិតសិប្បកម្ម បងស្រីធ្វីនៅទាំងនាំមុខក្នុងការនាំយកផលិតផលឫស្សីពកទៅតុបតែងខាងក្នុងផ្ទះ សំណង់ផ្ទះឫស្សី homestay, resort…ដើម្បីទាក់ទាញភ្ញៀវទេសចរ។ ទន្ទឹមនឹងនោះ សហករណ៍នៅទាំងកសាងទម្រង់ទេសចរណ៍ឆ្លងបទពិសោធន៍ភូមិរបរ ដើម្បីភ្ញៀវបានត្បាញសម្ភារៈសាមញ្ញៗដោយផ្ទាល់ដៃ ស្វែងយល់ពីវប្បធម៌ខ្មែរ ម្ហូបអាហាររបស់ប្រជាជននៅតំបន់ភាគខាងលិច បំផុតគឺមុខម្ហូបពិសេសៗ របស់មាមីងខ្មែរនៅតំបន់ជនបទធ្វឹងហ្វា។ បងស្រីធ្វី ចែករំលែក៖ "សព្វថ្ងៃ ក្រៅពីការអភិវឌ្ឍភូមិរបរ ខ្ញុំកំពុងវិនិយោគអភិវឌ្ឍទេសចរណ៍សហគមន៍ផ្សារភ្ជាប់នឹងការថែរក្សាវប្បធម៌។ ពីព្រោះ នៅទីនេះមានភាពងាយស្រួលគឺមានវត្តខ្មែរស្រស់ស្អាតជាច្រើន រឿងព្រេងពីស្រះទេវតា ពិធីបុណ្យផ្សេងៗ មានក្លឹបសិល្បៈរបាំប្រពៃណីរបស់ជនរួមជាតិខ្មែរនិងម្ហូបអាហារដែលមានលក្ខណៈពិសេសរបស់ជនជាតិទាំង៣ កិញ ខ្មែរ ហ្វា…"។
លោកស្រីត្រឹងធីហាំង អនុប្រធានសមាគមសហព័ន្ធនារីទីក្រុងកឹងធើ (ខាងស្តាំ) កំពុងទស្សនាទំនិញសិប្បកម្មរបស់សហករណ៍ត្បាញផ្តៅឫស្សីធ្វីត្វៀក។
ជាមួយនឹងការរួមចំណែកដ៏លេចធ្លោក្នុងការអភិរក្សរបរប្រពៃណី និងឧបត្ថម្ភបងប្អូននារីកសាងអាជីព បងស្រីទ្រឿងធីបាត់ធ្វី បានទទួលស្គាល់ជាសិប្បករថ្នាក់ជាតិក្នុងវិស័យត្បាញផ្តៅនិងឫស្សី។ បងស្រីធ្វី ក៏ទទួលបានរង្វាន់លេខ១ក្នុងពិធីប្រឡងនារីផ្តើមអាជីព ពង្រីកសក្តានុភាពក្នុងស្រុកថ្នាក់ជាតិ រង្វាន់ពិសេសក្នុងពិធីប្រឡងនារីផ្តើមអាជីពថ្នាក់តំបន់ ផលិតផលជាច្រើនរបស់សហករណ៍សម្រេច OCOP ជាផលិតផលជនបទឆ្នើមថ្នាក់ខេត្តនិងថ្នាក់តំបន់។ លោកស្រីត្រឹងធីហាំង អនុប្រធានសមាគមសហព័ន្ធនារីទីក្រុងកឹងធើ បញ្ជាក់៖"បងស្រីទ្រឿងធីបាត់ធ្វី ជានារីមានគោលជំហរ មានការច្នៃប្រតិដ្ឋនិងប្តេជ្ញាចិត្តក្នុងការថែរក្សាភូមិរបរប្រពៃណីរបស់ជនជាតិ។ សហករណ៍របស់បងស្រីធ្វី មិនត្រឹមតែបង្កលក្ខណៈបង្កើនប្រាក់ចំណូលដល់បងប្អូននារីខ្មែរ ថែមទាំងរក្សារបរប្រពៃណីដោយផ្អែកលើវត្ថុធាតុដើមដែលមានស្រាប់។ ក្រៅពីនោះ បងស្រីធ្វីនៅទាំងតុបតែងសម្ភារៈប្រើប្រាស់ប្រចាំថ្ងៃ សាងសង់ផ្ទះពីឫស្សីបង្កជាចំណុចពិសេសក្នុងការទាក់ទាញភ្ញៀវទេសចរ។ នាពេលខាងមុខ សមាគមសហព័ន្ធនារីទីក្រុងកឹងធើនឹងបង្កលក្ខណៈល្អបំផុត ដើម្បីឱ្យបងស្រីធ្វីបានបង្ខិតជិតប្រភពទុនសម្រាប់អភិវឌ្ឍទេសចរណ៍សហគមន៍ ថែរក្សាភូមិរបរប្រពៃណីរបស់ជនរួមជាតិខ្មែរនិងផ្សព្វផ្សាយពីផលិតផលត្បាញផ្តៅនិងឫស្សីដល់ភ្ញៀវទេសចរក្នុងនិងក្រៅប្រទេស"៕
យ្វីអាញ-មុនី
ពាក្យគន្លឹះ
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
