សុខភាព - អប់រំ អប់រំ

01/04/2025 - 08:56

ក្រសួងអប់រំនិងបណ្តុះបណ្តាល មិនផ្លាស់ប្តូរកាលបរិច្ឆេទប្រឡងសញ្ញាបត្រវិទ្យាល័យឆ្នាំ២០២៥

ក្រសួងអប់រំនិងបណ្តុះបណ្តាល ទើបតែផ្តល់ព័ត៌មានអំពីកាលបរិច្ឆេទប្រឡងសញ្ញាបត្រវិទ្យាល័យឆ្នាំ ២០២៥ ដូចដែលបានប្រកាសរួចមកហើយ។ យោងតាមនោះ ការប្រឡងសញ្ញាបត្រវិទ្យាល័យនៅឆ្នាំនេះ តាមការគ្រោងទុកនឹងប្រព្រឹត្តឡើងនៅថ្ងៃទី ២៦ និងថ្ងៃទី ២៧ ខែមិថុនា។ ក្រសួងអប់រំនិងបណ្តុះបណ្តាល រក្សាកាលបរិច្ឆេទប្រឡង ដើម្បីលំនឹងទឹកចិត្តសិស្ស ឪពុកម្តាយសិស្ស និងមិនធ្វើឱ្យប៉ះពាល់ដល់សកម្មភាពផ្សេងៗទៀតនៃផ្នែកអប់រំ។

បេក្ខជនចូលរួមសម័យប្រឡងសញ្ញាបត្រវិទ្យាល័យ ឆ្នាំ២០២៤។ រូបជាឧទាហរណ៍

ក្រសួងអប់រំនិងបណ្តុះបណ្តាល សំណូមពរដល់មន្ទីរអប់រំនិងបណ្តុះបណ្តាល សហការស្អិតល្មួតជាមួយអង្គភាពពាក់ព័ន្ធនានា ដើម្បីផ្សព្វផ្សាយពីផែនការសិក្សាឆ្នាំ ២០២៤ - ២០២៥ ផ្សព្វផ្សាយពីសម័យប្រឡងសញ្ញាបត្រវិទ្យាល័យ ត្រូវតាមផែនការ ធានាសុវត្ថិភាព ហ្មត់ចត់ និងតាមបទប្បញ្ញត្តិ។

មុននេះ មានមន្ទីរអប់រំនិងបណ្តុះបណ្តាលជាច្រើនបានផ្ញើឯកសារស្នើសុំក្រសួងអប់រំនិងបណ្តុះបណ្តាល បន្ថយកាលបរិច្ឆេទប្រឡងសញ្ញាបត្រវិទ្យាល័យ។ មូលហេតុស្នើគឺក្នុងរយៈពេលខាងមុខមានការរួមបញ្ចូលខេត្ត ក្រុងអាចនាំឱ្យមានការច្របូកច្របល់ដល់ការត្រៀមបម្រុងសម្រាប់សម័យប្រឡង។

នៅហាណូយ មន្ទីរអប់រំនិងបណ្តុះបណ្តាល បានលើកឡើងថា ចំនួនសិស្សនៅហាណូយ ចូលរួមសម័យប្រឡងសញ្ញាបត្រមានចំនួនច្រើនជាងគេក្នុងទូទាំងប្រទេស ដូច្នេះប្រសិនមានការផ្លាស់ប្តូរ នាំឱ្យច្របូកច្របល់ដល់ការត្រៀមបម្រុងនឹងមានភាពស្មុគស្មាញណាស់។ ឆ្នាំនេះក៏ជាឆ្នាំដំបូងដែលសិស្សប្រឡងសញ្ញាបត្រវិទ្យាល័យ តាមកម្មវិធីអប់រំចំណេះទូទៅថ្មី ឆ្នាំ ២០១៨ ម្ល៉ោះហើយ មានចំណុចថ្មីៗជាច្រើន ដូចជាចំនួនវិញ្ញាសាប្រឡង លក្ខន្តិកៈប្រឡង។ល។

ហាណូយនិងភូមិភាគមួយចំនួនទៀត ក៏បានស្នើសុំគណៈកម្មាធិការប្រជាជន អនុញ្ញាតឱ្យកែតម្រូវកាលបរិច្ឆេទប្រឡងជម្រើសសិស្សចូលថ្នាក់ទី ១០ ផងដែរ។

យោងតាមគម្រោងផែនការ រយៈពេលសម្រាប់ឆ្នាំសិក្សា ២០២៤-២០២៥ អាស្រ័យក្រសួងអប់រំ និងបណ្តុះបណ្តាល បានប្រកាសតាំងពីដើមឆ្នាំសិក្សា សម័យប្រឡងសញ្ញាបត្រវិទ្យាល័យឆ្នាំ ២០២៥ តាមការគ្រោងទុកនឹងប្រព្រឹត្តឡើងនៅថ្ងៃទី ២៦និងថ្ងៃទី២៧ ខែមិថុនា៕

យោងតាម tuoitre.vn -ប្រែសម្រួល៖ សុផន

ចែករំលែកអត្ថបទ

ពាក្យគន្លឹះ