មហាសាមគ្គីជនជាតិ គំរូក្នុងសហគមន៍

30/06/2026 - 06:38

ត្រកូលលឺវ – គំរូល្អសង្វាតរៀនសូត្រ

អស់រយៈពេលជាច្រើនឆ្នាំកន្លង ត្រកូលលឺវ នៅភូមិតាខាវ ឃុំកូវកែ ខេត្តវិញឡុង តែងបន្តលើកស្ទួយប្រពៃណីសង្វាតរៀនសូត្រ ជំរុញការសិក្សានិងលើកទឹកចិត្តបញ្ញាវ័ន្ត។ ដោយផ្អែកលើមូលដ្ឋានអប់រំដែលបានពូនផ្ដុំច្រើនជំនាន់មកហើយ ត្រកូលនេះបានក្លាយជាគំរូលេចធ្លោក្នុងការចលនាកសាងសង្គមសិក្សារៀនសូត្រនៅភូមិភាគ។

លោកលឺវកៀ (ខាងស្តាំ) ជាមួយកូនចៅក្នុងត្រកូលលឺវ។

ពេលនិយាយដល់ត្រកូលលឺវ នៅភូមិតាខាវ ឃុំកូវកែ ខេត្តវិញឡុង ប្រជាជននៅភូមិភាគតែងតែស្គាល់លោកលឺវកៀ ជាបុគ្គលមានប្តេជ្ញាចិត្តខ្ពស់ចំពោះវិស័យអប់រំនិងចលនាជំរុញការសិក្សារៀនសូត្រ។ កើតក្នុងគ្រួសារដែលមានប្រពៃ ណីជាគ្រូបង្រៀន ឪពុកជាគ្រូបង្រៀន ម៉្លោះហើយគាត់យល់ច្បាស់ពីតម្លៃនៃចំណេះដឹងចំពោះជីវភាព។ ឆ្នាំ ១៩៨០ គាត់បានចូលបម្រើការងារក្នុងវិស័យអប់រំ ហើយតែងខិតខំសិក្សារៀនសូត្រជានិច្ច ដើម្បីបង្កើនសមត្ថភាពជំនាញ។ ឆ្នាំ ២០០០ លោកបានបញ្ចប់ការសិក្សាថ្នាក់បរិញ្ញាបត្រ និងបន្តលះបង់កម្លាំងកាយចិត្តក្នុងបុព្វហេតុ “បណ្ដុះបណ្ដាលមនុស្ស” រហូតដល់ចូលនិវត្តន៍។ ក្នុងអំឡុងពេលបំពេញភារកិច្ច គាត់ធ្លាប់កាន់តំណែងជាចាងហ្វាងសាលាបឋមសិក្សាហ្វាអឹង និងបានរួមចំណែកយ៉ាងសកម្មចំពោះបុព្វហេតុ អប់រំនៅភូមិភាគ។

ក្រោយពីចូលនិវត្តន៍នៅឆ្នាំ ២០១៧ គាត់នៅតែបន្តចូលរួមយ៉ាងសកម្មក្នុងសកម្មភាពសង្គម។ គាត់ធ្លាប់កាន់តំណែងជាប្រធានសមាគមជំរុញការសិក្សា ឃុំហ្វាអ៊ឹង (ចាស់) និងជាអ្នកមានប្រិយភាពក្នុងជន រួមជាតិខ្មែរ។ បច្ចុប្បន្ន គាត់ជាប្រធានគណៈកម្មការវត្តសម្បូររង្សី ហើយបន្តចលនាប្រជាជនអនុវត្តល្អនូវគោលការណ៍របស់បក្ស គោលនយោបាយនិងច្បាប់របស់រដ្ឋ ព្រមទាំងយកចិត្តទុកដាក់ដល់ការងារ ជំរុញការសិក្សានៅភូមិភាគផងដែរ។ តាមលោកលឺវកៀ ប្រពៃណីសង្វាតរៀនសូត្ររបស់ត្រកូលបានរក្សា និងបន្តពីមួយជំនាន់ទៅមួយជំនាន់។ គ្រួសាររបស់គាត់មានបងប្អូន ៩ នាក់ សុទ្ធតែបម្រើការក្នុងវិស័យ អប់រំ។ ផ្ដើមពីគំរូពីជំនាន់មុន កូនចៅជំនាន់ក្រោយតែងចាត់ទុកការសិក្សាជាមាគ៌ាសម្រាប់កសាងអនាគតនិងសាងអាជីព។ រហូតមកទល់បច្ចុប្បន្ន ត្រកូល លឺវ មានសមាជិក ២០ នាក់ជាគ្រូបង្រៀន។ មិនត្រឹមតែយកចិត្តទុកដាក់ចំពោះកូនចៅក្នុងត្រកូលប៉ុណ្ណោះទេ លោកលឺវកៀ នៅទាំងសកម្មក្នុងការចលនាសប្បុរសជនឧបត្ថម្ភសៀវភៅសិក្សា សិក្ខូបករណ៍ អង្ករ ថវិកា និងសម្ភារៈប្រើប្រាស់ចាំបាច់ផ្សេងៗ ដល់សិស្សានុសិស្សដែលមានជីវភាពលំបាក។ អំណោយទាំងនេះ ទោះបីមិនមានតម្លៃធំធេងក៏ដោយ ប៉ុន្តែបានរួមចំណែកជួយប្អូនៗមានលក្ខណៈបន្តការសិក្សារៀនសូត្រ។

លោកថាច់ង៉ឹង ប្រធានគណៈកម្មាធិការប្រជាជន ភូមិតាខាវ ឱ្យដឹង៖ “លោកលឺវកៀ គឺជាគំរូដ៏លេចធ្លោក្នុងចលនាជំរុញការសិក្សានៅភូមិភាគ។ សកម្មភាពជាក់ស្តែងរបស់គាត់បានរួមចំណែករីកសាយភាយនូវស្មារតីសង្វាតរៀនសូត្រក្នុងសហគមន៍ ហើយបានប្រជាជនគោរពស្រឡាញ់និងយកតម្រាប់តាម”។

ដោយសារការរួមចំណែកយ៉ាងសកម្មក្នុងការងារ ជំរុញការសិក្សា លោកលឺវកៀនិងត្រកូលលឺវ បានទទួលលិខិតសរសើរនិងប័ណ្ណសរសើរជាច្រើនពីគ្រប់លំដាប់ថ្នាក់។ នៅឆ្នាំ ២០១៨ ត្រកូលនេះបានទទួលកិត្តិនាម “ត្រកូលសង្វាតរៀនសូត្រ” ថ្នាក់មូលដ្ឋាន។ កិត្តិនាមនេះគឺជាការទទួលស្គាល់ដ៏សក្តិសមចំពោះប្រពៃណីសង្វាតរៀនសូត្រដែលបានថែរក្សាបន្តពីមួយជំនាន់ទៅមួយជំនាន់ ព្រមទាំងជាកម្លាំងចិត្តលើកទឹកចិត្តឱ្យកូនចៅបន្តខិតខំរៀនសូត្រ និងរួមចំណែកកសាងមាតុភូមិឱ្យកាន់តែរីកចម្រើនថែមទៀត៕

ទីទុយ

ចែករំលែកអត្ថបទ

ពាក្យគន្លឹះ