មហាសាមគ្គីជនជាតិ ភូមិស្រុកផ្លាស់ថ្មី

26/08/2026 - 05:57

ធ្វើមានដោយសារដំណាំរួមផ្សំ

ជាច្រើនឆ្នាំមកនេះ ដោយសារទម្រង់ដាំដំណាំរួមផ្សំ បានជួយប្តីប្រពន្ធបងស្រី ថាច់ធីសាផា នៅភូមិព្រែកឆ្វេង ឃុំញូយ៉ា ទីក្រុងកឹងធើ ចាកផុតពីភាពក្រីក្រឈានឡើងធូរធារ។ នោះគឺជាលទ្ធផលនៃការឧស្សាហ៍ព្យាយាមក្នុងការពលកម្ម ភាពរហ័សរហួនក្នុងការក្តាប់យកទីផ្សារ និងមោះមុតអនុវត្តវិទ្យាសាស្ត្រ បច្ចេកទេសចូលក្នុងការផលិត។

បងស្រីថាច់ធីសាផា រីករាយចំពោះសមិទ្ធផលដែលសម្រេចបាន។

សង់ផ្ទះចេញរស់នៅដោយឡែក ប្តីប្រពន្ធបងស្រី សាផា មានដីស្រែតែ ៥ កុង ដែលឪពុកម្តាយចែកឱ្យ ម្ល៉ោះហើយ ចំណូលមិនលំនឹង ជីវភាពជួបការលំបាកច្រើន។ មិនព្រមចុះចាញ់ភាពក្រីក្រ ប្តីប្រពន្ធបងស្រីបានស្វែងរកទិសដៅថ្មី ដើម្បីលើកកម្ពស់ប្រាក់ចំណូលសម្រាប់គ្រួសារ។ សង្កេត ឃើញការដាំដំណាំរួមផ្សំនាំមកនូវតម្លៃសេដ្ឋកិច្ចខ្ពស់ ប្តីប្រពន្ធបងស្រី សាផា បានមោះមុតបង្វែរដីស្រែ ២ កុង លើកចម្ការដាំដំណាំរួមផ្សំ។ ចាប់ពីពេលនោះមក ប្តីប្រពន្ធបងស្រីបានដាំផ្លាស់ប្តូរមុខដំណាំច្រើនប្រភេទ ជាក់ស្តែង ដូចជា៖ ត្រសក់ ម្រះ ពោតបារាំង ម្ទេស ខ្ទឹមស្លឹកជាដើម។ ទន្ទឹមនឹងនោះ បងស្រីខ្នះខ្នែងរៀនសូត្របទពិសោធន៍ពីគ្រួសារដែលផលិតពូកែ ចូលរួមវគ្គបំប៉នបច្ចេកទេសដាំដំណាំរួមផ្សំ និងម្ចាស់ការអនុវត្តវិទ្យាសាស្ត្របច្ចេកទេសជឿនលឿនក្នុងការផលិត។ ការដាំដំណាំរួមផ្សំ បងស្រីប្រើប្រាស់ផ្ទាំងគម្របកសិកម្ម ដំឡើងប្រព័ន្ធស្រោចស្រពស្វ័យប្រវត្តិ ដើម្បីបន្ថយការចំណាយ ប្រិតសំចៃទឹក បន្ថយកម្លាំងពលកម្ម ប៉ុន្តែប្រសិទ្ធភាពសេដ្ឋកិច្ចនៅតែខ្ពស់។ បងស្រី សាផា សំណេះសំណាល៖ “មានតែប្តីប្រពន្ធពីរនាក់ កូនៗនៅតូច ម្ល៉ោះហើយចង់ដាំដំណាំរួមផ្សំមានប្រសិទ្ធភាព គឺត្រូវខិតខំប្រឹងប្រែងស្វែងយល់ពីតម្រូវការទីផ្សារ ក្តាប់ច្បាស់រដូវកាល ដើម្បីជ្រើសរើសដំ ណាំសមស្រប ទាំងទទួលបានទិន្នផលខ្ពស់និងលក់បានថ្លៃ”។

តាមសម្តីបងស្រី សាផា របរដាំដំណាំរួមផ្សំទោះបី នឿយហត់បន្តិចមែន ប៉ុន្តែទទួលបានប្រាក់ចំណូលបង្គួរ ពិសេសគឺនៅពេលដំណាំបានទិន្នផលខ្ពស់ លក់ បានថ្លៃ ក្នុងមួយកុងអាចទទួលបានប្រាក់ចំណេញពី ១០ ដល់ ៣០ លានដុងក្នុងមួយរដូវទៅតាមប្រភេទ ដំណាំនីមួយៗ។ ប្រាក់ចំណេញទទួលបាន បងស្រីបានវិនិយោគទិញដីដើម្បីពង្រីកផ្ទៃដីដាំដំណាំរួមផ្សំនិងផលិតស្រូវ។ អាស្រ័យភាពឧស្សាហ៍ព្យាយាម ចេះគិតគូរ និងមានការប្តេជ្ញាចិត្តចាកពីភាពក្រីក្រ ម្ល៉ោះហើយបងស្រី សាផា មានជីវភាពធូរធារនៅលើចំណិតដីរបស់គ្រួសារ។ ផ្ដើមពីដី ៥ កុងដំបូង រហូត មកដល់ពេលនេះ បងស្រីមានដីស្រែ ២០ កុង ដីជំនាញដាំដំណាំរួមផ្សំ ៨ កុង និងផ្ទះថ្មមួយខ្នងយ៉ាងសមរម្យ។ បងស្រីសាផា ឱ្យដឹង៖ “រដូវដំណាំរួមផ្សំកន្លងហើយ ខ្ញុំដាំខ្ទឹមស្លឹក ម្រះ ពោតបារាំង ផ្កាគូឆាយ និងល្ពៅ លើផ្ទៃដី ៨ កុង ទទួលបានប្រាក់ចំណេញជាង ១៥០ លានដុង។ ជាច្រើនឆ្នាំមកនេះ អាស្រ័យការដាំដំណាំរួមផ្សំ ទើបគ្រួសារខ្ញុំមានជីវភាពធូរធារដូចសព្វថ្ងៃ”។

លោកស្រី ង្វៀងហុងក្វាង អនុប្រធានគណៈកម្មាធិការរណសិរ្សមាតុភូមិវៀតណាម និងជាប្រធានសមាគមកសិករឃុំញូយ៉ា វាយតម្លៃ៖ “ដោយសារភាពឧស្សាហ៍ព្យាយាម រហ័សរហួន និងការស្វែងយល់រៀនសូត្រ បងស្រី ថាច់ធីសាផា បានកសាងសេដ្ឋកិច្ចយ៉ាងរឹងមាំ ក្លាយជាគ្រួសារធូរធារនៅភូមិភាគតាមរយៈទម្រង់ដាំដំណាំរួមផ្សំ។ លទ្ធផលនេះគឺជាភស្តុតាងបញ្ជាក់ពីឆន្ទៈពុះពារការលំបាក និងស្មារតី ហ៊ានគិត ហ៊ានធ្វើ ហ៊ានផ្លាស់ប្តូរមុខដំណាំ បានជួយឱ្យគ្រួសារបងស្រី ក្លាយជាគ្រួសារមានជីវភាពធូរធារនៅលើស្រុកកំណើតរបស់ខ្លួន។ ជាពិសេស គឺកាន់តែបញ្ជាក់ច្បាស់ពីប្រសិទ្ធភាពនៃទម្រង់ដាំដំណាំ រួមផ្សំកំពុងផ្សព្វផ្សាយយ៉ាងទូលំទូលាយក្នុងជនរួមជាតិខ្មែរ ហើយស្មារតីពុះពារការលំបាក ដើម្បីបង្កើតភាពមានបានដោយស្របច្បាប់របស់បងស្រី សាផា គឺពិតជាសក្តិសមនឹងទទួលបានការសរសើរយ៉ាងខ្លាំង”៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ