កីឡា - ទេសចរណ៍ ទេសចរណ៍

19/06/2023 - 16:54

ពេញចិត្តនឹងជ្រោយដាយឡាញ់

ពេញចិត្តនឹងជ្រោយដាយឡាញ់ ព្រោះទីនេះមានទេសភាពដ៏ស្រស់ស្អាត។ ភ្ញៀវទេសចរអង្គុយលើកាំជណ្ដើរថ្ម គយគន់ទឹកសមុទ្រថ្លាយង់ សម្លឹងទៅឆ្ងាយឃើញបង្គោលសើនសមុទ្រដែលមានអាយុកាលរាប់រយឆ្នាំ កាន់តែមានមោទនភាពថាប្រទេសវៀតណាមយើងមានភាពស្រស់ស្អាតអ្វីម្លេះទេ។

សម្រស់ដ៏អស្ចារ្យនៃជ្រោយដាយឡាញ់។

ឆ្នេរម៉ូងខ្សាច់ស ទឹកសមុទ្រថ្លាយង់។

ផ្លូវថ្មើរជើងទៅកាន់ជ្រោយដាយឡាញ់។

ទទួលបានពន្លឺព្រះអាទិត្យមុនគេនៅដាយឡាញ់ សម្លឹងទៅឆ្ងាយៗឃើញបង្គោលសើនសមុទ្រដែលមានអាយុកាលរាប់រយឆ្នាំ។

ជ្រោយដាយឡាញ់ (ឬហៅថា ជ្រោយឌៀង) ស្ថិតនៅភូមិភឿកតឹង ឃុំហ្វាតឹម ទីរួមខេត្តដុងហ្វា ខេត្តភូអៀង។ ឆ្នាំ ២០០៨ ប្រជុំរមណីយដ្ឋានឆ្នេរម៉ូង-ជ្រោយដាយឡាញ់ ត្រូវបានក្រសួងវប្បធម៌-កីឡានិងទេសចរណ៍ រៀបចំណាត់ថ្នាក់ជាកេរដំណែលថ្នាក់ជាតិ។ ជ្រោយដាយឡាញ់ មានភាពល្បីល្បាញ ព្រោះទីនេះទទួលពន្លឺព្រះអាទិត្យមុនគេនៅលើដីគោកនៃប្រទេសវៀតណាម។ នៅលើជ្រោយដាយឡាញ់មានបង្គោលសើនសមុទ្រ បានកសាងឡើងក្នុងឆ្នាំ ១៨៩០។ ឆ្លងកាត់ការប្រែប្រួលនៃប្រវត្តិសាស្រ្ត ឆ្នាំ ១៩៩៥ បង្គោលសើនសមុទ្រត្រូវបានជួសជុលឡើងវិញនិងរក្សាភាពដើមរហូតមកទល់បច្ចុប្បន្ន។ គ្រាន់តែឮព័ត៌មានទាំងពីរខាងលើភ្លាម ភ្ញៀវទេសចរក៏ចង់មកទីនេះដើម្បីទទួលពន្លឺព្រះអាទិត្យដែលចែងចាំងមុនគេនាថ្ងៃថ្មី និងយល់ពីភាពអស្ចារ្យនៃធម្មជាតិ។ មោទនភាពហាក់រត់តាមសរសៃឈាម នៅពេលភ្ញៀវទេសចរឃើញទង់ជាតិបក់រវិកៗលើកំពូលបង្គោលសើន។ ជំនោរខ្យល់បក់មកម្តងៗ ធ្វើឱ្យភ្ញៀវទេសចរកាន់តែមានអារម្មណ៍យល់ច្បាស់ពីភាពឧត្តុង្គឧត្តមអំពីអធិបតេយ្យនៃមាតុភូមិ។

ជាមួយនឹងរមណីយដ្ឋានដ៏ស្រស់ស្អាត និងមានតម្លៃកាត់ថ្លៃពុំបាននេះ ភូអៀងគឺជាគោលដៅទេសចរណ៍ដ៏ទាក់ទាញនៅភូមិភាគកណ្ដាល។ ការធ្វើដំណើរទៅកាន់ជ្រោយដាយឡាញ់មិនឆ្ងាយប៉ុន្មានទេ ដូច្នេះសមស្របសម្រាប់ជើងទេសចរណ៍ស្វែងយល់។ គ្រាន់តែជិះម៉ូតូតាមផ្លូវមាត់សមុទ្រពីទីក្រុងទ្វីហ្វាដល់កន្លែងសំចតដំណើរនឹងញុាំងអ្នកទស្សនាមានអារម្មណ៍រីករាយជាពុំខាន ព្រោះមានទេសភាព ដ៏ស្រស់ស្អាត។ មានភ្ញៀវទេសចរជាច្រើនបារម្ភ ពីកំណាត់ផ្លូវថ្មើរជើងពីចំណតរថយន្តទៅកាន់ជ្រោយដាយឡាញ់។ ទោះបីបត់បែនឡើងចុះក៏ដោយ ប៉ុន្តែផ្លូវនេះងាយស្រួលធ្វើដំណើរ។ ជាពិសេស នៅតាមផ្លូវនេះ មានទេសភាពស្អាតៗជាច្រើនសម្រាប់ភ្ញៀវទេសចរឈប់ថតរូបសម្រាក។ ថ្មីៗនេះ ភ្ញៀវទេសចរវ័យក្មេងជាច្រើនបាននាំយកឧបករណ៍ទៅបោះតង់នៅឆ្នេរម៉ូង ព្រោះឆ្នេរសមុទ្រនេះស្អាតណាស់ ខ្សាច់ស ទឹកសមុទ្រថ្លាយង់។ ដោយមានទីតាំងនៅឈូងសមុទ្រវ៉ឹងផុង ម៉្លោះហើយសមុទ្រស្ងប់រលក ចុះងូតទឹកក៏មានសុវត្ថិភាព។

ជាក់ស្ដែងគឺមិនអាចរកពាក្យមកពិពណ៌នាឱ្យអស់ពីភាពអស្ចារ្យបានឡើយ ភ្ញៀវទេសចរគួរតែមកកាន់ទីនេះដោយផ្ទាល់ ដើម្បីយល់ពីអារម្មណ៍នៃការទទួលពន្លឺព្រះអាទិត្យ និងជំនោរវាយោ ព្រមទាំងឃើញផ្ទាល់ភ្នែកភាពស្រស់ស្អាតដ៏អស្ចារ្យនៃរមណីយដ្ឋានឆ្នេរម៉ូង -ជ្រោយដាយឡាញ់៕

ហាថាញ-ទីទុយ

ចែករំលែកអត្ថបទ

ពាក្យគន្លឹះ