ព្រឹត្តិការណ៍ - នយោបាយ ព្រឹត្តិការណ៍

16/03/2026 - 14:34

ជនរួមជាតិខ្មែរខេត្តកាម៉ាវ ស្រស្រាក់ស្រស្រាំទៅបោះឆ្នោត

ថ្ងៃបោះឆ្នោតជ្រើសតំណាងរដ្ឋសភា នីតិកាលទី១៦ និងតំណាងក្រុមប្រឹក្សាប្រជាជនគ្រប់ថ្នាក់ អាណត្តិកាល ២០២៦-២០៣១ នៅឃុំហឹងហោយ ខេត្តកាម៉ាវ បានប្រព្រឹត្តទៅក្នុងបរិយាកាសឱឡារិកអធិកអធម ក្លាយជាថ្ងៃបុណ្យទូទាំងប្រជាជនយ៉ាងពិតប្រាកដ។ នៅតាមដងផ្លូវនានាចូលទៅកាន់ភូមិស្រុក និងតាមទីតាំងបោះឆ្នោត សុទ្ធតែបានតុបតែងលម្អដោយទង់ និងផ្កាភ្ញីយ៉ាងស្រស់បំព្រង។ ម្ចាស់ឆ្នោតគ្រប់រូបសុទ្ធតែមានទឹកមុខរីករាយ សប្បាយចិត្ត ដើម្បីអនុវត្តសិទ្ធិ កាតព្វកិច្ចពលរដ្ឋរបស់ខ្លួន ព្រមទាំងផ្ញើនូវក្ដីជឿជាក់និងក្តីសង្ឃឹមយ៉ាងមុតមាំក្នុងអាណត្តិកាលថ្មី។

តាមប្រសាសន៍លោក តឺមិញភុក លេខាគណៈកម្មាធិការបក្សឃុំ និងជាប្រធានគណៈចង្អុលការបោះឆ្នោតឃុំហឹងហោយ បានឱ្យដឹង៖ ឃុំមានប្រជាជនជិត ៣០.០០០នាក់ ក្នុងនោះមាមីងជនរួមជាតិខ្មែរមានអត្រាជាង ៣០%។ នេះជាឃុំដែលមានជនរួមជាតិខ្មែរច្រើនបំផុតក្នុងខេត្តកាម៉ាវ ដោយមានមណ្ឌលបោះឆ្នោតចំនួន ១៨ កន្លែងនៅតាមភូមិ និងមានម្ចាស់ឆ្នោតជាង ២១.០០០ នាក់ចូលរួមបោះឆ្នោត។ ឃុំមានបេក្ខជនឈរឈ្មោះតំណាងរដ្ឋសភា នីតិកាលទី១៦ ចំនួន ០៥ រូប (បោះឆ្នោតជ្រើសរើសយក ០៣ រូប) បេក្ខជនតំណាងក្រុមប្រឹក្សាប្រជាជនខេត្តកាម៉ាវ ០៧រូប (បោះឆ្នោតជ្រើសរើសយក ០៤រូប) និងបេក្ខជនតំណាងក្រុមប្រឹក្សាប្រជាជនឃុំ ៣៥ រូប (បោះឆ្នោតជ្រើសរើសយក ២១ រូប)។

លោកស្រី ត្រឹងធីហ្វារី អនុប្រធានក្រុមប្រឹក្សាជនជាតិនៃរដ្ឋសភា (ខាងឆ្វេង) និងម្ចាស់ឆ្នោតឃុំហឹងហោយ អញ្ជើញទៅបោះឆ្នោត។

តាមការកត់សម្គាល់នៅទីតាំងបោះឆ្នោតវត្តបុប្ផារាម (មណ្ឌលបោះឆ្នោតលេខ ១៦) ឃុំហឹងហោយ តាំងពីព្រលឹមស្រាងៗ មានម្ចាស់ឆ្នោតយ៉ាងច្រើនកុះករ ស្លៀកពាក់តាមប្រពៃណី អញ្ជើញមកអនុវត្តកាតព្វកិច្ចពលរដ្ឋ។ ពិធីបើកការបោះឆ្នោតនៅទីនេះបានប្រព្រឹត្តទៅយ៉ាងខ្លីខ្លឹម និងសមរម្យ។ បន្ទាប់ពីក្រុមការងារបោះឆ្នោតបានអានលក្ខន្តិកៈបន្ទប់បោះឆ្នោត រួចពិនិត្យហិបឆ្នោតធំ និងហិបឆ្នោតបន្ទាប់បន្សំ នៅចំពោះមុខម្ចាស់ឆ្នោត ព្រមទាំងបិទស្លាកសញ្ញាតាមសេចក្ដីកំណត់រួចរាល់ហើយនោះ ម្ចាស់ឆ្នោតក៏ចាប់ផ្តើមបោះសន្លឹកឆ្នោត។ បណ្តាថ្នាក់ដឹកនាំនៃក្រុមប្រឹក្សាជនជាតិនៃរដ្ឋសភា និងឃុំហឹងហូយ គឺជាម្ចាស់ឆ្នោតដែលបានបោះសន្លឹកឆ្នោតដំបូងបង្អស់ បន្ទាប់មកមាមីងម្ចាស់ឆ្នោត ក៏បន្តគ្នាអនុវត្តសិទ្ធិបោះឆ្នោតរបស់ខ្លួន ប្រកបដោយសណ្តាប់ធ្នាប់រៀបរយ។

ព្រះឧបជ្ឈាយ៍ តាំងសាវង្ស ព្រះចៅអធិការវត្តបុប្ផារាម មានថេរដីកាថា ព្រះអង្គបានស្វែងយល់យ៉ាងច្បាស់លាស់នូវប្រវត្តិរូបសង្ខេបរបស់បេក្ខជនតំណាងរដ្ឋសភា និងតំណាងក្រុមប្រឹក្សាប្រជាជនគ្រប់ថ្នាក់ ដើម្បីសម្រេចចិត្តបោះឆ្នោតជ្រើសរើសបុគ្គលដែលមានគុណធម៌ និងសមត្ថភាពពេញលេញ ចូលក្នុងរដ្ឋសភា និងក្រុមប្រឹក្សាប្រជាជនគ្រប់លំដាប់ថ្នាក់។ ព្រះឧបជ្ឈាយ៍ តាំងសាវង្ស ក៏បានផ្ញើនូវក្ដីជឿជាក់យ៉ាងមុតមាំថា រដ្ឋសភា និងក្រុមប្រឹក្សាប្រជាជនគ្រប់ថ្នាក់ក្នុងអាណត្តិកាលថ្មី នឹងអនុវត្តបានល្អនូវភារកិច្ចរបស់ខ្លួន ដើម្បីដឹកនាំប្រទេសជាតិឈានចូលយុគសម័យថ្មី - យុគសម័យឈានឡើងនៃប្រជាជាតិ ដូចប្រសាសន៍ចង្អុលការរបស់លោកអគ្គលេខាធិការបក្ស តូឡឹម។

លោកថាច់ខួន អ្នកមានប្រិយភាពក្នុងជនរួមជាតិខ្មែរនៅភូមិកៃយ៉ា ទោះបីលោកមានអាយុជាង ៧០ ឆ្នាំក៏ដោយ ក៏នៅតែមានស្មារតីសកម្ម កាន់សន្លឹកឆ្នោតតាំងពីព្រលឹមដើម្បីអនុវត្តសិទ្ធិបោះឆ្នោត។ លោកថាច់ខួន មានប្រសាសន៍៖ “តាមរយៈអង្គប្រជុំជួបសំណេះសំណាលជាមួយម្ចាស់ឆ្នោត ខ្ញុំក្តាប់ច្បាស់នូវព័ត៌មានអំពីជីវប្រវត្តិនយោបាយ កម្រិតវិជ្ជាជីវៈ ក៏ដូចជាកម្មវិធីសកម្មភាពរបស់បេក្ខជនម្នាក់ៗ។ អាស្រ័យហេតុនោះ ខ្ញុំបានសម្រេចចិត្តជ្រើសរើសតាមរយៈសន្លឹកឆ្នោត និងរំពឹងថា បេក្ខជនដែលជាប់ឆ្នោតនឹងបន្តលើកកម្ពស់ស្មារតីទទួលខុសត្រូវ ជាពិសេសគឺនៅជិតដិតជាមួយប្រជាជន យកចិត្តទុកដាក់ស្ដាប់ និងពាំនាំយកនូវបំណងប្រាថ្នារបស់ប្រជាជនជូនដល់បក្ស និងរដ្ឋ”។

អ្នកតំណាងចូលរួមពិធីបើកការបោះឆ្នោត។

ជាមួយស្មារតីទទួលខុសត្រូវខ្ពស់ ម្ចាស់ឆ្នោតនៅតាមទីតាំងបោះឆ្នោតនានាក្នុងឃុំហឹងហោយនិយាយរួម និងជនរួមជាតិខ្មែរនិយាយដោយឡែក ចាប់ពីមនុស្សចាស់រហូតដល់យុវជនដែលទើបអនុវត្តសិទ្ធិបោះឆ្នោតលើកដំបូង បានអញ្ជើញមកចូលរួមយ៉ាងកុះករ ដើម្បីបំពេញសិទ្ធិនិងកាតព្វកិច្ចពលរដ្ឋ។ តាមរយៈនោះ ម្ចាស់ឆ្នោតបានសម្រេចចិត្តជ្រើសរើសតំណាងឆ្នើមដែលមានទាំងគុណធម៌និងសមត្ថភាព ដើម្បីតំណាងឱ្យឆន្ទៈនិងបំណងប្រាថ្នារបស់ប្រជាជន ចូលជាតំណាងរដ្ឋសភានីតិកាលទី ១៦ និងតំណាងក្រុមប្រឹក្សាប្រជាជនគ្រប់ថ្នាក់ អាណត្តិកាល ២០២៦-២០៣១។ ប្អូនថាច់សួស្ដី អាយុ ១៩ ឆ្នាំ ដែលចូលរួមបោះឆ្នោតលើកដំបូង បានបញ្ចេញក្ដីរំភើបរីករាយថា៖ “ខ្ញុំមានអារម្មណ៍ភ័យផងអរផងនិងរំភើបយ៉ាងខ្លាំង។ ដំបូង ខ្ញុំបារម្ភខ្លាចអនុវត្តខុសនីតិវិធីបោះឆ្នោត ព្រោះនេះជាព្រឹត្តិការណ៍ដ៏សំខាន់របស់ប្រទេសជាតិ ប៉ុន្តែដោយសារមានការណែនាំពីកម្មាភិបាលឃុំ រួមជាមួយការស្វែងយល់ព័ត៌មានតាមសារព័ត៌មាន ទើបខ្ញុំយល់ច្បាស់និងអនុវត្តបានត្រឹមត្រូវតាមសេចក្ដីកំណត់។ ខ្ញុំមានមោទនភាពណាស់ដែលបានរួមចំណែកជាមួយមាមីងក្នុងឃុំ អនុវត្តជោគជ័យនូវការបោះឆ្នោតលើកនេះ”។

ការបោះឆ្នោតជ្រើសតំណាងរដ្ឋសភា នីតិកាលទី ១៦ និងតំណាងក្រុមប្រឹក្សាប្រជាជនគ្រប់ថ្នាក់ អាណត្តិកាល ២០២៦-២០៣១ មិនត្រឹមតែជាព្រឹត្តិការណ៍នយោបាយដ៏សំខាន់របស់ប្រទេសជាតិប៉ុណ្ណោះទេ នៅទាំងជាឱកាសដើម្បីប្រជាជនគ្រប់រូបបញ្ជាក់ពីក្ដីជឿជាក់ទៅលើបក្ស រដ្ឋ និងការអភិវឌ្ឍប្រទេសជាតិនៅអនាគត។ ក្នុងបរិយាកាសសប្បាយរីករាយនៃទិវាបុណ្យទូតាំងប្រទេស មាមីងខ្មែរនៅឃុំហឹងហោយ ខេត្តកាម៉ាវ សម្តែងនូវការទំនុកចិត្តនិងក្តីរំពឹងថា ការបោះឆ្នោតជ្រើសតំណាងរដ្ឋសភា នីតិកាលទី ១៦ និងតំណាងក្រុមប្រឹក្សាប្រជាជនគ្រប់ថ្នាក់ អាណត្តិកាល ២០២៦-២០៣១ នឹងទទួលបានជោគជ័យយ៉ាងត្រចះត្រចង់ បង្កនូវទិសដៅអភិវឌ្ឍន៍ប្រទេសជាតិគ្រប់ជ្រុងជ្រោយ ក្នុងយុគសម័យថ្មី - យុគសម័យឈានឡើងនៃប្រជាជាតិ៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ