គោលនយោបាយ -ការរស់នៅ ការរស់នៅ

13/07/2017 - 16:36

មិនអល់អែកក្នុងការបង្វែររចនាសម្ព័ន្ធដំណាំ

ការបង្វែររចនាសម្ព័ន្ធដំណាំសត្វចិញ្ចឹម សមស្របជាមួយនឹងលក្ខណៈតំបន់ដីនៃភូមិភាគនីមួយៗ គឺជាការងារចាំបាច់ណាស់។ ដោយយល់ឃើញប្រការទាំងនោះ បានជាពូគឹមគើ ស្នាក់នៅភូមិប្រាសាទលិច ឃុំង្វៀតហ្វា ស្រុកចូវថាញ់ ខេត្តត្រាវិញ មិនអល់អែកបង្វែររចនាសម្ព័ន្ធ ពីដីផលិតស្រូវមិនសូវមានប្រសិទ្ធភាពងាកមកដាំដំណាំផ្សេងៗ ដែលជាជំហានដំបូងបាននាំមកនូវប្រសិទ្ធភាពសេដ្ឋកិច្ចខ្ពស់។

ពូគឹមគើ (ខាងស្តាំ) ឧទ្ទេសនាមទម្រង់រូបភាពដាំល្ហុងយកខ្លី ចិញ្ចឹមវែង។

ពូគឹមគើ (ខាងស្តាំ) ឧទ្ទេសនាមទម្រង់រូបភាពដាំល្ហុងយកខ្លីចិញ្ចឹមវែង។ ពូគឹមគើ ឲ្យដឹង៖ "ខណៈពេលរៀបការចេញនៅដោយឡែក ខ្ញុំមានដីស្រែ១២កុង។ ផលិតស្រូវមិនសូវបានផល បានជាខ្ញុំសម្រេចចិត្តលើកថ្នាល៨កុងដើម្បីដាំដូង។ ប៉ុន្មានឆ្នាំក្រោយមក ប្រាក់ចំណូលពីការប្រមូលផលដូង ខ្ញុំគ្រប់ចាយវាយក្នុងគ្រួសារនិងចិញ្ចឹមកូន៤នាក់រៀនសូត្រ នៅសល់ដើមទុនខ្លះៗ ខ្ញុំសន្សែសន្សំទិញបានដីស្រែ៧កុងបន្ថែម"។ បើតាមពូគឹមគើ ដោយការណែនាំរបស់កម្មាភិបាលផ្នែកកសិកម្មឃុំនិងស្វែងយល់តាមរយៈកាសែត ទូរទស្សន៍ ពីការបង្វែររចនាសម្ព័ន្ធ ដំណាំមានតម្លៃសេដ្ឋកិច្ចខ្ពស់ ដែលសមស្របជាមួយនឹងតំបន់ដីនៅភូមិភាគ។ ឆ្នាំ២០១៦ ពូគឹមគើ បន្តការបង្វែររចនាសម្ព័ន្ធដីស្រែផលិតស្រូវ៧កុង ងាកមកដាំក្រូចថ្លុង។ ពីព្រោះក្រូចថ្លុងត្រូវចំណាយពេលពី៣-៤ឆ្នាំ ទើបចាប់ផ្តើមប្រមូលផល ម្ល៉ោះហើយដើម្បីយកខ្លីចិញ្ចឹមវែង ពូគឹមគើបានដាំចេកនិងល្ហុងឆ្លាស់គ្នាក្នុងចម្ការក្រូចថ្លុង។ របៀបធ្វើនេះ ជំហានដំបូងមានប្រសិទ្ធភាពដោយរកបានប្រាក់ចំណូលពីការដាំចេក និងល្ហុងក្នុងមួយថ្ងៃជិត៤០០.០០០ដុង ខ្ពស់ជាងច្រើន បើប្រៀបធៀបនឹងផលិតស្រូវ។ ពូគឹមគើ ឲ្យដឹង ដោយក្តីរីករាយ៖ "អាស្រ័យរដ្ឋអំណាចភូមិភាគមានការជឿជាក់ប្រគល់ ឲ្យខ្ញុំធ្វើប្រធានសាខាសមាគមកសិករភូមិ ម្ល៉ោះហើយរយៈពេលកន្លង ខ្ញុំមានឱកាសរៀនសូត្រ និងដកស្រង់បាននូវបទពិសោធន៍ខ្លះៗផងដែរ។ ផ្តើមពីនោះ ខ្ញុំបង្វែររចនាសម្ព័ន្ធពីការធ្វើស្រែងាកមកលើកចម្ការដាំដូងនិងក្រូចថ្លុង ឃើញថាជីវភាពគ្រួសារបានធូរធារជាងមុន"។ ក្រៅពីនេះ ពូគឹមគើថែមទាំងដាំម្លូបានជិត៣០០ជន្លង់ រកបានប្រាក់ចំណូលទៀងទាត់ជាង៣លានដុង/ខែ។ ដូច្នេះ ប្រាក់ចំណូលបានមកពីការដាំដូង ចេក ល្ហុងនិងម្លូ ពូគឹមគើរកបានប្រាក់ចំណូលជិត២០លានដុង/ខែ ។

លោកកៀងថាញ់យៀង ប្រធានគណៈកម្មការភូមិប្រាសាទលិច ឲ្យដឹង៖ "ពូគឹមគើ ឧស្សាហ៍ព្យាយាមទ្រាំលំបាករៀនសូត្របទពិសោធន៍ក្នុងការ បង្កបង្កើនផលបង្វែររចនាសម្ព័ន្ធដំណាំនាំមកនូវប្រសិទ្ធភាពខ្ពស់។ ទន្ទឹមនឹងនោះ ពូគឹមគើ នៅទាំងអនុវត្តបានល្អនូវតួនាទីជាប្រធានសាខាសមាគមកសិករភូមិប្រាសាទលិច ដោយបានរួមចំណែកយ៉ាងច្រើន ដល់ការកសាងភូមិស្រុក ស័ក្តិសមជាគំរូល្អដើម្បីមាមីងនៅទីនេះយកតម្រាប់តាម"៕

ម៉ាល័យ-លីសៀ

ចែករំលែកអត្ថបទ

ពាក្យគន្លឹះ