មុនពេលឈានចូលឆ្នាំសិក្សាថ្មី ២០២៦ - ២០២៧ លោកគ្រូ អ្នកគ្រូនិងសិស្សានុសិស្សទាំងអស់នៃសាលាបឋមសិក្សាអង្គុលី (នៅសង្កាត់ដុងថាញ់ ខេត្តវិញឡុង) បានត្រៀមលក្ខណរួចរាល់ ចាប់ពីមូលដ្ឋានសម្ភារៈ បំប៉នមុខជំនាញ រហូតដល់ផែនការធានាសុវត្ថិភាពសាលារៀន។ ជាសាលារៀនមួយមានលក្ខណៈពិសេស ដោយមានកូនចៅជនជាតិខ្មែររៀនច្រើន ភាពម្ចាស់ការនិងការរៀបចំយ៉ាងហ្មត់ចត់របស់សាលារៀន បាននាំមកនូវបរិយាកាសរីករាយ បង្កទំនុកចិត្តដល់អាណាព្យាបាលសិស្ស ព្រមទាំងរដ្ឋអំណាចភូមិភាគ។
ទីធ្លាសាលាបឋមសិក្សាអង្គុលី បានកសាងយ៉ាងធំទូលាយ បង្កបានជាលំហបៃតង - ជ្រះ - ស្អាត បម្រើឱ្យសកម្មភាពកម្សាន្ត និងការសិក្សារបស់សិស្សានុសិស្ស។
ទិដ្ឋភាពថ្មី ស្មារតីថ្មី
ប៉ុន្មានថ្ងៃនេះ បរិយាកាសនៅសាលាបឋមសិក្សាអង្គុលី មានភាពរីករាយនិងអ៊ូអរយ៉ាងខ្លាំង។ អាស្រ័យការយកចិត្តទុកដាក់ចង្អុលការយ៉ាងជិតដិតពីផ្នែកអប់រំ ព្រមទាំងប្រភពថវិកាឧបត្ថម្ភទាន់ពេលពីគណៈកម្មាធិការប្រជាជនភូមិភាគ សាលារៀនបានផ្លាស់ប្ដូរទិដ្ឋភាពថ្មីយ៉ាងស្អាតបាតនិងសមរម្យ។
ប្រព័ន្ធបន្ទប់រៀន បន្ទប់មុខងារ មណ្ឌលការិយាល័យ និងប្រព័ន្ធរបងជុំវិញ សុទ្ធតែបានលាបពណ៌ថ្មីយ៉ាងស្អាតបាត។ អាគារពហុមុខងារ កន្លែងសម្រាប់សកម្មភាពកាយសម្បទានិងសិល្បៈរបស់សិស្ស ព្រមទាំងប្រព័ន្ធបង្គន់អនាម័យសម្រាប់គ្រូបង្រៀននិងសិស្ស ក៏បានកែលម្អរួចរាល់ផងដែរ។ ជាពិសេស មណ្ឌលអឌ្ឍអន្តេវាសិក បានបំពាក់បរិក្ខារគ្រប់គ្រាន់ ត្រៀមលក្ខណៈរួចរាល់បម្រើការហូបចុក និងសម្រាករបស់សិស្សានុសិស្សប្រកបដោយសុវត្ថិភាព នៅក្នុងសាលារៀន។
ឆ្នាំសិក្សា ២០២៦ - ២០២៧ សាលារៀនមានសេចក្តីរីករាយយ៉ាងខ្លាំង ដោយសារបរិមាណសិស្សកើនឡើងគួរឱ្យកត់សម្គាល់។ សាលារៀនទាំងមូលមាន ១០ បន្ទប់រៀន ដោយមានសិស្សសរុប ៣១២ នាក់ (កើនឡើងជាង ២០ នាក់ បើធៀបនឹងឆ្នាំសិក្សាមុន)។ ក្នុងនោះ ការងារជម្រើសសិស្សចូលរៀនថ្នាក់ទី ១ សម្រេចបានលទ្ធផលគួរឱ្យចាប់អារម្មណ៍ ដោយចលនាកុមារគ្រប់អាយុចូលរៀនបាន ៦៥/៦៥ នាក់ សម្រេចអត្រា ១០០%។
លោកគ្រូ ស៊ើងណាវី ចាងហ្វាងសាលាបឋមសិក្សាអង្គុលី បានឱ្យដឹង៖ “ដើម្បីឆ្លើយតបនឹងបរិមាណសិស្សកើនឡើង សាលារៀនបានម្ចាស់ការរៀបចំ និងប្រគល់ភារកិច្ចជំនាញយ៉ាងសមស្របជូនដល់កម្មាភិបាល គ្រូបង្រៀន និងបុគ្គលិកចំនួន ២១ រូប ដោយធានាទៅតាមសមត្ថភាព និងចំណង់ចំណូលចិត្ត។ មុនថ្ងៃបើកបវេសនកាល កម្មាភិបាលគ្រប់គ្រង និងគ្រូបង្រៀនទាំងអស់ បានសម្រេចវគ្គបំប៉នអំពីសៀវភៅមុខវិជ្ជាសិក្សា អប់រំសម្របទៅនិងកុមារពិការ និងសុវត្ថិភាពម្ហូបអាហារ។ ក្រុមគ្រូបង្រៀនបច្ចុប្បន្នមានមុខជំនាញរឹងមាំ និងពោរពេញដោយក្តីប្ដេជ្ញាចិត្តសម្រាប់ឆ្នាំសិក្សាថ្មី”។
រួមដំណើរជាមួយសិស្សានុសិស្សតំបន់ជនរួមជាតិខ្មែរ
ដោយមានលក្ខណៈពិសេសគឺសិស្សានុសិស្សជាង ៨០% ជាកូនចៅជនរួមជាតិខ្មែរ គណៈចាងហ្វាងសាលាបឋមសិក្សាអង្គុលី បានកំណត់ភារកិច្ចស្នូលគឺការរៀបចំស្មារតី និងបង្កបរិស្ថានសម្រាប់ខ្លួនសម្រាប់កុមារ។
មុនពេលចូលរៀនថ្នាក់ទី ១ សាលារៀនបានចាត់តាំងជោគជ័យនូវថ្នាក់ “បង្កើនភាសាវៀត” រយៈពេល ៤ សប្តាហ៍ ដល់សិស្សជនជាតិខ្មែរជាង ៥០ នាក់។ វគ្គសិក្សារយៈពេលខ្លីនេះ មានអត្ថន័យសំខាន់ណាស់ ដោយជួយឱ្យប្អូនៗជម្រុះចោលរបាំងភាសា មានភាពជឿជាក់ក្នុងការប្រាស្រ័យទាក់ទង និងស៊ាំទៅនឹងបរិស្ថានបឋមសិក្សាបានឆាប់រហ័ស។
ទន្ទឹមនឹងនោះ សាលារៀនបានសកម្មចលនាប្រភពធនធានក្នុងសង្គម ដើម្បីជូនអាហារូបករណ៍ សៀវភៅ និងសម្លៀកបំពាក់ឯកសណ្ឋានដល់សិស្សដែលមានស្ថានភាពលំបាក ដោយប្តេជ្ញាចិត្តមិនទុកឱ្យសិស្សណាម្នាក់បោះបង់ការសិក្សាដោយសារខ្វះខាតឡើយ។
នៅតាមបន្ទប់រៀន បរិយាកាសរៀបចំទទួលសិស្សថ្មីបានប្រព្រឹត្តទៅយ៉ាងកក់ក្តៅ។ លោកគ្រូ អ្នកគ្រូប្រចាំថ្នាក់ មិនត្រឹមតែយកចិត្តទុកដាក់តុបតែងតាមបន្ទប់រៀននីមួយៗប៉ុណ្ណោះទេ ថែមទាំងត្រៀមវិធីសាស្ត្រគរុកោសល្យសមស្របនឹងលក្ខណៈចិត្តសាស្ត្ររបស់កុមារទៀតផង។
អ្នកគ្រូ ស៊ើងធីសាផន គ្រូប្រចាំថ្នាក់ទី ១/១ បានឱ្យដឹង ៖ “ដើម្បីជួយសិស្សកាត់បន្ថយភាពអៀនខ្មាស ខ្ញុំបានបោសសម្អាតថ្នាក់រៀន តុបតែងរូបភាព និងរៀបចំតុរៀនតាមលក្ខណៈវិទ្យាសាស្ត្រ។ ចាប់ពីថ្ងៃដំបូងចូលសាលា ខ្ញុំបានទទួលសិស្សដោយស្នាមញញឹមកក់ក្តៅ ហៅឈ្មោះសិស្សម្នាក់ៗ និងរៀបចំល្បែងកម្សាន្ត ច្រៀងរាំដើម្បីស្គាល់គ្នា។ ចំពោះសិស្សខ្មែរ ខ្ញុំតែងតែនិយាយយឺតៗ ប្រើប្រាស់ពាក្យងាយយល់ និងរូបភាពជាក់ស្តែង។ ទន្ទឹមនឹងនោះ ខ្ញុំបានសហការជិតដិតជាមួយអាណាព្យាបាលសិស្ស ដើម្បីរួមគ្នាហាត់ភាសាវៀតដល់សិស្ស។"
អ្នកគ្រូ ស៊ើងធីសាផន គ្រូប្រចាំថ្នាក់ ថ្នាក់ទី ១/១ ប្រើប្រាស់ឧបករណ៍អន្តរកម្មទំនើប ណែនាំសិស្សហាត់សរសេរអក្សរ។
ដោយការអំណត់ព្យាយាមរបស់លោកគ្រូ អ្នកគ្រូ បាននាំមកនូវសេចក្តីរីករាយយ៉ាងធំធេងដល់កុមារ និងបង្កបានទំនុកចិត្តពីអាណាព្យាបាលសិស្ស។ ទឹកមុខស្រស់ញញឹមពេលឈានជើងចូលថ្នាក់រៀនថ្មី ប្អូនស្រី គឹមធីកេវត្រាង សិស្សថ្នាក់ទី ១/១ បានឱ្យដឹង៖ “ចូលរៀនសូត្រប៉ុន្មានថ្ងៃមកនេះ កូនស្គាល់បានមិត្តភក្តិជាច្រើន កូនសរសេរអក្សរបានអ្នកគ្រូសរសើរ កូនសន្យានឹងខិតខំរៀនសូត្រឱ្យបានល្អ”។
ជូនចៅមកសាលាតាំងពីព្រលឹម អ្នកមីងស៊ើងធីសារាម (កើតឆ្នាំ ១៩៦២) ជាអាណាព្យាបាលសិស្ស ថ្នាក់ទី ១/២ បានសម្តែងសេចក្តីរីករាយ ៖ "ឃើញសាលារៀនបំពាក់សម្ភារគ្រប់គ្រាន់ រៀបចំមានរបៀបរៀបរយ ខ្ញុំត្រេកអរនិងកក់ក្តៅចិត្តពេលជូនចៅមករៀន។ ខ្ញុំចង់ឱ្យចៅបានរៀនហូបចុក-ស្នាក់នៅក្នុងសាលារៀន ទើបបានទិញសម្លៀកបំពាក់ សម្ភារសិក្សាគ្រប់គ្រាន់ មិនឱ្យចៅខ្វះខាតអ្វីឡើយ”។
លោកគ្រូ ថាច់ណន គ្រូប្រចាំថ្នាក់ ថ្នាក់ទី ១/២ សាលាបឋមសិក្សាអង្គុលី បានយកចិត្តទុកដាក់តាមដាន និងណែនាំសិស្សានុសិស្សខ្មែរហាត់សរសេរតួអក្សរក្នុងថ្ងៃចូលសាលា។
កសាងបរិស្ថានសិក្សាប្រកបដោយសុវត្ថិភាពនិងរីករាយ
ទន្ទឹមនឹងការផ្លាស់ថ្មីវិធីសាស្ត្របង្រៀន កិច្ចការសុខាភិបាលសាលារៀន សុវត្ថិភាពអនាម័យចំណីអាហារ និងធានាសន្តិសុខសណ្តាប់ធ្នាប់ក៏បានសាលារៀនយកចិត្តទុកដាក់ជាចម្បងផងដែរ។ កម្មាភិបាលសុខាភិបាលទទួលបន្ទុក បានបំប៉នជំនាញស៊ីជម្រៅអំពីការគ្រប់គ្រងផ្ទះបាយអឌ្ឍអន្តេវាសិក និងត្រួតពិនិត្យប្រភពចំណីអាហារយ៉ាងម៉ឺងម៉ាត់។ សាលារៀនក៏បានម្ចាស់ការសហការជាមួយនគរបាលភូមិភាគ ដើម្បីសម្រួលចរាចរណ៍ និងបែងផ្លូវនៅតំបន់ខ្លោងទ្វារសាលា សំដៅចៀសវាងការស្ទះចរាចរណ៍ក្នុងម៉ោងសិស្សចេញរៀន។
លោកគ្រូ ស៊ើងណាវី ចាងហ្វាងសាលាបានបញ្ជាក់៖ “ទិសដៅសំខាន់នៃសាលាបឋមសិក្សាអង្គុលី ក្នុងឆ្នាំសិក្សា ២០២៦ - ២០២៧ គឺបន្តលើកកម្ពស់គុណភាពអប់រំគ្រប់ជ្រុងជ្រោយ អនុវត្តប្រកបដោយប្រសិទ្ធភាពនូវកម្មវិធីអប់រំចំណេះទូទៅថ្មី លើកកម្ពស់គុណភាពបង្រៀន និងរៀនភាសាវៀតជូនដល់សិស្សខ្មែរ រួមផ្សំនឹងការបង្រៀនវប្បធម៌ ជាមួយនឹងការគិតគូរហូបចុក-ស្នាក់នៅពេលថ្ងៃត្រង់ ធានាបរិយាកាសសិក្សាប្រកបដោយសុវត្ថិភាព និងរីករាយជូនដល់ប្អូនៗ”។
ការរៀបចំយ៉ាងហ្មត់ចត់គ្រប់ជ្រុងជ្រោយ រួមជាមួយនឹងស្មារតីទទួលខុសត្រូវ និងសេចក្តីស្រឡាញ់អាជីពរបស់សមូហភាពកម្មាភិបាល និងគ្រូបង្រៀននៃសាលាបឋមសិក្សាអង្គុលី គឺជាបង្អែករឹងមាំ សង្ឃឹមថានឹងទទួលបានលទ្ធផលយ៉ាងត្រចះត្រចង់ក្នុងឆ្នាំសិក្សាថ្មី ២០២៦ - ២០២៧ ខាងមុខនេះ៕
ថាច់ធី
ពាក្យគន្លឹះ
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
