សុខភាព - អប់រំ អប់រំ

23/04/2018 - 20:33

បង្រៀនអក្សរខ្មែរដល់សិស្សនៅតាមសាលាចំណេះទូទៅ

ប៉ុន្មានឆ្នាំកន្លង ខេត្តសុកត្រាំងបានផ្សព្វផ្សាយបង្រៀនអក្សរសាស្រ្តជនជាតិភាគតិច តាមអនុក្រឹត្យលេខ ៨២/២០១០/NĐ-CP របស់រដ្ឋាភិបាល ស្ដីពីសេចក្ដីកំណត់ការបង្រៀន និងរៀនភាសាអក្សរសាស្រ្តរបស់ជនជាតិភាគតិច នៅតាមមូលដ្ឋានអប់រំចំណេះទូទៅនិងមជ្ឈមណ្ឌលអប់រំប្រចាំ។

ម៉ោងរៀនអក្សរខ្មែរនៅសាលាចំណេះទូទៅជនជាតិអន្តេវាសិកម៉ីស្វៀងស្រុកម៉ីស្វៀង ខេត្តសុកត្រាំង។

បច្ចុប្បន្ន ខេត្តសុកត្រាំងមានគ្រូបង្រៀនអក្សរខ្មែរ៣៥៨រូប ដោយរាប់បញ្ចូលទាំងគ្រូបង្រៀនរ៉ាប់រងមុខងារបន្ថែមផង ក្នុងចំណោមនោះ មានគ្រូបង្រៀនជាង៨០% សម្រេចបទដ្ឋានតាមសេចក្ដីកំណត់។ ខេត្តតែងយកចិត្តទុកដាក់ បង្កលក្ខណៈងាយស្រួល និងមានគោលនយោបាយអាទិភាពសម្រាប់គ្រូបង្រៀនខ្មែរលំនឹងចិត្តបំពេញការងារ មានដូច៖ បំពេញបន្ថែមក្របខ័ណ្ឌជូនសាលាដែលបើកបង្រៀនអក្សរសាស្រ្តជនជាតិ; ធ្វើសេនាធិការជូនគណៈកម្មាធិការប្រជាជនខេត្តសហការជាមួយនឹងសាកលវិទ្យាល័យត្រាវិញ បើកវគ្គបង្រៀនកម្រិតមហាវិទ្យាល័យគរុកោសល្យអក្សរសាស្រ្តខ្មែរណាមបូ តាមរយៈធ្វើការបណ្តើររៀនបណ្តើរ អាស្រ័យមន្ទីរអប់រំនិងបណ្តុះបណ្តាល ឧបត្ថម្ភបង់កម្រៃសិក្សាក្នុងរយៈពេល៤ឆ្នាំរៀនមហាវិទ្យាល័យ សំខាន់គឺអាទិភាពចំពោះគ្រូបង្រៀនដែលកំពុងបង្ហាត់នៅតាមសាលាមធ្យមសិក្សាមូលដ្ឋាន មធ្យមសិក្សាចំណេះទូទៅលើភូមិសាស្រ្តខេត្ត (មកទល់សព្វថ្ងៃ មានគ្រូបង្រៀន១៥០រូបបានប្រឡងយកមហាបរិញ្ញាបត្រ)។ គណៈកម្មាធិការប្រជាជនខេត្តនៅទាំងផ្គត់ផ្គង់ទឹកប្រាក់បន្ថែមសម្រាប់ទិញសៀវភៅពុម្ពអក្សរខ្មែរ សៀវភៅសរសេរ ប៊ិច ជូនដល់សិក្ខាកាមកម្រិតស្នើគឺសៀវភៅពុម្ពអក្សរខ្មែរ១ចប់ សៀវភៅសរសេរ៤ក្បាល និងប៊ិច៤ដើមជូនរាល់សិក្ខាកាមក្នុងឆ្នាំសិក្សា សរុបចំនួនទឹកប្រាក់ជាង២ពាន់លានដុងរៀងរាល់ឆ្នាំ។

រៀងរាល់ឆ្នាំ មន្ទីរអប់រំនិងបណ្តុះបណ្តាលតែងរៀបចំបើកថ្នាក់បំប៉នមុខវិជ្ជាជំនាញជា ទូទៅដល់គ្រូបង្រៀនអក្សរសាស្រ្តជនជាតិនាឱកាសវិស្សមកាល។ ចាត់ឲ្យគ្រូបង្រៀនស្នូលណែនាំនិងផ្សព្វផ្សាយបធានបទក្នុងការបង្រៀនអក្សរខ្មែរ តាមរយៈការស្នើសុំរបស់ភូមិភាគនានាក្នុងខេត្ត ដើម្បីគ្រូបង្រៀនអក្សរខ្មែរមានឱកាសរៀនសូត្រមុខវិជ្ជាជំនាញ ចែករំលែកបទពិសោធន៍ក្នុងការបង្ហាត់បង្រៀន។ វគ្គប្រឡងគ្រូបង្រៀនអក្សរខ្មែរពូកែនៅគ្រប់កម្រិតសិក្សា ត្រូវបានរៀបចំជាប្រចាំសំដៅជ្រើសរកគ្រូបង្រៀនមានមុខវិជ្ជាជំនាញច្បាស់លាស់ពូកែ កសាងកងជួរគ្រូបង្រៀនស្នូលផ្នែកភាសាខ្មែររបស់ខេត្ត។ ប៉ុន្មានឆ្នាំជិតៗនេះ មន្ទីរអប់រំនិងបណ្តុះបណ្តាលរក្សាបានល្អនូវវគ្គប្រឡងភាសាខ្មែរ សំដៅជំរុញទឹកចិត្តការរៀនអក្សរខ្មែរពីមួយថ្ងៃទៅមួយថ្ងៃឲ្យកាន់តែរីកចម្រើន និងប្រកបដោយប្រសិទ្ធភាព មានដូច៖ រៀបចំប្រឡងសរសេរអក្សរផ្ទង់ភាសាខ្មែរថ្នាក់ខេត្តប្រឡងសិស្សរៀនពូកែអក្សរខ្មែរនៅថ្នាក់ទី៩និងថ្នាក់ទី១២។ ឆ្នាំសិក្សាកន្លង មន្ទីរអប់រំនិងបណ្តុះបណ្តាលបានចាត់តាំងប្រឡងអក្សរខ្មែរថ្នាក់ខេត្ត នៅកម្រិតមធ្យមសិក្សាចំណេះទូទៅមានសិស្សចូលរួម ប្រឡង២៣រូប និងកម្រិតមធ្យមសិក្សាមូលដ្ឋានមានសិស្សចូលរួមប្រឡង៤២រូប។ ការរៀបចំប្រឡងសរសេរអក្សរផ្ទង់ភាសាខ្មែរនៅកម្រិតបឋមសិក្សាថ្នាក់ខេត្ត មានសិស្សចុះឈ្មោះប្រឡង៩៦រូប។ ឆ្លងតាមរយៈវគ្គប្រឡងខាងលើ បានរួមចំណែកញុាំងឲ្យចលនារៀនអក្សរខ្មែរនៅតាមសាលាចំណេះទូទៅលើភូមិសាស្រ្តទូទាំងខេត្តរីកសាយភាយ៕

ត្រឹងខាញ់ - ប៊ុយធីកេវថើ(moet.gov.vn)-ថាច់សេរី

ចែករំលែកអត្ថបទ

ពាក្យគន្លឹះ