មហាសាមគ្គីជនជាតិ គំរូក្នុងសហគមន៍

25/11/2024 - 15:20

ជម្នះលំបាកដើម្បីឈានឡើងធូរធារ

ដោយការប្រឹងប្រែងប្រកបការងាររកស៊ី មិនរារែកក្នុងការអនុវត្តបច្ចេកទេសជឿនលឿនក្នុងការផលិតសម្រេចប្រសិទ្ធភាព ពូឌៀងដេន នៅអនុសង្កាត់ទី៦ សង្កាត់ទី៧ ក្រុងសុកត្រាំង ខេត្តសុកត្រាំង បានជួយឱ្យគ្រួសារចាកផុតពីភាពក្រីក្រ ក្លាយជាគ្រួសារមួយមានជីវភាពធូរធារក្នុងភូមិស្រុក។

ពូឌៀងដេន កំពុងប្រមូលផលជីរបន្លា។

ដោយឆ្លាតវៃក្នុងពលកម្មផលិត ម៉្លោះហើយ នៅពេលដែលឪពុកម្ដាយ ចែកដីឱ្យ៣កុង ពូដេន បានឡើងចម្ការ ១ កុង និងធ្វើស្រែ ២ កុង។ គាត់ដាំស្ពៃចង្កឹះ ស្ពៃខៀវ ខ្ទឹមស្លឹក ត្រសក់ ម្រះ ។ល។ ជាលក្ខណៈបង្វិល ជុំដើម្បីរកចំណូល។ ចំណែកប្រពន្ធគាត់ បិតស្រា និងចិញ្ចឹមជ្រូក ដូច្នេះលុយដែលរកបានក៏សន្សែសន្សំទុកទិញដី។ ជាមួយនឹងវិធីធ្វើនោះ ក្រោយរយៈពេលជាង ១០ ឆ្នាំ បានជួយឱ្យគ្រួសារចាកផុតពីភាពក្រីក្រ ហើយមានដីដល់ទៅ ១២ កុង។ ប៉ុន្មានឆ្នាំជិតៗនេះ នៅពេលអាជីពបិតស្រានិងចិញ្ចឹមជ្រូកលែងអំណោយផល ពូដេន បានប្តូរមកចិញ្ចឹមគោវិញ។ សម្រាប់ដីដាំដំណាំវិញ គាត់ឡើងចម្ការថែម ១ កុងទៀត ដើម្បីប្តូរទៅដាំជីរ បន្លាទាំងអស់ ហើយជុំវិញគាត់ដាំស្មៅគោ។ ពូដេន រៀបរាប់៖ “ការដាំជីរបន្លា មិនសូវចំណាយពេលថែទាំរកបានប្រាក់ចំណូលខ្ពស់ ហើយថែមទាំងប្រើប្រាស់សំណល់ខ្លះៗជាចំណីសម្រាប់គោផងដែរ។ ខ្ញុំដាំជីរបន្លាតាមបែបសរីរាង្គ ធ្វើឱ្យដីមានជីជាតិល្អនិងប្រើជីគីមីតិច ហើយតិចមានសត្វល្អិត ជីរលូតលាស់ល្អនិងផ្ដល់ទិន្នផលខ្ពស់។ ដាំជីរបន្លា ក្នុងមួយឆ្នាំខ្ញុំប្រមូលផល ៣ លើក ក្នុងនោះ ប្រមូលផលស្លឹក ២ លើក និងគ្រាប់ពូជមួយលើក”។ បើតាមពូដេន ស្លឹកជីរបន្លាផ្តល់ទិន្នផលប្រហែល ៣.៥ តោន/កុង/រដូវ លក់ក្នុងតម្លៃ ចាប់ពី ១២.០០០ ដុង ដល់ ១៥.០០០ ដុង/គីឡូក្រាម ចំណែកគ្រាប់ពូជប្រមូលផលបានប្រហែល ៧០ គីឡូក្រាម/កុង លក់ក្នុងតម្លៃជាង ៣០០.០០០ ដុង/គីឡូក្រាម។

ពូ ឌៀងដេន កំពុងឱ្យចំណីគោ។

បច្ចុប្បន្ន ពូដេន ចិញ្ចឹមគោបារាំងបានចំនួន ១០ ក្បាល ក្នុងនោះ មានគោមេ ៤ ក្បាល គោចំទង់ ៤ ក្បាល និងគោកូន ២ ក្បាល។ ជាមធ្យមក្នុងមួយឆ្នាំ គាត់លក់ពី ៣-៤ ក្បាល ក្នុងតម្លៃជាង ៣០ លានដុងក្នុងមួយក្បាល។ ចំណែកដីស្រែ ១០ កុងគាត់ធ្វើពូជស្រូវគុណភាពខ្ពស់ ដូចជា៖ ពូជស្រូវ ST25 ពូជស្រូវក្រអូប និងអនុវត្តវិទ្យាសាស្ត្របច្ចេកទេសជឿនលឿន ដូច្នេះ សម្រេចបានទិន្នផលនិងប្រាក់ចំណូលខ្ពស់។ ពូដេន ឱ្យដឹង៖ “ដាំជីរបន្លា ១ កុងរកបានប្រាក់ចំណេញជាង ៤០ លានដុង/រដូវ ស្មើនឹងធ្វើស្រែចំនួន ១០ កុង។ ជាច្រើនឆ្នាំមកនេះ ដោយសារដាំជីរបន្លា ចិញ្ចឹមគោបារាំងនិងធ្វើស្រែពូជស្រូវក្រអូបលក់បានថ្លៃនិងផ្ដល់ប្រាក់ចំណេញច្រើន ទើបជីវភាពរបស់គ្រួសារខ្ញុំបានធូរធារគ្រាន់បើ សង់បានផ្ទះធំទូលាយ និងទិញបានរបស់របរប្រើប្រាស់គ្រប់សព្វ”៕

យ្វីអាញ-មេងលី

ចែករំលែកអត្ថបទ

ពាក្យគន្លឹះ