មហាសាមគ្គីជនជាតិ ភូមិស្រុកផ្លាស់ថ្មី

18/07/2023 - 08:54

ឃុំលីវទូ ឈានឆ្ពោះទៅកាន់ឃុំជនបទថ្មី

បច្ចុប្បន្ន ឃុំលីវទូ ស្រុកត្រឹងដេ ខេត្តសុកត្រាំង បានកសាងសម្រេច ១៨/១៩ លក្ខឋានស្តីពីការកសាងជនបទថ្មី ធ្វើឱ្យមុខមាត់តំបន់ជនបទមានភាពផ្លាស់ថ្មី ជីវភាពសម្ភារៈនិងស្មារតីប្រជាជនត្រូវបានលើកកម្ពស់ពីមួយថ្ងៃទៅមួយថ្ងៃ។

សាលាបឋមធ្យមសិក្សាលីវទូ B សាងសង់នៅភូមិយ៉ុងចាក បានទទួលស្គាល់
សម្រេចបទដ្ឋានជាតិ។

ឃុំលីវទូ មានចំនួនប្រជាជនជាង ៧៥% ជាជនរួមជាតិខ្មែរ ប្រកបរបរកសិករ និងចិញ្ចឹមជលផល។ ហេតុដូច្នេះ ពេលបានទទួលផលពីគោលនយោបាយជនជាតិនិងកម្មវិធីទិសដៅកសាងជនបទថ្មី ឃុំលីវទូ រួមបញ្ជូលទាំងកម្លាំងធនធានដើម្បីកសាងហេដ្ឋារចនាសម្ព័ន្ធជនបទ។ ទន្ទឹមនឹងនោះ ជំរុញការងារឃោសនា ចលនាប្រជាជនរួមគ្នាអនុវត្ត។ គណៈកម្មាធិការប្រជាជនឃុំលីវទូ លោកត្រឹងទ្រុងតិញ មានប្រសាសន៍៖ “អាស្រ័យពង្រីកប្រសិទ្ធភាពតួនាទី អ្នកមានប្រជាប្រិយ កម្មាភិបាល បក្ខជនក្នុងការងារផ្សព្វផ្សាយ ទើបប្រជាជនមានការយល់ដឹងនិងពង្រីកតួនាទីជាតួអង្គសំខាន់ក្នុងការកសាងជនបទថ្មី។ ផ្តើមពីនោះ រួមគ្នាអនុវត្តលក្ខឋាន រួមកម្លាំងបរិច្ចាគដី និងសម្ភារៈសំណង់។ល។ ដើម្បីអនុវត្តនូវកម្មវិធីនានា ដូចជា៖ ធារាសាស្រ្ត ស្ពាន ផ្លូវគមនាគមន៍ជនបទ លូរំដោះទឹក សាលារៀន ដំណាក់សុខាភិបាល ស្ថានីយផ្កត់ផ្គង់ទឹក អគ្គិសនី ។ល។ បច្ចុប្បន្ន សំណង់បានកសាងសម្រេចរួចរាល់ ការបង្កបង្កើនផល ការជួញដូរមុខទំនិញរបស់ប្រជាជនបានងាយស្រួល រួមចំណែកលើកកម្ពស់ប្រាក់ចំណូលនិងលំនឹងជីវភាព”។

ដងផ្លូវគមនាគមន៍ជនបទចូលទៅកាន់ភូមិនានានៅឃុំលីវទូ សុទ្ធតែបានចាក់បេតុងរួចរាល់។

ចំណាប់អារម្មណ៍ពីភាពវិវឌ្ឍន៍នៅតំបន់ជនបទ លោកឡឹមង៉េន នៅភូមិយ៉ុងចាក រៀបរាប់៖ “ខ្ញុំអាយុជិត ៧០ ឆ្នាំហើយ ទើបឃើញតំបន់ជនបទ “ផ្លាស់ថ្មីមុខមាត់” មិនខុសពីទីក្រុងទេ។ ផ្លូវជនបទមានភ្លើងអគ្គិសនីភ្លឺចិញ្ចាច អគ្គិសនី ទឹកស្អាតប្រើប្រាស់មានរាល់ផ្ទះ។ សាលារៀនចាប់ពីមត្តេយ្យដល់អនុវិទ្យាល័យបានសាងសង់យ៉ាងសមរម្យ កូនចៅខ្មែរបានទៅរៀនសូត្រ រៀនវិជ្ជាជីវៈ មានការងារធ្វើ និងរកបានប្រាក់ចំណូលលំនឹង។ ឥឡូវនេះ ទៅតាមភូមិស្រុកឃើញសុទ្ធតែផ្ទះថ្ម គ្មាននៅផ្ទះស្លឹកដូចមុនទៀតឡើយ”។ ចំណែកលោកត្រឹងលីវ អ្នកមានប្រជាប្រិយនៅភូមិបឹងភ្នៀត មានប្រសាសន៍៖ “រដ្ឋមានគោលនយោបាយវិនិយោគទាន់ពេល ដើម្បីអភិវឌ្ឍន៍តំបន់ជនរួមជាតិខ្មែរ ម្ល៉ោះហើយមាមីងសប្បាយរីករាយគ្រប់ៗគ្នា។ ព្រោះហេតុនោះ មាមីងតែងស្រុះស្រួលរួមចំណែកទាំងកម្លាំងពលកម្ម សម្ភារៈ ថវិកា បរិច្ចាកដី ដើម្បីកសាងសំណង់ជនបទ។ បច្ចុប្បន្ន ផ្លូវជនបទនៅភូមិបឹងភ្នៀត បានតភ្ជាប់ភូមិ តភ្ជាប់ឃុំជិតខាង យានជំនិះបើកបរដល់ផ្ទះ មាមីងមានភាពងាយស្រួលក្នុងការផលិត និងជួញដូរសម្ភារៈកសិកម្ម សំណង់ និងលក់ដូរមុខទំនិញ គ្រឿងតុបតែងក្នុងផ្ទះ។ល។ ម៉្លោះហើយរកបានចំណូលលំនឹង ជីវភាពកាន់តែល្អប្រសើរ”។

តាមប្រធានគណៈកម្មាធិការប្រជាជនឃុំលីវទូ លោកត្រឹងទ្រុងតិញ ឃុំបានកសាងសម្រេច ១៨/១៩ លក្ខឋានជនបទថ្មី ក្នុងនោះ នៅតែលក្ខឋានស្ដីពីគ្រួសារក្រីក្រមិនទាន់បានសម្រេច។ បច្ចុប្បន្ន ឃុំផ្ដុំកម្លាំងផ្គួបបញ្ចូលប្រភពទុនពីកម្មវិធីទិសដៅជាតិចំនួន ៣ ក្នុងនោះ ផ្តល់អាទិភាពដល់ការឧបត្ថម្ភលំនៅឋាន បុលទុន បង្កាត់កូនពូជសម្រាប់អភិវឌ្ឍន៍ផលិតកម្ម និងបណ្តុះបណ្តាលវិជ្ជាជីវៈ ឧទ្ទេសនាមការងារធ្វើដល់គ្រួសារក្រីក្រ និងយុវជនក្នុងវ័យពលកម្ម។ ទិសដៅដល់ចុងឆ្នាំ ២០២៣ អត្រាគ្រួសារក្រីក្រនៅក្រោម ៤% និងឃុំត្រូវបានទទួលស្គាល់សម្រេចបទដ្ឋានជនបទថ្មី ៕

យ្វីអាញ់-ត្រឹងរ៉ូន

ចែករំលែកអត្ថបទ

ពាក្យគន្លឹះ