សុខភាព - អប់រំ អប់រំ

07/07/2025 - 10:42

ភាពអ៊ូអរនៃថ្នាក់រៀនអក្សរខ្មែរ

រៀងរាល់រដូវវិស្សមកាល ដំណើរស្វែងរកភាសាកំណើតរបស់កូនចៅជនរួមជាតិខ្មែរក៏ចាប់ផ្ដើម។ នៅតាមវត្តពុទ្ធសាសនាទក្ខិណនិកាយខ្មែរលើភូមិសាស្រ្តឃុំត្រឹងដេ ក្រុងកឹងធើ បរិយាកាសថ្នាក់រៀនអក្សរខ្មែរកាន់តែមានភាពពុះពោរនិងអ៊ូអរ។

ថ្នាក់រៀនអក្សរខ្មែរនៅសាលាបឋមសិក្សាទ្រុងប៊ិញ B។ រូបថត៖ ហុងតើ

រដូវវិស្សមកាលរៀងរាល់ឆ្នាំ វត្តពោធិគម្ភីរសាគរដងក្ដោង ភូមិដងក្ដោង ឃុំត្រឹងដេ ក្រុងកឹងធើ តែងបើកបង្រៀនអក្សរខ្មែរជូនកូនចៅពុទ្ធបរិស័ទចំណុះជើងវត្តនិងក្រៅជើងវត្ត។ រដូវវិស្សមកាលឆ្នាំនេះ វត្តបើកថ្នាក់ទី ១ និងទី ២ មានសិស្សចូលរៀនជាង ១០០ នាក់ ក្នុងនោះ ថ្នាក់ទី ១ មាន៣បន្ទប់ ថ្នាក់ទី ២ មាន ២ បន្ទប់។ ពិសេស ដើម្បីបង្កលក្ខណសម្បត្តិសម្រាប់ប្អូនៗនៅឆ្ងាយ វត្តបានបើកបង្រៀន ២ ថ្នាក់នៅភូមិកណ្ដាល កន្លែងដែលមានជនរួមជាតិខ្មែររស់នៅកុះករ។ ហេតុនោះ កុមារតូចៗជាង ៥០ នាក់ មិនបាច់ធ្វើដំណើរទៅឆ្ងាយ ប៉ុន្តែបានរៀនអក្សរខ្មែររៀងរាល់ថ្ងៃដែរ។ ព្រះតេជព្រះគុណ ថាច់ចន្ថា ទទួលបន្ទុកបង្រៀនអក្សរខ្មែរថ្នាក់ទី ១ មានថេរដីកា៖ “វត្តបានបើកបង្រៀនអក្សរខ្មែរតាំងពីចុងខែឧសភាមកម៉្លេះ។ ឆ្នាំនេះ ចំនួនសិស្សចុះឈ្មោះចូលរៀនច្រើនបង្គួរ ជាពិសេស គឺថ្នាក់ទី ១ វត្ត បានរៀបចំបើកបង្រៀន ៣ បន្ទប់ដោយឡែក។ ទោះបីរដូវវស្សា មេឃបង្អុរភ្លៀងច្រើនយ៉ាងណាក៏ដោយ ប៉ុន្តែប្អូនៗនៅតែមករៀនទៀងទាត់ និងផ្ចិតផ្ចង់ស្ដាប់អាត្មាភាពបង្ហាត់បង្រៀន”។

វត្តសិរីពោធិដើមពោធិ៍ នៅភូមិដើមពោធិ៍ ក៏ជាចំណុចលេចធ្លោមួយក្នុងចលនាបង្រៀនអក្សរខ្មែរនៅឃុំត្រឹងដេផងដែរ។ ឆ្នាំនេះ វត្តបានរៀបចំបើកបង្រៀន ៣ កន្លែង៖ នៅក្នុងវត្ត នៅសាលា បឋមសិក្សាទ្រុងប៊ិញ B និងនៅសាលាបឋមសិក្សាង៉ាងរ៉ូ ២ សរុបចំនួនសិស្សចូលរៀនទាំង ៣ ថ្នាក់ ទី១ ទី២ ទី៣ គឺ ជាង ៣៥០ នាក់។ ទោះបីបើកបង្រៀនច្រើនកន្លែងផ្សេងៗគ្នាក៏ដោយ ប៉ុន្តែនៅកន្លែងណាក៏ឮសូរសំឡេងអាន “ក ខ គ ឃ ង” កងរំពងអមជាមួយនឹងសំឡេងបង្ហាត់បង្រៀនរបស់ព្រះសង្ឃ។ ប្អូនថាច់ឡឹមញឺអី សិស្សរៀនអក្សរខ្មែរថ្នាក់ទី១នៅវត្តសិរីពោធិដើមពោធិ៍ ចែករំលែក៖ “ប្អូនចូលចិត្តរៀនអក្សរខ្មែរខ្លាំងណាស់ ពេលចូលរៀន ប្អូនបានព្រះសង្ឃបង្រៀនស្រះ ព្យញ្ជនៈ ប្រកបអក្សរ សរសេរអក្សរជាដើម។ ប្អូនតែងយកចិត្តទុកដាក់រៀនសូត្រ ដើម្បីចេះអាន ចេះសរសេរអក្សរខ្មែរ”។

តាមថេរដីកា ព្រះតេជព្រះគុណ សើុងមិញហៀង ព្រះចៅអធិការវត្តសិរីពោធិដើមពោធិ៍ សមាជិកគណៈប្រតិបត្តិការសមាគមព្រះសង្ឃសាមគ្គីស្នេហាជាតិខេត្តសុកត្រាំង (ចាស់) ការបើកបង្រៀនអក្សរខ្មែរក្នុងឱកាសវិស្សមកាល បានទាក់ទាញសិស្សចូលរៀនយ៉ាងកុះករ។ ដើម្បីចលនាសិស្សចូលរៀនអក្សរខ្មែរ វត្តតែងប្រកាសរៀងរាល់ថ្ងៃសីលនិងសហការជាមួយនឹងគណៈកម្មការវត្តចុះទៅតាមគ្រួសារ ដើម្បីលើកទឹកចិត្តអាណាព្យាបាលសិស្សជូនកូនទៅរៀនអក្សរខ្មែរ។ ព្រះតេជព្រះគុណ សើុងមិញហៀង ក៏បានបញ្ជាក់អំពីតួនាទីយ៉ាងសកម្មរបស់រដ្ឋអំណាចភូមិភាគ ជាពិសេសគឺការផ្សព្វផ្សាយសេចក្ដីសម្រេចចិត្តលេខ ១៧/២០១៩/NQ-HĐND របស់ក្រុមប្រឹក្សាប្រជាជនខេត្តសុកត្រាំង (ចាស់)-គោលនយោបាយ ឧបត្ថម្ភពិសេសដោយឡែកសម្រាប់អ្នកបង្រៀនភាសានិងអក្សរខ្មែរក្នុងឱកាសវិស្សមកាល បានបង្កជាកម្លាំងចលករជូនព្រះសង្ឃនិងគ្រូបង្រៀន ក្នុងការបង្ហាត់បង្រៀនភាសា អក្សរនិងអភិរក្សអត្តសញ្ញាណវប្បធម៌ជនជាតិខ្មែរ៕

អត្ថបទនិងរូបថត៖ ហុងតើ -បកប្រែ៖ ថាច់ធី

ចែករំលែកអត្ថបទ

ពាក្យគន្លឹះ