កីឡា - ទេសចរណ៍ ទេសចរណ៍

08/05/2023 - 14:34

ស្នា​ដៃ​ឯក​នៃ​ល្បាក់​ថ្ម​ថាស

ល្បាក់​ថ្ម​ថាស ឬហៅ​ថា​ល្បាក់​ថ្ម​ចាន​ទាប​ ជា​រមណី​ដ្ឋាន​ដ៏​ស្រស់​ស្អាត​នៅ​ឃុំ​អាង​និញ​ដុង​ ស្រុក​តុយ​អាង ខេត្ត​ភូ​អៀង។ ល្បាក់​ថ្ម​ថាស​នេះ​ កំ​ពុង​ជា​គោល​ដៅ​មិន​អាច​រំ​លង​ពេល​ភ្ញៀវ​ទេស​ចរ​មក​ដល់​តំ​បន់​ដី​ “ផ្កា​លឿង​លើ​វាល​ស្មៅ​បៃ​តង” ជា​ទីមនោ​រម្យ​នេះ។

ទេស​ភាព​ធម្ម​ជាតិ​នៅ​ល្បាក់​ថ្ម​ថាស មាន​ភាព​ស្រស់​ស្អាត​គ្រប់​រដូវ​។

តាម​របាយ​ការណ៍​របស់​គណៈ​កម្មា​ធិការ​ប្រ​ជា​ជន​ខេត្ត​ភូអៀង​ ពេល​ធ្វើ​បែប​បទ​សូម​ទទួល​ស្គាល់​ល្បាក់​ថ្ម​ថាស ជា​កេរ​ដំ​ណែល​រមណី​យដ្ឋាន​ថ្នាក់​ជាតិ​ មាន​ព័ត៌​មាន​៖ ថ្ម​នៅ​ល្បាក់​ថ្ម​ជា​ប្រ​ភេទ​ថ្ម Bazan បាន​កកើត​មុន​នេះ​ប្រ​ហែល​ ២០០ លាន​ឆ្នាំ។ ថ្ម​នេះ​ បាន​កកើត​ឡើង​ពី​កម្អែ​ភ្នំ​ភ្លើង​នៅ​តំ​បន់​ខ្ពង់​រាប​ វឹង​ហ្វា ហូរ​ចុះ​មក​ប្រ​ទះ​នឹង​ទឹក​សមុទ្រ​ក៏​កក​រឹង។ ពេល​ជួប​ប្រ​ទះ​បាតុ​ភូត​ប្រតិ​កម្ម​អា​ឡែ​ស៊ី​ ផែន​ថ្ម​កម្អែ​ភ្នំ​ភ្លើង​រង​ការ​ប្រេះ​ចេញ​ពី​គ្នា​ ក្លាយ​ជា​ផែន​ថ្ម​មាន​រាង​ឆកោណ មូល​បួន​ជ្រុង​ រៀប​ជិត​គ្នា។ សម្លឹង​មើល​ល្បាក់​ថ្ម​ថាស​ពី​ចម្ងាយ ហាក់​ដូច​ជា​សម្បុក​ឃ្មុំ​មួយ​ដ៏​ធំ​យ៉ាង​ស្រស់​ស្អាត​ និង​អាថ៌​កំ​បាំង។ ភាព​អស្ចារ្យ​ត្រង់​កន្លែង​ផែន​ថ្ម​ដូច​ជា​រៀប​លំ​ដាប់​លំ​ដោយ​គ្នា​ មាន​កន្លែង​ខ្លះ​ខ្ពស់​ កន្លែង​ខ្លះ​ទាប​លាត​សន្ធឹង​បណ្តោយ​តាម​ឆ្នេរ​សមុទ្រ។

ល្បាក់​ថ្ម​ថាស បាន​ទាក់​ទាញ​ភ្ញៀវ​ទេស​ចរ​មក​ទស្សនា​កម្សាន្ត​យ៉ាង​ច្រើន​កុះ​ករ ពី​ព្រោះ​មាន​ផ្លូវ​ធ្វើ​ដំ​ណើរ​ងាយ​ស្រួល។ ល្បាក់​ថ្ម​នេះ​ ស្ថិត​នៅ​ចម្ងាយ​ពី​ក្រុង​តុយ​ហ្វា​ប្រ​ហែល ​៤២ គី​ឡូម៉ែត្រ​ បើ​លោក​អ្នក​ធ្វើ​ដំ​ណើរ​តាម​ផ្លូវ​ជាតិ​លេខ​ ១។ ចំ​ណែក​ធ្វើ​ដំ​ណើរ​តាម​ផ្លូវ​ក្បែរ​មាត់​សមុទ្រ​ដ៏​ស្រស់​ស្អាត​ប្រ​ហែល​ ៣៥ គី​ឡូ​ម៉ែត្រ​ប៉ុណ្ណោះ។ អា​ស្រ័យ​ហេតុ​នោះ​ បើ​ចង់​ទស្ស​នាព្រះ​អា​ទិត្យ​រះ​ លោក​អ្នក​ចាំ​បាច់​ត្រូវ​ចេញ​ដំ​ណើរ​ពី​ព្រ​លឹម​ពី​ក្រុង​តុយ​ហ្វា។ បន្ទាប់​ពី​ទស្សនា​ព្រះ​អា​ទិត្យ​រះ​ លោក​អ្នក​អាច​ទទួល​ទាន​អា​ហារ​ពេល​ព្រឹក​នៅ​ហាង​ណា​ក៏​បាន​នៅ​តាម​ដង​ផ្លូវ​ ពី​ព្រោះ​ម្ហូប​អា​ហារ​នៅ​ទីនេះ​សម្បូរ​បែប​ណាស់​ ហើយ​តម្លៃ​ក៏​សម​រម្យ​ផង​ដែរ​។ ប៉ុន្តែ​បើ​ចង់​ទទួល​អា​រម្មណ៍​ពី​ភាព​ទាក់​ទាញ​នៃ​តំ​បន់​ដី​ក្បែរ​មាត់​សមុទ្រ​នេះ​ លោក​អ្នក​អាច​ស្វែង​រក​ហាង​លក់​នំ​បញ្ចុក​ត្រី​ធូ​ណា ពី​ព្រោះ​មុខ​ម្ហូប​នេះ​ឆ្ងាញ់​ណាស់។ ប្រ​សិន​បើ​មិន​អាច​ក្រោក​ពី​ព្រ​លឹម​ លោក​អ្នក​ក៏​អាច​ទស្សនា​ព្រះ​អា​ទិត្យ​ អស្ដង្គត​ដ៏​ស្រស់​ស្អាត​ពី​ល្បាក់​ថ្មថាស​នេះ​ផង​ដែរ។

ខេត្ត​ភូ​អៀង​ មាន​អា​កាស​ធាតុ​មិន​ក្ដៅមិន​ត្រ​ជាក់​ បើ​ប្រៀប​ជា​មួយ​នឹង​ខេត្ត​ដទៃ​ទៀត​នៅ​ភូមិ​ភាគ​កណ្តាល​ ហេតុ​នោះ​ភ្ញៀវ​ទេស​ចរ​អាច​មក​ទស្សនា​រមណី​ដ្ឋាន​ល្បាក់​ថ្ម​ថាស​នេះ​ នៅ​ពេល​ណា​ក្នុង​ឆ្នាំ​ក៏​បាន។ ប្រ​សិន​បើ​មក​ក្នុង​ខែ​ ២ និង​ខែ​ ៨ លោក​អ្នក​អាច​សម្រប​ខ្លួន​ក្នុង​ពិធី​បួង​សួង​សូម​ផល​នេ​សាទ​ដែល​គួរ​ឱ្យ​ចាប់​អា​រម្មណ៍។ ពេល​មក​ទីនេះ​ក្នុង​រដូវ​ភ្លៀង ភ្ញៀវ​ទេស​ចរ​គប្បី​ពាក់​ស្បែក​ជើង​ដែល​មាន​បាត​អាច​ច្បាម​ថ្ម ពី​ព្រោះ​រដូវ​ភ្លៀង​ផ្ទៃ​ថ្ម​រអិល។ ប៉ុន្តែ​ជំនួស​ឱ្យ​ប្រ​ការ​នោះ​ ពេល​សមុទ្រ​រំ​ជួល​ទឹក​រលក​ធំ​ៗ​បោក​បាច់​ចូល​ល្បាក់​ថ្ម ញុាំង​ឱ្យ​ទឹក​ខ្ទាត់​បែក​ផ្កា​ត្រែង​ឡើង​ខ្ពស់​ត្រ​ដែត​ ធ្វើ​ឱ្យ​ភ្ញៀវទេស​ចរ​រំ​ភើប​ចិត្ត​ដោយ​រូប​ភាព​ដ៏​ស្រស់​ស្អាត​នេះ​។ ប្រ​ជាជន​នៅ​ភូមិ​ភាគ​នៅ​ទាំង​ជឿ​ថា ទឹក​រលក​កាន់​តែ​ធំ​ ផែន​ថ្មកាន់​តែ​ខិត​ជិត​គ្នា​ ដើម្បី​បង្ក​ជា​កម្លាំង​រាំង​ខ្ទប់ ជួយ​ការ​ពារ​ដល់​ដី​គោក៕

                                   ហា​ថាញ-វិមាន​

ចែករំលែកអត្ថបទ