មហាសាមគ្គីជនជាតិ គំរូក្នុងសហគមន៍

03/12/2024 - 09:53

ជម្នះការលំបាក ឈានឡើងធូរធារ

ដោយស្មារតីស៊ូទ្រាំលំបាក ព្យាយាមពលកម្ម សំខាន់គឺឆន្ទៈឈានឡើងខ្លួនឯង បងថាច់យ៉ែន នៅភូមិពពុះទឹក ឃុំភូមី ស្រុកមីទូ ខេត្តសុកត្រាំង បានលើកស្ទួយជីវភាពគ្រួសារចាកផុតពីភាពក្រីក្រ និងឈានឡើងធូរធារ។

បងថាច់យ៉ែន កំពុងដាក់ស្មៅគោ។

ចាប់ផ្ដើមកសាងជីវភាពដំបូង ប្ដីប្រពន្ធ បងថាច់យ៉ែន មានដីផលិតកម្មត្រឹម២ កុងដែលឪពុកម្ដាយចែកឱ្យប៉ុណ្ណោះ ម្ល៉ោះហើយបងយ៉ែនបានលើករងដាំជីរបន្លា ដោយរំពឹងថា នឹងមានប្រាក់ចំណូលជាប្រចាំសម្រាប់ផ្គត់ផ្គង់ជីវភាព។ កើតក្នុងគ្រួសារដែលជំនាញដាំជីរបន្លា បានជាបងយ៉ែន ក្ដាប់ច្បាស់បច្ចេកទេសដាំ គួបផ្សំនឹងការព្យាយាមនិងស៊ូទ្រាំលំបាក ការដាំជីរបន្លាក៏កាក់កបនិងតម្លៃលក់សមរម្យ។ ផ្ដើមពីប្រសិទ្ធភាពទាំងនោះ បងយ៉ែនបានបន្តជួលដី២កុងដើម្បីពង្រីកការដាំដុះ និងគួបផ្សំជាមួយចិញ្ចឹមពូជគោបារាំង។ ប្ដីប្រពន្ធបងយ៉ែន បានផ្ដោតអារម្មណ៍លើការដាំបន្លែនិងចិញ្ចឹមសត្វ ចំណែកដីជុំវិញផ្ទះនិងភ្លឺទំនប់គឺដាំស្មៅដើម្បីធានាប្រភពចំណីឱ្យគោ។ កន្លងពីមួយឆ្នាំទៅមួយឆ្នាំ ប្រាក់សន្សែសន្សំអំពីការលក់គោនិងជីរបន្លា ប្ដីប្រពន្ធបងយ៉ែន ក៏បានជួលដីស្រែសម្រាប់ធ្វើស្រូវ។ មានដើមទុន ផ្ដើមពីការជួលដីជាសន្សឹមៗប្ដីប្រពន្ធបងយ៉ែន សន្សែសន្សំទិញបានដីស្រែបន្តិចម្ដងៗ រហូតមកទល់បច្ចុប្បន្ន គ្រួសារបងយ៉ែន មានដីស្រែជាកម្មសិទ្ធិចំនួន១០កុង។ បងយ៉ែន ឱ្យដឹង៖ “តាមរយៈអនុផលកសិកម្ម ដូចជាចំបើងនិងស្លឹកជីរ បន្លាចាស់ៗសម្រាប់ធ្វើជាចំណីគោ ម្ល៉ោះហើយ មេគោ ៤ ក្បាលធាត់ធំល្អ។ គិតជាមធ្យមក្នុងមួយឆ្នាំខ្ញុំលក់កូនគោពី២-៤ក្បាល ក្នុងតម្លៃពី១៥-២០លានដុង/ក្បាល (ទៅតាមដំណាក់កាលនីមួយៗ)។ ដោយឡែកដីនៅជាប់ភ្លឺប្រឡាយ មានទឹកសាបខួបឆ្នាំ ការដាំជីរបន្លានិងស្មៅគឺងាយស្រួលណាស់។ ចំណែកដី២កុងនៅជិតផ្ទះ ខ្ញុំជីកស្រះស្ដុកទឹកសម្រាប់ដាំដុះ ម្ល៉ោះហើយទោះបីរដូវប្រាំងឬវស្សា ខ្ញុំតែងមានជីរបន្លាលក់គ្រប់ពេល។ បច្ចុប្បន្ន ជាមធ្យមក្នុងមួយថ្ងៃខ្ញុំប្រមូលផលជីរបន្លាពី៥០-១០០គីឡូក្រាម លក់ឱ្យម៉ូយ តម្លៃពី១២.០០០ - ២២.០០០ដុង/គីឡូក្រាម”។ តាមសម្ដីបងយ៉ែន ការដាំជីរបន្លាថ្វីដ្បិតនឿយហត់បន្តិចក៏ពិតមែន ប៉ុន្តែដំណាំមិនសូវមានសត្វល្អិតបំផ្លាញ ការប្រើប្រាស់ជីក៏តិចតម្លៃក៏លំនឹង ម្ល៉ោះហើយរកបានប្រាក់ចំណូលខ្ពស់។

ចម្ការជីរបន្លារបស់ប្ដីប្រពន្ធបងថាច់យ៉ែនកំពុងលូតលាស់ល្អនិងប្រមូលផលរៀងរាល់ថ្ងៃ។

ផ្ដើមពីការដាំជីរបន្លានិងចិញ្ចឹមគោ គ្រួសារបងយ៉ែន បានឈានឡើងធូរធារ ហើយគាត់បន្តជួលដីបន្ថែមសម្រាប់ពង្រីកការដាំដុះ មកទល់បច្ចុប្បន្ន ផ្ទៃដីដាំជីរបន្លារបស់បងយ៉ែន បានកើនឡើងដល់៥កុង ម្ល៉ោះហើយ បងយ៉ែនមិនសូវមានពេលទំនេរនោះទេ។ មួយថ្ងៃៗជាប់រវល់ជាមួយនឹងការងារប្រមូលផលជីរបន្លា កាត់ស្មៅគោនិងថែទាំស្រូវជាដើម។ ថ្វីដ្បិតតែការងារមានភាពនឿយហត់ក៏ដោយ ប៉ុន្តែស្នាមញញឹមរបស់ប្ដីប្រពន្ធ បងយ៉ែន បានបង្ហាញពីមោទនភាពចំពោះសមិទ្ធផលដែលសម្រេចបាន។ បងយ៉ែន ឱ្យដឹង៖ “ប្ដីប្រពន្ធខ្ញុំស៊ូទ្រាំនឿយហត់ប្រកបការងាររកស៊ី និងប្រើប្រាស់ប្រិតសំចៃ ទើបបានសល់ផល។ ឥឡូវមានដីធ្លី មានផ្ទះសម្បែងសមរម្យ មានលក្ខណសម្បត្តិចិញ្ចឹមកូនរៀនសូត្រ គឺខ្ញុំរីករាយនិងសុភមង្គលទៅហើយ”។

លោកបាញឌឹកក្វាង អនុប្រធានគណៈកម្មាធិការប្រជាជនឃុំភូមី ឱ្យដឹង៖ “ប្ដីប្រពន្ធបងយ៉ែន បានស្រុះស្រួលគ្នាគិតគូរអភិវឌ្ឍន៍សេដ្ឋកិច្ច កសាងគ្រួសារសុភមង្គល សុខដុមរមនា។ ពិសេស ទោះបីជារដូវប្រាំងឬវស្សា ចម្ការជីរបន្លារបស់គាត់តែងលាស់ខៀវខ្ចី និងនាំមករដូវប្រមូលផលកាក់កប។ ដោយឆន្ទៈនិងប្ដេជ្ញាចិត្តចាកផុតពីភាពក្រីក្រ ឈានឡើងធូរធាររបស់គ្រួសារបងថាច់យ៉ែន តែងបានមាមីងក្នុងភូមិស្រុកស្ងើចសរសើរ”៕

លីធាន - ថាច់ធី

ចែករំលែកអត្ថបទ

ពាក្យគន្លឹះ