សុខភាព - អប់រំ អប់រំ

03/02/2020 - 16:42

អស់ពីចិត្តក្នុងការងារបណ្ដុះបណ្ដាលធនធានមនុស្ស

លោកគ្រូថាច់ធារី មើលមេរៀនត្រៀមលក្ខណៈសម្រាប់ម៉ោងបង្រៀន។

លោកគ្រូថាច់ធារី គ្រូបង្រៀនសាលាចំណេះទូទៅជនជាតិអន្តេវាសិកស្រុកទីវកឹង ខេត្តត្រាវិញ គាត់ជាបុគ្គលគំរូមួយរូបសកម្មក្នុងការងារ ទឹកចិត្តសន្ដោសមេត្តា អស់ពីចិត្តចំពោះការងារបណ្ដុះបណ្ដាលធនធានមនុស្ស បានមិត្តរួមអាជីព និងសិស្សានុសិស្សគោរពស្រឡាញ់។

ម៉ោងបង្រៀនវិញ្ញាសាខ្មែររបស់លោកគ្រូថាច់ធារី ហាក់មានភាពទាក់ទាញ ពញ្ញាក់បានអារម្មណ៍របស់សិស្សានុសិស្ស។ នោះគឺជាថ្វីដៃច្នៃប្រតិដ្ឋក្នុងការអនុវត្តវិធីសាស្រ្តបង្រៀន ដោយការប្រើរូបភាព សម្ដីថ្វីមាត់។ល។ ទិសដៅដើម្បីសិស្សងាយទទួលយកមេរៀន និងជក់ចិត្តក្នុងការរៀនសូត្រ។ ជាគំរូឈានមុខក្នុងការចលនាបង្រៀនរបស់សាលា លោកគ្រូថាច់ធារី តែងយកចិត្តទុកដាក់ដល់ការអប់រំ លត់ដំសីលធម៌ ចរិយាធម៌ដល់សិស្ស និងបង្រៀនឱ្យចេះគួរសមចំពោះចាស់ទុំ។ អាស្រ័យហេតុនោះ សិស្សរបស់គាត់មានចរិយាសម្បត្តិសុភាពរាបសា ឧស្សាហ៍ព្យាយាម រៀនពូកែ អាណាព្យាបាលសិស្សអ្នកណាក៏សប្បាយចិត្ត និងគោរពរាប់អាន។ ប្អូនគឹមធីង៉ុកសាង សិស្សថ្នាក់ទី១១A1 អំណួតពីគ្រូរបស់ខ្លួន៖ “លោកគ្រូថាច់ធារី គាត់មានភាពជិតស្និទ្ធ និងខ្នះខ្នែងជួយឧបត្ថម្ភដល់សិស្សដោយអស់ពីចិត្ត ពិសេសចំពោះសិស្សដែលមានជីវភាពក្រីក្រ។ លោកគ្រូគាត់មានវិធីសាស្ត្របង្រៀនល្អៗ សិស្សងាយយល់ ម្ល៉ោះហើយ ប្អូនចូលចិត្តរៀនវិញ្ញាសាដែលគាត់បង្រៀនណាស់”។

ម៉ោងរៀនវិញ្ញាសាខ្មែរនៅសាលាជនជាតិអន្តេវាសិកស្រុកទីវកឹង។

តាមប្រសាសន៍លោកគ្រូថាច់ធារី ចំពោះការងារ មុខជំនាញ ក្នុងនាមជាគ្រូបង្រៀនយើងត្រូវហាត់ពត់លត់ដំខ្លួន ប្រឹងប្រែងសិក្សាស្រាវជ្រាវ បង្កើនសមត្ថភាពវិជ្ជាជីវៈនិងស្វែងរកវិធីសាស្រ្តបង្រៀនថ្មីៗ ដើម្បីសក្ដិសមជាអ្នកផ្តល់ចំណេះដឹងដល់សិស្ស។ ចំណេះដឹងដែលយើងសន្សំបាន យកទៅអនុវត្តនិងច្នៃប្រតិដ្ឋក្នុងការបង្រៀន ចែករំលែកនិងជួយដល់មិត្តរួមអាជីពដើម្បីមានភាពជឿនលឿន ម្ល៉ោះហើយគាត់បានគ្រូបង្រៀនរបស់សាលា បោះឆ្នោតតែងតាំងធ្វើជាប្រធានសហជីពរបស់សាលា ៣អាណត្តិកន្លងមក ។ ជាមួយតួនាទីជាប្រធានសហជីព រៀងរាល់ឆ្នាំ គាត់សកម្មចលនាសប្បុរសជន រួមវិភាគទានជាទឹកប្រាក់ជិត១០០លានដុង សម្រាប់ជួយដល់គ្រូបង្រៀន សិស្សានុសិស្សមានជីវភាពខ្វះខាត ឈឺថ្កាត់ជាដើម។

រយៈពេលជាង៣៥ឆ្នាំ ផ្សារភ្ជាប់នឹងអាជីពជាគ្រូបង្រៀន ទោះបីជិតដល់អាយុចូលនិវត្តន៍ក៏ដោយ ចំពោះលោកគ្រូថាច់ធារី គឺជាគំរូនៃទឹកចិត្តស្រឡាញ់មុខរបរ និងជាគំរូដ៏ល្អមួយដល់គ្រូបង្រៀន និងសិស្សរបស់សាលាចំណេះទូទៅជនជាតិអន្តេវាសិកទីវកឹង។ លោកគ្រូគឹមចន្ទនា នាយករងសាលាសកលជនជាតិអន្តេវាសិកស្រុកទីវកឹង វាយតម្លៃ៖ “លោកគ្រូថាច់ធារី សកម្មក្នុងការងារ តែងស្រាវជ្រាវរាវរកនិងបង្កើតនូវវិធីសាស្រ្តបង្រៀនល្អៗ ជួយឱ្យសិស្សងាយទទួលយកមេរៀន។ គាត់ជាគ្រូបង្រៀនមួយរូបមានការប្ដេជ្ញាចិត្តខ្ពស់ អស់ពីចិត្តក្នុងបុព្វហេតុអប់រំ សក្ដិសមជាគ្រូបង្រៀនគំរូ ដើម្បីមិត្តរួមអាជីពយកតម្រាប់តាម”៕

អត្ថបទ រូបថត: ពេជ្រសឿន

ចែករំលែកអត្ថបទ

ពាក្យគន្លឹះ