សុខភាព - អប់រំ អប់រំ

29/08/2026 - 10:29

ពិធីប្រកាសលទ្ធផលខេមរភាសានៅវត្តកំពង់រាជបុប្ផា

នារាត្រីទី២៨ ខែសីហា ឆ្នាំ២០២៦ វត្តកំពង់រាជបុប្ផា(អង្គុលីខាងជើង) ស្ថិតនៅអនុសង្កាត់អង្គុលី សង្កាត់ដុងថាញ់ ខេត្តវិញឡុង បានចាត់តាំងពិធីប្រកាសលទ្ធផលប្រឡង និងបូកសរុបវគ្គសិក្សាអក្សរខ្មែរ នាឱកាសវិស្សមកាល ឆ្នាំ២០២៦។

ប្អូនៗសិស្សានុសិស្សថ្នាក់ទី១ ទី២ និងទី៣ នៅវត្តកំពង់រាជបុប្ផា កំពុងអង្គុយរៀបរយ ដើម្បីរង់ចាំប្រកាសលទ្ធផល។

ឆ្លងកាត់រយៈពេលជិត ៣ ខែ ខិតខំសិក្សា ក្រោមការបង្រៀនផ្ទាល់ពីសំណាក់ព្រះសង្ឃ និងគ្រូបង្រៀនស្ម័គ្រចិត្ត សិស្សានុសិស្សចំនួន ៨៨ រូប នៃ ៣ ថ្នាក់រៀន (ថ្នាក់ទី១ ទី២ និងទី៣) ទទួលបានលទ្ធផលល្អប្រសើរ។ ជាក់ស្តែងដូចជា ថ្នាក់ទី១ មានបេក្ខសិស្ស ៣៩ រូប ប្រឡង ៣ វិញ្ញាសា (អក្សរផ្ចង់ សរសេរតាមអានអំពីតួព្យព្ជនៈ និងបំពេញឃ្លា)។ ថ្នាក់ទី២ មានបេក្ខសិស្ស ៣៤ រូប ប្រឡង ៤ វិញ្ញាសា (អក្សរផ្ចង់ សរសេរតាមអាន ឆ្លើយសំណួរមេរៀន និងសូត្រធម៌នមស្សការ)។ ថ្នាក់ទី៣ មានបេក្ខសិស្ស ១៥ រូប ប្រឡង ៤ វិញ្ញាសា (សរសេរតាមអាន ឆ្លើយសំណួរមេរៀន លេខចំណោទ និងសូត្រធម៌នមស្សការ)។

នាឱកាសនេះ ព្រះសង្ឃនិងគណៈកម្មការវត្តបានប្រគល់រង្វាន់លើកទឹកចិត្ត រួមមាន៖ សៀវភៅ ប៊ិក និងវត្ថុអនុស្សាវរីយ៍ផ្សេងៗ ជូនដល់សិស្សដែលទទួលបានលទ្ធផលសិក្សាល្អ។ សកម្មភាពប្រចាំឆ្នាំនេះ បង្ក បរិយាកាសរីករាយនាថ្ងៃវិស្សមកាល តាមរយៈនោះ រួមចំណែកថែរក្សា អភិរក្សអក្សរសាស្ត្រនិងអត្តសញ្ញាណវប្បធម៌ខ្មែរ៕

ថាច់ ធី

ចែករំលែកអត្ថបទ

ពាក្យគន្លឹះ