សុខភាព - អប់រំ សុខភាព

29/06/2020 - 15:30

គ្រាប់ខ្នុរជាប្រភពផ្តល់ឱ្យមានសុខភាពល្អ

យោងតាមអ្នកឯកទេស គ្រាប់ខ្នុរមានផ្ទុកនូវជាតិម្សៅ ប្រូតេអ៊ីន សារធាតុប្រឆាំងអុកស៊ីតកម្មខ្ពស់ និងប្រភេទវីតាមីន សារធាតុរ៉ែ ដូចជាវីតាមីនB ស័ង្កសី ជាតិដែក កាល់ស្យូម ទង់ដែង ប៉ូតាស្យូម និងម៉ាញេស្យូម។ល។ អាស្រ័យហេតុនោះ គ្រាប់ខ្នុរមានផលប្រយោជន៍ដល់សុខភាពដែលមិនអាចស្មានបានដូចជា៖

នំធ្វើពីម្សៅគ្រាប់ខ្នុរ។ រូប៖ Stylecraze

+ ល្អសម្រាប់ការរំលាយអាហារ។ ការស្វែងរកជាច្រើន បានបង្ហាញពីប្រសិទ្ធភាពប្រឆាំងនឹងបាក់តេរីនៃគ្រាប់ខ្នុរ ព្រោះគ្រាប់ខ្នុរ មានស្រទាប់គ្រាប់តូចៗស្រូបជុំវិញ ដើរតួជាភ្នាក់ងារប្រឆាំង នឹងបាក់តេរី ហើយមានភាពធន់នឹងបាក់តេរីទូទៅដែលបង្កឱ្យមានជំងឺនៅពោះវៀនដូចជា E.coli។

+ រក្សាកម្រិតកូឡេស្តេរ៉ុលដែលល្អ។ អាស្រ័យផ្ទុកបរិមាណជាតិសរសៃនិងសារធាតុប្រឆាំងអុកស៊ីតកម្មខ្ពស់ គ្រាប់ខ្នុរអាចជួយបង្កើនកម្រិតកូឡេស្តេរ៉ុលតាមទិសដៅវិជ្ជមាន។

+បំប៉ន់សាច់ដុំ។ គ្រាប់ខ្នុរមានផ្ទុកនូវប្រូតេអ៊ីនដែលមានគុណភាពខ្ពស់ដើម្បីជួយដល់ដំណើរការពង្រឹងសាច់ដុំ សមស្របសម្រាប់មនុស្សដែលចង់សម្រកខ្លាញ់និងដំឡើងសាច់ដុំ។

+ ប្រឆាំងមហារីក។ ការសិក្សាជាច្រើនបង្ហាញថាគ្រាប់ខ្នុរមាន លក្ខណៈប្រឆាំងនឹងជំងឺមហារីក ត្រូវបានពន្យល់ដោយមានផ្ទុកសមាសធាតុរុក្ខជាតិនិងសារធាតុប្រឆាំងអុកស៊ីតកម្មខ្ពស់ រួមមានសារជាតិ flavonoids saponins និង phenolic ។

+ កាត់បន្ថយហានិភ័យខ្វះឈាម។ ដោយសារគ្រាប់ខ្នុរមានផ្ទុកជាតិដែកច្រើន (សមាសធាតុជួយសំយោគអេម៉ូក្លូប៊ីន) ហេតុនោះគួរបន្ថែមគ្រាប់នេះទៅក្នុងរបបអាហារដើម្បីជួយជម្រុញបរិមាណជាតិដែកក្នុងរាងកាយនិងបង្ការហានិភ័យនៃការខ្វះឈាម និងបញ្ហាជំងឺផ្សេងៗដែលទាក់ទងនឹងឈាម។

+ បង្កើនថាមពលភ្នែក បំប៉ន់ស្បែកនិងសក់។ គ្រាប់ខ្នុរមានផ្ទុកនូវវីតាមីន A ដែលជាសារធាតុចិញ្ចឹមដ៏សំខាន់បំផុតជួយឱ្យភ្នែកភ្លឺល្អនិងជួយឱ្យសក់ដុះល្អ មិនជ្រុះ។ មិនត្រឹមតែប៉ុណ្ណឹង បើឧស្សាហ៍លាបមុខដោយម្សៅគ្រាប់ខ្នុរលាយជាមួយទឹកដោះគោ ត្រជាក់ក៏មានប្រសិទ្ធភាពបំបាត់ស្នាមជ្រីវជ្រួញធ្វើអោយស្បែក្មេង ស្អាតជាងវ័យ។

មុខសញ្ញាគួរកាត់បន្ថយប្រើប្រាស់គ្រាប់ខ្នុរ៖

+ មនុស្សដែលកំពុងព្យាបាលជំងឺ៖ គ្រាប់ខ្នុរមានផ្ទុកនូវសមាសធាតុដែលគេរកឃើញ អាចធ្វើឱ្យឈាមកកយឺត ចួនកាលធ្វើឱ្យឈាមលែងកកចំពោះមនុស្ស។ នេះមានន័យថា ការបរិភោគគ្រាប់ខ្នុរអាចបង្កើនហានិភ័យនៃការហូរឈាម ជាពិសេសអ្នកដែលលេបថ្នាំដូចជាថ្នាំអាស្ពីរីន ថ្នាំធ្វើឱ្យឈាមវាវ ថ្នាំប្រឆាំងនឹងប្លាកែត ថ្នាំប្រឆាំងនឹងការរលាកដែលមិនគ្មានស្តេរ៉ូអ៊ីត (ibuprofen ឬ napro xen) ។

+ អ្នកត្រូវស្ងោរ ដុតឬចំអិនគ្រាប់ខ្នុរឱ្យឆ្អិនមុនពេលហុប។ល។

អាងញៀង (យោងតាម៖TheHealthSite, Healthline.com)-សុផន

ចែករំលែកអត្ថបទ

ពាក្យគន្លឹះ