សន្តិសុខ - ការពារប្រទេស ការពារប្រទេស

19/04/2025 - 09:59

ភាពកក់ក្តៅនៃមនោសញ្ចេតនារវាងកងទ័ពនិងប្រជាជននៅតំបន់ព្រំដែនសមុទ្រ

ប៉ុស្តិ៍ការពារព្រំដែនឡាយហ្វា កងទ័ពការពារព្រំដែនខេត្តសុកត្រាំង បានអនុវត្តនូវទម្រង់ និងកម្មវិធីជាច្រើនដើម្បីគិតគូរដល់អ្នកក្រ បំផុតគឺជនរួមជាតិភាគតិចនៅលើភូមិសាស្រ្ត។ ឆ្លងតាមរយៈនោះ បានរួមចំណែកកសាងទំនាក់ទំនងរវាងកងទ័ពនិងប្រជាជននៅតំបន់ព្រំដែនសមុទ្រកាន់តែស្អិតល្មួត។

ប៉ុស្តិ៍ការពារព្រំដែនឡាយហ្វា បើកការសាងសង់ផ្ទះជូនគ្រួសារក្រីក្រ។

ប៉ុស្តិ៍ការពារព្រំដែនឡាយហ្វា គ្រប់គ្រងភូមិសាស្រ្តឃុំចំនួនពីរ គឺឡាយហ្វានិងវិញតឹងនៃទីរួមខេត្តវិញចូវ ទីនេះមានជនរួមជាតិខ្មែររស់នៅជាង៧០% ហើយលក្ខណៈសេដ្ឋកិច្ចនៅលំបាកច្រើន។ យោងតាមប្រសាសន៍វរសេនីយ៍ត្រី ង្វៀងហ្វាងដេ ស្នងការនយោបាយប៉ុស្តិ៍ការពារព្រំដែនឡាយហ្វា ផ្តើមពីស្ថានភាពជាក់ស្តែង អង្គភាពបានធ្វើសេនាធិការជូនគណៈកម្មាធិការបក្ស បញ្ជាការដ្ឋានកងទ័ពការពារព្រំដែនខេត្ត និងរដ្ឋអំណាចភូមិភាគ កសាងទម្រង់និងសកម្មភាពជួយប្រជាជន។ ក្នុងនោះ មានទម្រង់ “ល្វែងទំនិញសូន្យដុង” “ផ្សារណាត់ពិសេស” សម្រាប់អ្នកក្រ និងផែនការ “រាល់សប្តាហ៍មានការងារមួយប្រកបដោយអត្ថន័យ” ត្រូវបានអនុម័ត និងវាយតម្លៃខ្ពស់។ មកដល់ពេលនេះ ទម្រង់ត្រូវបានអនុវត្តយ៉ាងមានប្រសិទ្ធភាព ជួយឱ្យអ្នកក្រ មនុស្សចាស់គ្មានទីពឹង និងជនពិការជាជនជាតិខ្មែរ ទទួលបានអំណោយដោយក្តីរីករាយនិងភាពកក់ក្តៅ ជួយកាត់បន្ថយបានការលំបាកក្នុងជីវភាព។ ដោយឡែកនៅឱកាសបុណ្យចូលឆ្នាំថ្មី អង្គភាពក៏បានរៀបចំជូនអំណោយនិងវេចនំអន្សមជូនមាមីងខ្មែរដែលមានជីវភាពក្រីក្រ មនុស្សចាស់គ្មានទីពឹង និងជនពិការផងដែរ ដើម្បីគ្រប់គ្រួសារបានទទួលអំណរបុណ្យចូលឆ្នាំថ្មីប្រកបដោយភាពរីករាយនិងកក់ក្តៅ។ ទន្ទឹមនឹងនោះ អង្គភាពបានរៀបចំកម្មវិធីសិល្បៈដើម្បីជនរួមជាតិច្រៀងរាំសប្បាយអំណរឆ្នាំថ្មី។

កម្មាភិបាលពេទ្យយោធាប៉ុស្តិ៍ការពារព្រំដែនឡាយហ្វា មកពិនិត្យជំងឺនិងផ្តល់ថ្នាំពេទ្យដល់ជនពិការ។

ទម្រង់ “ល្វែងទំនិញសូន្យដុង” និង “ផ្សារណាត់ពិសេស” សម្រាប់អ្នកក្រត្រូវបានអង្គភាពរៀបចំឡើងចាប់ពីខែតុលា ឆ្នាំ២០២៣ មកដល់បច្ចុប្បន្ន។ តាមនោះ អង្គភាពរៀបចំបានចំនួន១៩លើក ចែកជូនអំណោយជាង ៧០០ ចំណែក រួមមាន÷ អង្ករ មី ត្រីសាច់ បន្លែ ផ្លែឈើ និងរបស់របរប្រើប្រាស់ចាំបាច់ដល់អ្នកក្រ មនុស្សចាស់គ្មានទីពឹងនិងជនពិការ។ បន្លែផ្លែឈើ ត្រី សាច់ជាដើម គឺអង្គភាពផលិតដោយផ្ទាល់។ ចំពោះទម្រង់ “រាល់សប្តាហ៍មានការងារមួយប្រកបដោយអត្ថន័យ” អង្គភាពបានកៀរគរសង់ផ្ទះមហាសាមគ្គីបាន៤ខ្នង កង់១៥គ្រឿង អំណោយចំនួន៤៨ចំណែក ។ល។ ជូនសិស្សានុសិស្ស និងប្រជាជនក្រីក្រលើភូមិសាស្រ្ត។ លោកយាយ ថាច់ធីឡូយ បានឱ្យដឹង៖ “ប្តីប្រព័ន្ធខ្ញុំមានវ័យចាស់ បានក្មួយៗកងទ័ពការពារព្រំដែនឧបត្ថម្ភ ពិនិត្យជំងឺ ផ្តល់ថ្នាំពេទ្យ អង្ករ ប្រាក់កាស បន្លែ ផ្លែឈើ និងរបស់របរប្រើប្រាស់ចាំបាច់ជារឿយៗ ដូច្នេះ យើងខ្ញុំសប្បាយចិត្តខ្លាំងណាស់។ ចំណែកនៅថ្ងៃបុណ្យចូលឆ្នាំថ្មី ក្មួយៗកងទ័ពការពារព្រំដែនបានមកជូននំអន្សម អង្ករ ប្រាក់ បន្លែ ត្រីសាច់។ល។ ទឹកចិត្តរបស់ក្មួយៗកងទ័ពការពារព្រំដែន បានជួយឱ្យយើងខ្ញុំមានភាពកក់ក្តៅ ដូច្នេះ យើងខ្ញុំតែងចងចាំនូវសគុណបំណាច់នេះជារៀងរហូត” ។

ទន្ទឹមនឹងនោះ ទម្រង់ “រាល់សប្តាហ៍មានការងារមួយប្រកបដោយអត្ថន័យ” នៅទាំងចលនាកម្មាភិបាល យុទ្ធជនក្នុងអង្គភាព ប្រិតសំចៃពីចំណែកអាហារប្រចាំថ្ងៃ ដើម្បីបង្កើត “ខាប់អង្ករមនោសញ្ចេតនាកងទ័ពនិងប្រជាជន” នៅចុងសប្តាហ៍បូកសរុបនិងចែកជូនដល់ប្រជាជនក្រីក្រ។ ព្រមទាំងដកប្រាក់ចំណេញពីការបង្កបង្កើនផលមួយចំណែក ដើម្បីបង់កូនជ្រូកដី “ធ្វើជាមូលនិធិសម្រាប់សកម្មភាព” ទឹកប្រាក់ដែលបានមកពីការបង់កូនជ្រូកដីនឹងយកទៅទិញថ្នាំពេទ្យរបស់ប្រើប្រាស់ចាំបាច់ ហើយរៀងរាល់សប្តាហ៍ ចាត់បុគ្គលិកពេទ្យយោធាចុះទៅដល់ផ្ទះពិនិត្យជំងឺ ផ្តល់ថ្នាំដោយឥតគិតថ្លៃ ព្រមទាំងអំណោយដល់មនុស្សចាស់គ្មានទីពឹង ជនពិការ និងអ្នកមានជំងឺរុាំរៃលើភូមិសាស្រ្ត។ ទន្ទឹមនឹងនោះ ចាត់កម្មាភិបាលចុះទៅផ្ទះជនពិការ ដើម្បីណែនាំអំពីបច្ចេកទេសបណ្ដុះសណ្តែកបណ្តុះស្អាត។ល។ ដើម្បីជួយឱ្យពួកគាត់រកបានប្រាក់ចំណូលលំនឹងជីវភាព។ លោកលីថាញសាង នៅភូមិព្រៃជាប់ B បានឱ្យដឹង៖ “ពីមុនដោយសារសុខភាពមិនល្អ ខ្ញុំពឹងទាំងស្រុងទៅលើការជំនួយពីសប្បុរសជន ព្រោះគ្មានការងារធ្វើ និងមិនដឹងធ្វើអ្វីរកប្រាក់ឡើយ។ ឥឡូវបានកងទ័ពការពារព្រំដែនសាងសង់ផ្ទះថ្មីជូន ផ្តល់អំណោយថ្នាំពេទ្យ និងបង្ហាញខ្ញុំពីរបៀបបណ្តុះសណ្តែតបណ្តុះ ដូច្នេះ ចន្លោះ៥ ថ្ងៃគឺប្រមូលផលម្តង។ រៀងរាល់លើកប្រមូលផល តែងបានកងទ័ពការពារព្រំដែនជួយលក់ឱ្យបានជិត ៣០០ពាន់ដុង ដូច្នេះ ខ្ញុំសប្បាយចិត្តណាស់ ព្រោះអាចរកបានប្រាក់ចំណូលគួរសមដែរ”។

វរសេនីយ៍ត្រី ង្វៀងហ្វាងដេ មានប្រសាសន៍៖ “តាមរយៈការអនុវត្តទម្រង់ប៉ុស្តិ៍ការពារព្រំដែន ឡាយហ្វា ត្រូវបានរដ្ឋអំណាចភូមិភាគ គណៈកម្មាធិការបក្សនិងបញ្ជាការដ្ឋានកងទ័ពការពារព្រំដែនខេត្តវាយតម្លៃថា អង្គភាពបានក្លាយជាទីបង្អែកដ៏រឹងមាំសម្រាប់ប្រជាជននៅតំបន់ព្រំដែនសមុទ្រ។ ប្រការនេះ បានជួយពង្រឹងទំនាក់ទំនងរវាងកងទ័ពនិងប្រជាជនកាន់តែស្អិតល្មួតជាងទៀត ក៏ដូចជាកសាងជំហរយុទ្ធសាស្រ្តទឹកចិត្តប្រជាជនកាន់តែរឹងមាំនៅតំបន់ព្រំដែនសមុទ្រ”៕

លីធាន - សុផន

ចែករំលែកអត្ថបទ

ពាក្យគន្លឹះ