ព្រឹត្តិការណ៍ - នយោបាយ ព្រឹត្តិការណ៍

22/12/2025 - 17:54

ទូក ង វត្តស្រឡូង ទីក្រុងកឹងធើឈ្នះរង្វាន់លេខ១

- ថ្ងៃទី២១ ខែធ្នូ លើដងព្រែកជីកក្វាងឡោពុងហ៊ីប ពានរង្វាន់ប្រណាំងទូក ង ឃុំភឿកឡុង ឆ្នាំ២០២៥ ខេត្តកាម៉ាវ បានប្រព្រឹត្តឡើងយ៉ាងផុលផុស។ ពានរង្វាន់បានចាត់តាំងឡើងដើម្បីអបអរសាទរខួបអនុស្សាវរីយ៍ ៨១ឆ្នាំ ទិវាបង្កើតកងទ័ពប្រជាជនវៀតណាម (២២/១២/១៩៤៤ - ២២/១២/២០២៥)។

ពានរង្វាន់នេះ មានទូក ងបុរសចូលរួម១២ទូក ក្នុងនោះ ខេត្តកាម៉ាវមាន៨ទូក និងទូក ង មកពីទីក្រុងកឹងធើ និងខេត្តអាងយ៉ាងចំនួន៤ទូក។ ចម្ងាយខ្សែទឹកអុំប្រណាំង ១.០០០ម៉ែត្រ ហើយបានចែកជា ៤ ពូល អុំប្រណាំងវិលជុំមួយលើកគិតពិន្ទុ។ បញ្ចប់ការប្រណាំងចែកពូល នឹងជ្រើសរើសយកទូកលំដាប់លេខ១ លេខ២ក្នុងពូលនីមួយៗឈានចូលអុំវគ្គ៨ទូក។

ទូក ង ទាំងអស់បានមកកាន់ទីតាំងចេញដំណើរ។

ក្នុងការអុំប្រណាំងទូក ងទាំងអស់បានបញ្ចេញសមត្ថភាពយ៉ាងស្វាហាប់ ដោយការតាំងចិត្តខ្ពស់ ដើម្បីនាំមកនូវការប្រណាំងដ៏ជក់ចិត្តដល់អ្នកទស្សនា។ នៅវគ្គផ្តាច់ព្រ័ត្រ ទូក ងវត្តស្រឡូង ទីក្រុងកឹងធើ ជួបនឹងទូក ងវត្តង៉ាងយឿ ខេត្តកាម៉ាវ។ ទូកទាំងពីរប្រកួតប្រជែងយ៉ាងស្វាហាប់ តាំងពីចេញដំណើររហូតដល់ទីខែ្សព្រ័ត្របញ្ចប់ ទាក់ទាញការគាំទ្រលើកទឹកចិត្តពីទស្សនិកជនជាច្រើននៅតាមបណ្តោយដងព្រែក។ ជាលទ្ធផល ទូក ងវត្តស្រឡូងទទួលបា លេខ១ ទូក ងវត្តង៉ាងយឿ លេខ២ ចំណែកលេខ៣ បានទៅលើទូក ងវត្តបឹងក្រចាប់ថ្មី ឃុំតឹងថាញ់ ទីក្រុងកឹងធើ។

ការអុំប្រណាំងវគ្គប្រកួតផ្តាច់ព្រ័ត្រ រវាងទូក ងវត្តស្រឡូង (អាវពណ៌លឿង) ទីក្រុងកឹងធើ
យកឈ្នះលើទូក ងវត្តង៉ាងយឿ ខេត្តកាម៉ាវ។

គណៈចាត់តាំងជូនរង្វាន់លេខ១ ដល់ទូក ងវត្តស្រឡូង ទីក្រុងកឹងធើ។

តាមរយៈនោះ គណៈចាត់តាំងបានជូនទង់និងប្រាក់រង្វាន់លេខ១ ចំនួន៧០លានដុងដល់ទូក ងវត្តស្រឡូង; រង្វាន់លេខ២ ចំនួន ៥០លានដុងជូនទូក ងវត្តង៉ាងយឿ; និងលេខ៣ ចំនួន ៣០លានដុងជូនទូក ងវត្តបឹងក្រចាប់ថ្មី ទីក្រុងកឹងធើ។ លេខ៤ បានទៅលើវត្តកោះធំ ខេត្តកាម៉ាវ។ ក្រៅពីនេះ ទូក ងដែលចូលរួមអុំប្រណាំងទទួលបានប្រាក់ឧបត្ថម្ភ ១០ លានដុងពីប្រភពថវិកាចលនាក្នុងសង្គមនិងថវិកាខេត្ត៕

យ៉ីអាញ - ពេជ្រសឿន

ចែករំលែកអត្ថបទ

ពាក្យគន្លឹះ