ព្រឹត្តិការណ៍ - នយោបាយ ព្រឹត្តិការណ៍

26/01/2026 - 10:06

មហាសន្និបាតលើកទី XIV របស់បក្ស៖

ចំណុចរបត់បើកយុគសម័យអភិវឌ្ឍន៍ថ្មីរបស់វៀតណាម

មហាសន្និបាតតំណាងទូទាំងប្រទេសលើកទី XIV (មហាសន្និបាតលើកទី XIV) របស់បក្សកុម្មុយនីស្តវៀតណាម គឺជាព្រឹត្តិការណ៍ដ៏សំខាន់ក្នុងដំណើរឈានចូលយុគសម័យថ្មី យុគសម័យអភិវឌ្ឍន៍របស់ប្រជាជាតិវៀតណាម មានអត្ថន័យជាប្រវត្តិសាស្ត្រ។ គឺជាចំណុចចាប់ផ្តើមនៃយុគសម័យថ្មី មហាសន្និបាត លើកទី XIV នឹងធ្វើឱ្យជាក់ច្បាស់នូវផែនការអភិវឌ្ឍនាពេលអនាគត តម្រង់ទិសឱ្យវៀតណាមសម្រេចបាននូវគោលដៅយូរអង្វែង ក្លាយជាប្រទេសឧស្សាហកម្មទំនើប មានចំណូលមធ្យមខ្ពស់នៅឆ្នាំ ២០៣០ និងជាប្រទេសអភិវឌ្ឍន៍មានចំណូលខ្ពស់នៅឆ្នាំ ២០៤៥។ នេះគឺជាការចែករំលែករបស់លោក ហឿនិញនិញ ប្រធានគណៈកម្មាធិការសហប្រតិបត្តិការឧស្សាហកម្ម ក្នុងក្របខ័ណ្ឌនៃកិច្ចព្រមព្រៀងភាពជាដៃគូសេដ្ឋកិច្ចលើគ្រប់វិស័យតំបន់ (RCEP) ជាមួយអ្នកយកព័ត៌មាននៃទីភ្នាក់ងារសារព័ត៌មានវៀតណាម ប្រចាំនៅទីក្រុងប៉េកាំង អំពីអត្ថន័យនៃមហាសន្និបាត លើកទី XIV ចំពោះការអភិវឌ្ឍរបស់វៀតណាម ក្នុងយុគសម័យថ្មី។

មហាសន្និបាតតំណាងទូទាំងប្រទេសលើកទី ១៤ របស់បក្ស។ (រូបថត៖ TTXVN)

យោងតាមលោក ហឿនិញនិញ ផ្តើមពីទស្សនៈជាក់ស្តែងមហាសន្និបាតនឹងកសាងនូវការឯកភាពជាតិ ដោះស្រាយរាល់បញ្ហាប្រឈមផ្នែករចនាសម្ព័ន្ធក្នុងការអភិវឌ្ឍ និងពង្រឹងជាងទៀតនូវសន្ទុះ ស្តារឡើងវិញនៃសេដ្ឋកិច្ច។ ផ្តើមពីទស្សនៈអន្តរជាតិ ដំណើរការអភិវឌ្ឍនិងតម្រង់ទិសសហប្រតិបត្តិការ ដែលបានកំណត់ច្បាស់ក្នុងមហាសន្និបាត នឹងពង្រឹងទំនុកចិត្តរបស់អ្នកវិនិយោគអន្តរជាតិចំពោះវៀតណាម ជួយឱ្យវៀតណាមធ្វើសមាហរណកម្មកាន់តែស៊ីជម្រៅទៅក្នុងខ្សែសង្វាក់ឧស្សាហកម្ម និងខ្សែសង្វាក់ផ្គត់ផ្គង់ក្នុងតំបន់ ទន្ទឹមនឹងនោះ បើកទូលាយកិច្ចសហប្រតិបត្តិការ និងបង្កើនឥទ្ធិពលតំបន់ក្នុងក្របខ័ណ្ឌ RCEP។

វាយតម្លៃលើគោលដៅដែលបានដាក់ចេញក្នុង មហាសន្និបាតលើកទី XIV លោក ហឿនិញនិញ បានសង្កត់ធ្ងន់៖ “អ្វីដែលធ្វើឱ្យខ្ញុំចាប់អារម្មណ៍បំផុតនោះគឺ គោលដៅយូរអង្វែងក្លាយជាប្រទេសកំពុងអភិវឌ្ឍន៍ទំនើប មានចំណូលមធ្យមខ្ពស់នៅឆ្នាំ ២០៣០ និងជាប្រទេសអភិវឌ្ឍន៍មានចំណូលខ្ពស់នៅឆ្នាំ ២០៤៥។ គោលដៅនេះគឺផ្អែកលើមូលដ្ឋាននៃការអភិវឌ្ឍបច្ចុប្បន្នរបស់វៀតណាម បង្ហាញពីភាពនឿជាក់ក្នុងអនាគត និងឆ្លុះបញ្ចាំងពីការប្តេជ្ញាចិត្តយ៉ាងខ្លាំងក្លារបស់ប្រទេសជាតិ ក្នុងការសម្រេចបាននូវវិបុលភាពយូរអង្វែងតាមរយៈការកែទម្រង់រចនាសម្ព័ន្ធ”។

លោក ហឿនិញនិញ ប្រធានគណៈកម្មាធិការសហប្រតិបត្តិការឧស្សាហកម្មក្នុងក្របខ័ណ្ឌនៃកិច្ចព្រមព្រៀងភាពជាដៃគូសេដ្ឋកិច្ចគ្រប់វិស័យតំបន់ (RCEP) ផ្តល់បទសម្ភាសន៍ដល់អ្នកយកព័ត៌មាននៃទីភ្នាក់ងារសារព័ត៌មានវៀតណាម។

លោក ហឿនិញនិញ បានអះអាងថា ផ្តើមពីទស្សនៈយុទ្ធសាស្ត្រគោលដៅនេះនឹងជំរុញឱ្យវៀតណាម ខិតខំប្រឹងប្រែងដោយឥតឈប់ឈរក្នុងវិស័យនានា ដូចជាបង្កើនកម្រិតខ្សែសង្វាក់ឧស្សាហកម្ម ផ្លាស់ថ្មីបច្ចេកវិទ្យានិងកសាងហេដ្ឋារចនាសម្ព័ន្ធ។ វិស័យទាំងនេះ គឺស្របតាមទិសដៅចម្បងនៃកិច្ចសហប្រតិបត្តិការក្នុងក្របខ័ណ្ឌ RCEP ដើម្បីអត្ថប្រយោជន៍ជាអតិបរមាពីការបើកទ្វារតំបន់។ ប្រការនេះមិនត្រឹមតែបង្កើតកម្លាំងចលករប្រកបដោយនិរន្តរភាពសម្រាប់ការអភិវឌ្ឍរបស់វៀតណាមប៉ុណ្ណោះទេ ប៉ុន្តែថែមទាំងនាំមកនូវភាពរស់រវើកថ្មីសម្រាប់កិច្ចសហប្រតិបត្តិការសេដ្ឋកិច្ចក្នុងតំបន់ទៀតផង។

ក្រៅពីនេះ គោលមាគ៌ាកិច្ចការបរទេសឯករាជ្យ ម្ចាស់ការគ្រប់ជ្រុងជ្រោយ សមាហរណកម្មស៊ីជម្រៅ និងមានប្រសិទ្ធភាព ដែលបានដាក់ចេញក្នុងមហាសន្និបាតលើកទី XIV ទាំងជាការបន្តវេន ទាំងជាជំហានលោតផ្លោះបើធៀបនឹង ៤០ ឆ្នាំគំនិតការទូត។ ទិសដៅនេះគឺស្របទៅនឹងសេចក្តីប្រាថ្នាចង់អភិវឌ្ឍន៍របស់វៀតណាម ក្នុងការធ្វើសមាហរណកម្មស៊ីជម្រៅទៅក្នុងខឿនសេដ្ឋកិច្ចសកល ដោយការរក្សាលទ្ធិនិយមពហុភាគី និងចូលរួមសហការក្នុងតំបន់អាចបង្កើតបរិយាកាស ខាងក្រៅប្រកបដោយស្ថិរភាពសម្រាប់ការអភិវឌ្ឍសេដ្ឋកិច្ចរបស់ប្រទេសជាតិ។

ឆ្លងកាត់រយៈពេល ៤០ ឆ្នាំកែទម្រង់និងបើកទ្វារឋានៈអន្តរជាតិរបស់វៀតណាម មានជំហាន លោតផ្លោះយ៉ាងខ្លាំង៖ ផ្តើមពីប្រទេសរងការឯកោរហូតដល់បង្កើតទំនាក់ទំនងការទូតជាមួយ ១៩៤ ប្រទេស ក្លាយជាប្រទេសមួយក្នុងចំណោមប្រទេសដែលមានបណ្តាញការទូតរីកសាយភាយបំផុតនៅអាស៊ីអាគ្នេយ៍។ វៀតណាមបានកសាងទំនាក់ទំនងភាពជាដៃគូយុទ្ធសាស្ត្រជាមួយប្រទេសមហាអំណាចពិភពលោក ស្ថិតក្នុងចំណោមប្រទេសនាំមុខទាំង ១៥ ដែលមានទំហំពាណិជ្ជកម្មសកល ឈរលំដាប់ទី ២ ក្នុងអាស៊ាន និងក្លាយជាតំណភ្ជាប់ដ៏សំខាន់ក្នុងខ្សែសង្វាក់ផ្គត់ផ្គង់តំបន់។ បច្ចុប្បន្ន វៀតណាមបានចូលរួមយ៉ាងសកម្មក្នុងយន្តការពហុភាគី ដូចជាអាស៊ាន និងកិច្ចសហប្រតិបត្តិការមេគង្គ-ឡានឆាង បង្ហាញភាពសកម្មនៃខឿនសេដ្ឋកិច្ចមួយកំពុងអភិវឌ្ឍន៍ និងរួមចំណែកយ៉ាងសំខាន់ក្នុងការរក្សាសន្តិភាព ស្ថិរភាពក្នុងតំបន់ និងជំរុញសេរីភាវូបនីយកម្មពាណិជ្ជកម្ម។

វាយតម្លៃអំពីតួនាទីរបស់បក្សកុម្មុយនីស្តវៀតណាម ក្នុងបុព្វហេតុកសាងការពារនិងអភិវឌ្ឍន៍ប្រទេសជាតិ ប្រធានគណៈកម្មាធិការសហប្រតិបត្តិការឧស្សាហកម្ម RCEP បានអះអាងថា ការដឹកនាំរបស់បក្សកុម្មុយនីស្តវៀតណាម គឺជាការធានាដ៏សំខាន់សម្រាប់ការអភិវឌ្ឍប្រកបដោយលក្ខណៈជាប្រវត្តិសាស្ត្ររបស់វៀតណាម។ តួនាទីដឹកនាំ បានបង្ហាញតាមរយៈការនាំវៀតណាម ឱ្យចាកផុតពីភាពក្រីក្រ និងភាពឱនថយ សម្រេចបាននូវជំហានលោតផ្លោះក្នុងការធ្វើសមាហរណកម្មស៊ីជម្រៅទៅក្នុងខឿនសេដ្ឋកិច្ចសកល។ ក្នុងរយៈពេល ៤០ ឆ្នាំផ្លាស់ថ្មី បក្សកុម្មុយនីស្តវៀតណាម បានកសាងយុទ្ធសាស្ត្រអភិវឌ្ឍន៍ស្របតាមលក្ខណសម្បត្តិរបស់ប្រទេសជាតិ ដោយនាំវៀតណាមពីប្រទេសដែលរងការបិទផ្លូវ និងហ៊ុមព័ទ្ធ ក្លាយជាខឿនសេដ្ឋកិច្ចចំណូលមធ្យម និងស្ថិតក្នុងចំណោម ៤០ ប្រទេសនាំមុខខឿនសេដ្ឋកិច្ចពិភពលោក។ ជីវភាពរបស់ប្រជាជនជាង ១០០ លាននាក់ បានកែលម្អយ៉ាងច្បាស់ក្រឡែត បង្ហាញយ៉ាងពេញលេញនូវសមត្ថភាពដឹកនាំ និងការផ្សារភ្ជាប់យ៉ាងស្អិតល្មួតរបស់បក្ស។

ឈានចូលយុគសម័យថ្មី តួនាទីដឹកនាំរបស់បក្សកុម្មុយនីស្តវៀតណាម ចាំបាច់ផ្តុំកម្លាំងទៅលើកិច្ចចង្អុលការយុទ្ធសាស្ត្រ និងប្រមូលផ្តុំប្រភពធនធាន។ មួយផ្នែកគឺ មិនបង្អង់ក្នុងការកែទម្រង់ និងជំរុញការផ្លាស់ប្តូររចនាសម្ព័ន្ធសេដ្ឋកិច្ចទៅជាសេដ្ឋកិច្ចឌីជីថល និងសេដ្ឋកិច្ចបៃតង។ ផ្នែកមួយទៀត គឺធានានូវទំនុកចិត្តនៃការវិនិយោគពីបរទេសតាមរយៈស្ថិរភាពគោលនយោបាយ ទាញយកអត្ថប្រយោជន៍ពីយន្តការសហប្រតិបត្តិការក្នុងតំបន់ដូចជា RCEP ដើម្បីបង្វែរឧត្តមភាពភូមិសាស្ត្រឱ្យទៅជាកម្លាំងចលករអភិវឌ្ឍន៍ ព្រមទាំងសហការអភិវឌ្ឍលើវិស័យផ្សេងៗគ្នា ដើម្បីការពារការអភិវឌ្ឍជារួមរបស់ប្រទេសជាតិក្នុងបរិការណ៍សកលលោកស្មុគ ស្មាញនេះ៕

កុងត្វៀង - វ៉ាន់តឹន

ចែករំលែកអត្ថបទ

ពាក្យគន្លឹះ