សន្តិសុខ - ការពារប្រទេស ការពារប្រទេស

06/02/2023 - 14:55

ដើម្បីភាពសុខសាន្តរបស់ភូមិស្រុក

អ្នកមានប្រជាប្រិយក្នុងជនរួមជាតិខ្មែរនៅឃុំហឹងហោយ ស្រុកវិញឡើយ ខេត្តបាកលីវ តែងសកម្មក្នុងការចលនាជនរួមជាតិខ្មែរចូលរួមចលនាទូទាំងប្រជាជនការពារសន្តិសុខមាតុភូមិ។ ផ្ដើមពីនោះ មាមីងខ្មែរក្នុងភូមិស្រុកបានម្ចាស់ការក្នុងការបង្ការប្រឆាំងបទល្មើសគ្រប់ប្រភេទ កសាងគ្រួសារគ្មានបទល្មើស។

អ្នកមានប្រជាប្រិយសកម្មក្នុងការរក្សាភាពសុខសាន្តនៅភូមិស្រុក។

តាមប្រសាសន៍លោកថាច់សង អ្នកមានប្រជាប្រិយក្នុងជនរួមជាតិខ្មែរ នៅភូមិសុកដោង មុននេះ ក្មេងៗក្នុងភូមិមានការជក់គ្រឿងញៀន លេងបៀប៉ោ ជល់មាន់ ស្ទាក់ផ្លូវសុំលុយ បង្កើតបក្ខពួកវាយតប់គ្នា។ល។ ម្ល៉ោះហើយ ពេលយប់ព្រលប់មិនសូវមានអ្នកណាហ៊ានចេញផ្លូវទេ។ ឃើញដូច្នោះ ទើបអ្នកមានប្រជាប្រិយក្នុងភូមិ រួមជាមួយព្រះចៅអធិការវត្ត ពិភាក្សាគ្នាបង្កើតក្រុមស្វ័យការពារក្នុងភូមិស្រុក។ ទន្ទឹមនឹងនោះ ក្នុងឱកាសថ្ងៃសីល ពេលមាមីងអញ្ជើញទៅវត្ត ព្រះចៅអធិការបានឃោសនាចលនាមាមីងពុទ្ធបរិស័ទ អប់រំទូន្មានកូនចៅ ហើយឱ្យចុះឈ្មោះកសាងគ្រួសារមិនប្រព្រឹត្តខុសច្បាប់។ លោកថាច់សង ឱ្យដឹង ៖ “យើងជាចាស់ទុំក្នុងភូមិ ធ្លាប់បួសរៀន មានប្រជាប្រិយ មានការរៀនសូត្រ ម្ល៉ោះហើយ ពេលឃើញកូនចៅក្នុងភូមិ បង្កឱ្យបាត់សណ្ដាប់ធ្នាប់ភូមិស្រុក គឺទៅដល់ផ្ទះអប់រំទូន្មានភ្លាម។ ពេលស្ដាប់ខ្ញុំពន្យល់វែកញែកពីផលវិបត្តិនៃការប្រព្រឹត្តខុសច្បាប់ ក្មេងៗក្នុងភូមិក៏ស្ដាប់បង្គាប់តាម ហើយវៀរចាក។ អាស្រ័យហេតុនេះ ទើបមានគ្រួសារជាច្រើនបានចុះឈ្មោះកសាងគ្រួសារមិនប្រព្រឹត្តខុសច្បាប់”។ ដោយភាពជាគំរូ និងការប្ដេជ្ញាចិត្តរបស់អ្នកមានប្រជាប្រិយក្នុងការកសាងភូមិស្រុកគ្មានបទល្មើស ម្ល៉ោះហើយ មាមីងក៏កាន់តែមានការយល់ដឹងក្នុងការអប់រំទូន្មានកូនចៅ។ លោកសើុងបី ប្រធានសមាគមមនុស្សចាស់ នៅភូមិកៃយ៉ា ឱ្យដឹងៈ “មាមីងខ្មែរភាគច្រើនគោរពព្រះពុទ្ធសាសនា ពេលឮព្រះចៅអធិការវត្តនិងអ្នកមានប្រជាប្រិយ ពន្យល់ ណែនាំដោយគួបផ្សំទាំងទ្រឹស្ដីព្រះពុទ្ធសាសនា និងច្បាប់រដ្ឋ ម្ល៉ោះហើយមានការយល់ដឹង។ ផ្ដើមពីនោះ ភូមិស្រុកមានការសាមគ្គី ចេះជួយគ្នា ហើយក៏លែងមានបាបគ្រោះសង្គម គ្មានការឈ្លោះទាស់ទែងគ្នា ឬក៏កើតមានបទល្មើសណាធ្ងន់ធ្ងរនោះឡើយ” ។

តាមប្រសាសន៍លោកសើុងបី ឆ្នាំ ២០១៤ អ្នកមានប្រជាប្រិយ បានសម្រេចរំសាយក្រុមស្វ័យការពារ ហើយបានបង្កើតទម្រង់ “ក្លិប ៣សកម្មក្នុងជនរួមជាតិខ្មែរ”វិញ ដោយមានសមាជិកចូលរួម ៣៥ នាក់ អាស្រ័យលោកថាច់សង ធ្វើជាប្រធាន លោកសើុងបី ធ្វើជាអនុប្រធាន។ សមាជិករបស់ក្លិប តែងសកម្មចលនាប្រជាជនចូលរួមចលនាទូទាំងប្រជាជនការពារសន្តិសុខមាតុភូមិ ជួយដោះស្រាយជម្លោះក្នុងវង្សត្រកូល ចលនាប្រជាជនសកម្មចូលរួមប្រយុទ្ធ ប្រឆាំង និងថ្កោលទោសរាល់បទល្មើស កសាងចំណងសាមគ្គី ជួយឧបត្ថម្ភគ្នា។

ប្រធានគណៈកម្មាធិការប្រជាជនឃុំហឹងហោយ ង្វៀងហ្វាងអែម បញ្ជាក់៖ “អ្នកមានប្រជាប្រិយក្នុងជនរួមជាតិខ្មែរនៅឃុំហឹងហោយ បានសកម្មក្នុងការឃោសនា ចលនាមាមីងខ្មែរប្រយុទ្ធប្រឆាំងរាល់បទល្មើស។ ហេតុនេះ មកទល់សព្វថ្ងៃ ភូមិស្រុកគ្មានបទល្មើសធ្ងន់ធ្ងរឡើយ ហើយប្រជាជនរស់នៅមានការសាមគ្គី ព្រួតដៃគ្នាកសាងភូមិស្រុកកាន់តែសម្បូរសប្បាយ និងសុខសាន្ត។ នៅតាមដងផ្លូវក៏មានបំពាក់ភ្លើងអគ្កិសនី កាមេរ៉ាសន្តិសុខ ដាំផ្កាលម្អ ធ្វើអនាម័យស្អាតបាតដែរ៕

យ៉ីអាញ-ពេជ្រសឿន

ចែករំលែកអត្ថបទ

ពាក្យគន្លឹះ