មហាសាមគ្គីជនជាតិ គំរូក្នុងសហគមន៍

07/08/2023 - 16:53

ថ្នាក់រៀនពិសេសនៅវត្តមង្គលព្រឹក្សាព្រែកជ្រៃចាស់

លោក យ័ញង៉ែ អាយុ៦០ឆ្នាំ នៅភូមិហ្វាឡែ ឃុំថើយក្វាង ស្រុកហ្គក្វាវ ខេត្តគៀងយ៉ាង បានផ្តើមសហការជាមួយនឹងវត្តមង្គលព្រឹក្សាព្រែកជ្រៃចាស់ ចលនាប្រជាជននៅលើភូមិសាស្រ្ត និងភូមិនានានៅជិតខាងឱ្យកូនចៅមករៀនអក្សរខ្មែរ ចាប់តាំងពីឆ្នាំ ១៩៩៩ រហូតដល់សព្វថ្ងៃ។

លោកយ័ញង៉ែ ក្នុងម៉ោងបង្រៀន។

លោក យ័ញង៉ែ ឱ្យដឹង កាលនៅតូចគាត់បានឪពុកម្តាយបញ្ជូនឱ្យចូលមកវត្តវង្សាសួស្តីព្រែកប្រាំ នៅស្រុកអាងបៀង ខេត្តគៀងយ៉ាង ដើម្បីបួសនិងរៀនអក្សរខ្មែរ។ ក្នុងអំឡុងពេលបួសរៀននៅវត្តនេះ ទន្ទឹមនឹងការណែបង្ហាញពីសំណាក់ព្រះសង្ឃនៅក្នុងវត្ត លោកយ័ញង៉ែ នៅទាំងសិក្សាស្រាវជ្រាវ បន្ថែមដោយខ្លួនឯងតាមរយៈការអានសៀវភៅ កាសែតជាភាសាខ្មែរទៀតផង។ អាស្រ័យហេតុនោះ គាត់អាននិងសរសេរអក្សរខ្មែរបានយ៉ាងល្អ ក្រោយមកឃើញប្អូនៗជាច្រើននៅភូមិភាគមិនសូវចេះអក្សរខ្មែរ ម្ល៉ោះហើយគាត់ក៏សម្រេចចិត្តបើកថ្នាក់បង្រៀនអក្សរខ្មែរដល់ប្អូនៗ។ ទោះបីមិនមែនជាគ្រូបង្រៀនជំនាញ ប៉ុន្តែជាង ២៣ ឆ្នាំកន្លង ឱ្យតែដល់រដូវវិស្សមកាលម្តងៗ គាត់តែងខ្នះខ្នែងក្នុងការបង្រៀនអក្សរខ្មែរដល់សិស្សរាប់សិបនាក់ ដែលជាកូនចៅរបស់ជនរួមជាតិខ្មែរនៅភូមិភាគ។ល។ “ខ្ញុំចង់បង្រៀនដល់ប្អូនៗ ឱ្យបានដឹងពីវប្បធម៌របស់ជនជាតិយើង ដើម្បីថែរក្សានិងអភិវឌ្ឍឱ្យកាន់តែល្អប្រសើរជាងទៀត។ ពេលចេះអាននិងចេះសរសេរអក្សរខ្មែរ លុះធំឡើងប្អូនៗអាចប្រើការក្នុងការសិក្សា រៀនសូត្រ បំពេញការងារ និងរួមចំណែកច្រើនជាងទៀតដល់សង្គម។ ប្អូនៗអាចធ្វើជាអ្នកបកប្រែឱ្យក្រុមហ៊ុន រោងចក្រដែលប្រើការពលករជាជនជាតិខ្មែរ និងណែនាំដល់ប្រជាជននៃប្រទេសជាមិត្ត មកទេសចរណ៍នៅប្រទេសវៀតណាមយើងជាដើម”-លោកយ័ញង៉ែ បានឱ្យដឹងដូច្នេះ។

ថ្នាក់រៀនតូចមួយនៅវត្តមង្គលព្រឹក្សាព្រែកជ្រៃចាស់ មានសិស្សប្រមាណជាង ២០ នាក់ (ចាប់ពីថ្នាក់ទី១ដល់ថ្នាក់ទី៥) ។ ក្រោយមក មានប្អូនៗមួយចំនួនទៅតាមឪពុកម្តាយប្រកបការងាររកស៊ីឆ្ងាយ ហេតុនោះក៏ឈប់រៀនទៅ។ ថ្វីដ្បិតតែជាថ្នាក់រៀនរយៈពេលខ្លី ស្ថិតក្នុងដំណាក់កាលវិស្សមកាលរៀងរាល់ឆ្នាំ ប៉ុន្តែលោកយ័ញង៉ែ តែងផ្ដោតលើគុណភាពជាចម្បង។ លោកង៉ែ ឱ្យដឹង រយៈពេលខាងមុខ ថ្នាក់រៀននឹងធ្វើការបង្ហាត់បង្រៀនរៀងរាល់ថ្ងៃ ទាំងថ្ងៃសៅរ៍និងថ្ងៃអាទិត្យ ពីព្រោះពេលវេលាវិស្សមកាល៣ខែខ្លីពេក។

ព្រះតេជព្រះគុណយ័ញអេន ព្រះចៅអធិការវត្តមង្គលព្រឹក្សាព្រែកជ្រៃចាស់ មានថេរដីកា៖ “ពុទ្ធបរិស័ទខ្មែរនៅទីនេះ គោរពរាប់អានលោកយ័ញង៉ែណាស់។ ពីព្រោះគាត់់បានលត់ដំកូនចៅខ្មែរជាច្រើនជំនាន់ឱ្យចេះអាន ចេះសរសេរអក្សរខ្មែរ ថែរក្សានូវព្រលឹងនិងអត្តសញ្ញាណរបស់ជនជាតិខ្លួន”៕

យោង៖ កាសែតអប់រំនិងយុគសម័យ

ចែករំលែកអត្ថបទ

ពាក្យគន្លឹះ